Morgunblaðið - 10.04.2002, Blaðsíða 6

FRÉTTIR
6 MIÐVIKUDAGUR 10. APRÍL 2002 MORGUNBLAÐIÐ
„STÖÐVUM blóðbaðið – alþjóðlega
vernd strax – frið í Palestínu“ voru
kjörorð fjölmenns útifundar sem Al-
þýðusamband Íslands, Öryrkja-
bandalag Íslands, BSRB og félagið
Ísland-Palestína stóðu fyrir í sam-
einingu á Austurvelli í gær. Fund-
armenn létu hryssingslegt veður,
rok og kulda, ekki aftra sér frá því
að mæta og sóttu milli 1.000 og
1.300 manns fundinn, að mati lög-
reglu.
Hugurinn hjá friðelskandi fólki
í löndum Ísraels og Palestínu
Hr. Karl Sigurbjörnsson, biskup
Íslands, sagði fréttir af skefjalausu
ofbeldi og ægilegu blóðbaði berast
frá landinu helga. Biskup sagðist
unna bæði Ísraelum og Palest-
ínumönnum og bera virðingu fyrir
báðum þjóðum. „Það er djúpt
harmsefni að fyrirheitin um ríki fyr-
ir landlausa og ofsótta Gyðinga snú-
ist upp í áratuga hernám á landi
Palestínumanna, áratuga fjötra
milljóna réttlauss fólks í flótta-
mannabúðum og nú kerfisbundið
niðurbrot innviða samfélags heima-
stjórnarsvæðis þeirra. Hugur okkar
er hjá öllu friðelskandi fólki í lönd-
um Ísraels og Palestínu og öllum
sem harma og þjást. Við biðjum þess
að stjórnvöld Ísraels snúi við af
þessari óheillabraut,“ sagði biskup.
Hann sagði sjálfsmorðsárásir ól-
íðandi og að vonin ein geti slegið
þetta skelfilega vopn úr höndum of-
stækisaflanna. „Veik er sú von. Von-
in um frið og friðsamlega sambúð
Ísraelsmanna og Palestínumanna í
tveimur ríkjum sem virða landa-
mæri og samninga sýnast víðsfjarri.
Og þó. Ef allir leggjast á eitt – ef
heimsbyggðin segir hingað og ekki
lengra, þarf ekki að liggja lengi yfir
samningum,“ sagði biskup.
Sveinn Rúnar Halldórsson, for-
maður félagsins Ísland-Palestína,
flutti ávarp Garðars Sverrissonar,
formanns Öryrkjabandalags Ís-
lands.
Tæpitungulausum mótmælum
verði komið á framfæri
Garðar taldi siðferðisábyrgð Ís-
lendinga meiri gagnvart örlögum
þess „varnarlausa fólks sem nú er
pyntað, limlest og myrt í landinu
helga“ þar sem Íslendingar áttu
þátt í stofnun Ísraelsríkis í landi pal-
estínskrar þjóðar fyrir hálfri öld.
„Við biðjum um það eitt að kjörnir
ráðamenn þjóðarinnar dragi það
ekki lengur að koma tæpitungulaus-
um mótmælum á framfæri við of-
beldisöflin í Ísrael. Sómi Íslands er í
húfi,“ sagði í ræðu Garðars.
Ögmundur Jónasson, formaður
BSRB og formaður þingflokks
Vinstrihreyfingarinnar – græns
framboðs, rifjaði upp umsátur Ísr-
aelsmanna um Beirút fyrir tuttugu
árum og árásir vopnaðra sveita sem
Ariel Sharon, núverandi forsætis-
ráðherra Ísraels, stýrði á flótta-
mannabúðirnar í Shattila og Sabra
þar sem landflótta Palestínumenn
höfðust við. „Farið var hús úr húsi,
og þeir myrtir, á kaldrifjaðan hátt –
teknir af lífi – allir sem grunur lék á
að ættu í brjósti sínu drauminn um
frjálsa þjóð Palestínumanna,“ sagði
hann.
