Morgunblaðið - 26.11.2002, Page 10

FRÉTTIR
10 ÞRIÐJUDAGUR 26. NÓVEMBER 2002 MORGUNBLAÐIÐ
FORSETAR þjóðþinganna á Íslandi,
í Grænlandi og Færeyjum funduðu í
Reykjavík um helgina að frum-
kvæði Halldórs Blöndal, forseta Al-
þingis, en á fundi þeirra var m.a.
rætt um það hvernig bæta megi enn
frekar samstarf þjóðþinga þessara
landa. Edmund Joensen, forseti fær-
eyska lögþingsins, og Daniel Skifte,
forseti grænlenska landsþingsins,
sögðu í samtali við Morgunblaðið að
samstarf vestnorrænu landanna
þriggja, þ. á m. samstarf þinganna,
væri afar mikilvægt. Löndin hefðu
sameiginlega hagsmuni í mörgum
málum, t.d. varðandi fiskveiðar.
„Ísland, Færeyjar og Grænland
eru háð fiskveiðum og eiga það m.a.
sameiginlegt að selja afurðir sínar í
löndum Evrópusambandsins,“ sagði
Skifte, „en þessi lönd standa öll utan
ESB,“ bætti hann við. Joensen tekur
í sama streng. Þeir segja mikilvægt
að ekki bara ríkisstjórnir vestnor-
rænu landanna hafi með sér reglu-
legt samstarf heldur einnig þing-
menn. Af þeim sökum hafi
þingforsetarnir ákveðið að hittast
reglulega, að frumkvæði Halldórs,
eins og áður kom fram.
Joansen, Skifte og Halldór segja
að á fundinum um helgina hafi m.a.
verið rætt hvort og þá hvernig
nefndir þinganna gætu unnið meira
saman. T.d. hvort heilbrigð-
isnefndir þinganna gætu haft meira
samstarf, menntanefndir þinganna
o.s.frv. Með auknu samstarfi gætu
nefndirnar t.d. lært hver af annarri
og farið yfir sameiginleg vandamál.
Halldór segir að á fundinum hafi
einnig verið rædd sú hugmynd að
gefa starfsmönnum þinganna tæki-
færi á að heimsækja þing hvers ann-
ars. Þannig gætu þeir séð hvernig
aðrir stæðu að verki, lært hverjir af
öðrum og kynnt nýjungar.
Þingforsetarnir tveir komu til
landsins á föstudag en sama kvöld
héldu þeir til Fjarðabyggðar ásamt
Halldóri og föruneyti. Var m.a. siglt
með þá til Mjóafjarðar á laugardag
þar sem laxeldisstöð Sæsilfurs var
m.a. heimsótt. Þeir fóru til Reykja-
víkur á sunnudag en fundur þing-
forsetanna og embættismanna fór
fram í húsakynnum Alþingis á
sunnudag. Um kvöldið var boðið til
kvöldverðar í Ráðherrabústaðnum.
Skifte og Joensen héldu af landi
brott í gær, mánudag, en næsti
fundur þingforsetanna hefur verið
boðaður í Grænlandi næsta sumar.
Þingforsetar vestnorrænu landanna funduðu í Reykjavík
Rætt um að efla enn frekar
samstarf þjóðþinganna
Ljósmynd/Þorsteinn Magnússon
Þingforsetarnir á siglingu í Mjóafirði þar sem laxeldisstöð Sæsilfurs var skoðuð. Daniel Skifte, forseti grænlenska
landsþingsins, Edmund Joensen, forseti færeyska lögþingsins, og Halldór Blöndal, forseti Alþingis.
PRÓFKJÖR Sjálfstæðisflokksins í Reykjavík
var hið síðasta sem stjórnmálaflokkarnir
standa fyrir vegna þingkosninganna í vor.
Víða er eftir að stilla upp frambjóðendum og
ganga formlega frá listum að prófkjörum
loknum. Þannig eiga Vinstrihreyfingin –
grænt framboð og Frjálslyndi flokkurinn al-
farið eftir að stilla upp sínum listum en aðrir
flokkar eru langt komnir í þeirri vinnu, þ.e.
Sjálfstæðisflokkurinn, Framsóknarflokkurinn
og Samfylkingin. Sem kunnugt er verður kos-
ið eftir nýrri kjördæmaskipan þar sem kjör-
dæmin verða sex í stað átta.