„Stöðvum blóðbaðið“
Ögmundur sagði að þegar sið-
ferði og mannúð væru annars vegar
skipti stærð þjóðar engu máli, stærð
þjóðar væri mæld í siðferðisstyrk
hennar. „Látum frá okkur heyra,
hvernig sem viðrar og þannig að
eftir því verði tekið. Stöðvum blóð-
baðið bæði í Palestínu og Ísrael.“
Sveinn Rúnar flutti kveðju Vig-
dísar Finnbogadóttur, fyrrverandi
forseta Íslands, sem sendi fundinum
kveðju sína og samhug. Einnig sagði
Sveinn frá peningasöfnun sem fram
fór á fundinum á vegum félagsins
Ísland-Palestína til stuðnings lækn-
ishjálp í Palestínu.
Síðar í dag fer Sveinn Rúnar
ásamt Viðari Þorsteinssyni ritara
félagsins til Jerúsalem og er ætlunin
að fara þaðan til Palestínu. Þar
munu þeir skoða hvernig hjálp-
arstarfið gengur og hvernig Íslend-
ingar gætu komið að liði. Einnig
hyggjast þeir heimsækja íslenska
hjálparstarfsmenn sem starfa á veg-
um Hjálparstarfs kirkjunnar á
svæðinu, auk þess sem þeir vonast
til að hitta friðelskandi Ísraela og
Palestínumenn að máli.
Stofna þarf ríki Palestínu
Katrín Fjeldsted, þingmaður
Sjálfstæðisflokks, sagði að deil-
urnar fyrir botni Miðjarðarhafs
verði að leysa á friðsamlegan hátt.
„Núverandi ástand er óþolandi og
ógnar heimsfriði. Arabaríkin verða
að viðurkenna Ísraelsríki og stofna
þarf ríki Palestínu og viðurkenna
það af heimsbyggðinni.
Katrín sagði Íslendinga friðelsk-
andi þjóð og því hljóti þjóðin að
styðja við friðarumleitanir á svæð-
inu. „Við tökum því heilshugar und-
ir ályktun Öryggisráðsins og þá sýn
að þessi tvö ríki megi þrífast hlið við
hlið innan öruggra og viðurkenndra
landamæra,“ sagði Katrín.
Grétar Þorsteinsson, forseti ASÍ,
sagði tilefnin til að mótmæla fram-
göngu Ísraelsmanna í Palestínu oft
hafa verið ærin, en aldrei sem nú. „Í
þessari viku fara forsvarsmenn frá
Evrópusambandi verkalýðsfélaga
og Alþjóðasambandi frjálsra verka-
lýðsfélaga til Ísraels og Palestínu til
að ræða málin við Alþýðusamböndin
í þessum löndum. Það eru því ekki
einungis íslensk samtök launafólks
sem láta sér annt um ástandið. Um
það er alþjóðleg samstaða.“
Grétar sagði mikilvægt að al-
þjóðasamfélagið grípi í taumana
sem allra fyrst og þrýst verði á
valdamenn í heiminum til að hafa
áhrif á Ísraelsmenn. Með samstilltu
átaki eigi að vera hægt að stöðva
grimmdarverkin. „Þeir þurfa að
tryggja alþjóðlega vernd strax. Þeir
geta tryggt frið í Palestínu og þeim
ber skylda til þess.“
Palestínu-
mönnum sýnd
samstaða
Rúmlega 1.000 manns sóttu útifund
á Austurvelli í köldu veðri í gær
Morgunblaðið/Kristinn
Nokkrir fundarmanna báru
kröfuspjöld þar sem Ísraelar
voru hvattir til að láta af hern-
aði í Palestínu. Palestínumenn
búsettir á Íslandi báru einnig
fána Palestínu sem blöktu í
hvössum vindinum.
SAMKEPPNISSTOFNUN er ekki
skylt að eyða öllum afritum skjala
á rafrænu formi sem hald var lagt
á við leit hjá olíufélögunum Skelj-
ungi og Olíuverslun Íslands 18.
desember sl. og vistuð eru á tölvum
stofnunarinnar. Komst Héraðsdóm-
ur Reykjavíkur að þessari niður-
stöðu í gær og hafnaði þar með
kröfu olíufélaganna tveggja.