Sjálfstæðisflokkurinn hefur sem sagt lokið
sínum prófkjörum, sem fram fóru í Norðvest-
urkjördæmi og Reykjavík, þar sem var sam-
eiginlegt prófkjör fyrir norður- og suður-
kjördæmin. Uppstilling er í öðrum
kjördæmum og mun hún skýrast endanlega
um næstu helgi þegar kjördæmisráðin koma
saman til funda.
Sjálfstæðismenn í Suðvesturkjördæmi
kjósa um næstu helgi
Hér annars staðar á síðunni er gerð grein
fyrir nýjustu stöðu mála hjá Sjálfstæðis-
flokknum í Suðurkjördæmi en kjörnefnd
flokksins í Suðvesturkjördæmi hefur ákveðið
að kynna sína tillögu á fundi kjördæmisráðs í
Valhöll næstkomandi laugardag kl. 13. Þar
verður kynnt tillaga um röð 22 frambjóðenda
á listanum. Að sögn Ásgerðar Halldórsdóttur,
formanns kjörnefndar og kjördæmisráðs,
verða fjórir þingmenn flokksins úr gamla
Reykjaneskjördæminu í fjórum efstu sæt-
unum en endanleg röð þeirra liggur ekki fyr-
ir. Þetta eru þau Árni M. Mathiesen sjáv-
arútvegsráðherra, Gunnar I. Birgisson,
Sigríður Anna Þórðardóttir og Þorgerður
Katrín Gunnarsdóttir. Ásgerður segir marga
hafa lýst áhuga á að skipa næstu sæti, m.a.
hefðu varaþingmennirnir Helga Guðrún Jón-
asdóttir, Jón Gunnarsson og Sturla D. Þor-
steinsson gefið sig fram á síðasta kjördæm-
isþingi. Fleiri nöfn koma einnig til greina, að
sögn Ásgerðar, en hún vill ekki gefa þau upp
að svo stöddu. Kjördæmisráð Sjálfstæðis-
flokksins í Norðausturkjördæmi kemur sam-
an til fundar á Akureyri nk. laugardag þar
sem m.a. verður kosið um tillögu uppstilling-
arnefndar. Samkvæmt upplýsingum Morgun-
blaðsins er fastlega reiknað með að Halldór
Blöndal, forseti Alþingis, skipi þar fyrsta
sætið, Tómas Ingi Olrich menntamálaráð-
herra skipi annað sætið, Arnbjörg Sveins-
dóttir, þingmaður af Austurlandi, verði í því
þriðja og í fjórða sæti Sigríður Ingvarsdóttir,
sem tók nýlega sæti Hjálmars Jónssonar á
Alþingi sem þingmaður Norðurlands vestra.
Nokkur eftirmál urðu sem kunnugt er að
loknu prófkjöri sjálfstæðismanna í Norðvest-
urkjördæmi. Eftir á að ákveða endanlegan
lista en að sögn Kjartans Gunnarssonar,
framkvæmdastjóra Sjálfstæðisflokksins, hef-
ur miðstjórn ekki verið kölluð til fundar. Líkt
og fram hefur komið í blaðinu hafa full-
trúaráð sjálfstæðisfélaganna í Skagafirði,
Húnavatnssýslum og á Akranesi óskað eftir
því að miðstjórnin fjallaði um framkvæmd
prófkjörsins.
Vel á veg komið hjá VG
Vinstrihreyfingin – grænt framboð, VG,
stillir upp listum í kjördæmunum sex. Að
sögn Steingríms J. Sigfússonar, formanns
flokksins, eru störf uppstillingarnefnda vel á
veg komin en hann segir endanlega fram-
boðslista væntanlega ekki liggja fyrir fyrr en
í janúar næstkomandi. Líkt og aðrir þing-
menn flokksins er Steingrímur áfram í kjöri.