Lögmenn félaganna tóku sér
frest til að ákveða hvort úrskurð-
inum yrði hafnað.
Olíufélögin höfðuðu mál sitt í
hvoru lagi en niðurstaða úrskurð-
anna er samhljóða. Þar segir Allan
V. Magnússon héraðsdómari að
Skeljungi og Olís hafi ekki tekist að
sýna fram á að lagaskilyrði væru
fyrir hendi til þess að verða við
kröfu fyrirtækjanna um að eyða
gögnunum. Aðalkrafa olíufélaganna
var að Samkeppnisstofnun yrði
skylduð til að eyða öllum afritum
skjala á rafrænu (tölvutæku) formi
sem hald var lagt á við leit er hús-
leit var gerð samtímis hjá olíufélög-
unum þremur til að kanna meint
ólögmætt samráð þeirra um verð-
lagningu á olíuvörum. Olíufélag Ís-
lands dró til baka beiðni sína um
úrskurð í málinu.
Til vara kröfðust olíufélögin tvö
þess að stofnuninni yrði gert skylt
að eyða öllum afritum tölvupósts
sem hald var lagt á við húsleitina.
Til þrautarvara að stofnuninni væri
óheimilt að opna skjöl á rafrænu
formi sem haldlögð voru við leitina.
Þessum kröfum var einnig hafnað
af dómnum.
Í niðurstöðum úrskurðsins segir
að Samkeppnisstofnun hafi fengið
heimild til húsleitar hjá olíufélög-
unum með dómsúrskurði. Því hafi
stofnunin haft heimild til þeirra að-
gerða sem hún greip til. Sam-
kvæmt því hafi Samkeppnisstofnun
verið heimilt að afrita gögn á tölvu-
tæku formi og „með þá heimild í
hendi“ hafi stofnunin augljóslega
átt rétt til að kanna þessi gögn, þar
á meðal persónuleg gögn starfs-
manna eftir því sem nauðsyn kref-
ur.
Um framkvæmd leitar og hald-
lagningar segir að að hér hafi verið
um að ræða rannsókn Samkeppn-
isstofnunnar en ekki lögreglu.
Ákvæði 2. mgr. 40. greinar sam-
keppnislaga yrði að túlka þannig að
við þær að aðstæður sé það hlut-
verk lögreglumanna að veita aðstoð
við rannsókn sem eðli máls sam-
kvæmt lúti stjórn og ábyrgð þess
stjórnvalds sem hana framkvæmir.
Þarf ekki að eyða
tölvugögnum
Samkeppnisstofnun
BORGARFULLTRÚAR Sjálfstæð-
isflokksins lögðu fram fyrirspurn í
gær vegna byggingar nýrra höfuð-
stöðva Orkuveitunnar við Réttarháls:
„Komið hefur í ljós að Orkuveitan
hyggst leigja út 500 fermetra salar-
kynni í húsinu undir starfsemi lík-
amsræktarstöðvar. Um síðustu helgi
var auglýst í Morgunblaðinu eftir að-
ilum til að reka slíka starfsemi sem
yrði í samkeppni við aðrar líkams-
ræktarstöðvar. Óskað er upplýsinga
um hve stór hluti af nýjum höfuð-
stöðvum Orkuveitunnar verður leigð-
ur út fyrir samkeppnisrekstur og hve
hár stofnkostnaður þess hluta verð-
ur.“
Vihjálmur Þ. Vilhjálmsson, borgar-
fulltrúi og einn stjórnarmanna Orku-
veitunnar, segir að þetta hafi verið
gert án vitundar stjórnar Orkuveit-
unnar. „Samkvæmt upphaflegum
teikningum átti að vera þarna líkams-
ræktaraðstaða fyrir starfsmenn. Það
er mjög sérkennilegt að Orkuveitan,
undir forystu Alfreðs Þorsteinssonar,
sem vildi selja Perluna skuli nú
standa fyrir því að Orkuveitan opni
500 fermetra líkamsræktarstöð í
beinni samkeppni við aðrar stöðvar.“
Líkamsræktarstöð á
vegum Orkuveitunnar
OR í rekst-
ur á sam-
keppnis-
markaði