Hann mun leiða listann í Norðausturkjör-
dæmi en þar eru málin lengst komin. Búið er
að ráða kosningastjóra, sem er Huginn Freyr
Þorsteinsson. Að sögn Steingríms er reiknað
með að Þuríður Backman skipi annað sætið
en hann segir Árna Steinar Jóhannsson ekki
hafa haft áhuga á þriðja sætinu. Mögulegt sé
að hann verði í framboði í öðrum kjördæmum
og komi þar Suðvesturkjördæmi eða Suður-
kjördæmi helst til greina. Vinstri grænir eru
ekki með þingmenn af þeim svæðum en tveir
koma úr Reykjavík, þau Ögmundur Jónasson
og Kolbrún Halldórsdóttir, og Jón Bjarnason
verður efstur á lista flokksins í Norðvest-
urkjördæmi. Steingrímur segir mörg önnur
nöfn hafa verið nefnd og margir hafi sett sig í
samband við uppstillingarnefndir flokksins.
Uppstilling hjá
Framsókn í Reykjavík
Framsóknarflokkurinn hefur á kjördæm-
isþingum kosið á lista í tveimur kjördæmun
með tvöfaldri kosningu, í Suðvestur- og Norð-
vesturkjördæmum. Sömu aðferð verður beitt
á kjördæmisþingi í janúar nk. í Suðurkjör-
dæmi en þar hafa Guðni Ágústsson landbún-
aðarráðherra og þingmennirnir Ísólfur Gylfi
Pálmason og Hjálmar Árnason gefið kost á
sér.
Í sama mánuði fer fram kjördæmisþing í
Norðausturkjördæmi en annarri aðferð beitt.
Fram fer ein kosning á þinginu um tíu nöfn
og rennur frestur til að gefa kost á sér út 1.
desember nk. Samkvæmt upplýsingum Morg-
unblaðsins hafa Valgerður Sverrisdóttir iðn-
aðarráðherra og Jón Kristjánsson heilbrigðis-
ráðherra gefið kost á sér í 1. sætið, Dagný
Jónsdóttir, formaður SUF, og Þórarinn
Sveinsson, fráfarandi formaður kjördæmis-
sambandsins, hafa gefið kost á sér í þriðja
sætið og Birkir Jón Jónsson, aðstoðarmaður
félagsmálaráðherra, og Skafti Ingimarsson á
Akureyri hafa gefið kost á sér í fjórða sætið.
Í Reykjavíkurkjördæmunum verður stillt upp
á tvo lista hjá framsóknarmönnum. Uppstill-
ingarnefnd í Reykjavík suður hefur nýlega
hafið störf og á hún að koma með tillögu að
lista á kjördæmisþingi, eigi síðar en 25. jan-
úar nk. Uppstillingarnefnd í Reykjavík norð-
ur hefur ekki verið skipuð en samkvæmt upp-
lýsingum Morgunblaðsins er henni ætlað að
skila tillögu til kjördæmisþings eigi síðar en
15. janúar nk. Halldór Ásgrímsson, formaður
Framsóknarflokksins, hefur sem kunnugt er
ákveðið að bjóða sig fram í Reykjavík sem og
Ólafur Örn Haraldsson og Jónína Bjartmarz.
Kjördæmisfélög
frjálslyndra að störfum
Frjálslyndi flokkurinn mun líkt og VG
stilla upp á sína framboðslista. Margrét
Sverrisdóttir, framkvæmdastjóri og vara-
þingmaður flokksins, segir kjördæmisfélögin
komin á fullt í vinnu sinni við að safna til-
lögum að frambjóðendum og setja sig í sam-
band við þá. Margrét segist reikna með að
endanlegir listar verði í síðasta lagi kynntir á
landsþingi flokksins í mars nk. Formaður
flokksins, Sverrir Hermannsson, gefur ekki
kost á sér áfram í Reykjavík en Margrét hef-
ur ákveðið að bjóða sig fram í öðru kjördæm-
inu í borginni. Guðjón A. Kristjánsson mun
væntanlega taka efsta sætið í Norðvestur-
kjördæmi og að sögn Margrétar hefur Grétar
Mar Jónsson, fv. formaður Farmanna- og
fiskimannasambandsins, lýst yfir áhuga á
efsta sæti flokksins í Suðurkjördæmi. Þá hef-
ur Magnús Þór Hafsteinsson fréttamaður
sýnt áhuga á framboði fyrir frjálslynda. Mar-
grét segir ekki ljóst hvort eða hvar af því
verði.
Eitt kjördæmi eftir
hjá Samfylkingunni
Samfylkingin hefur sem kunnugt er lokið
þeim prófkjörum sem ákveðið var að halda og
endanlegir framboðslistar verða kynntir eftir
hálfan mánuð. Kosið verður um tillögu upp-
stillingarnefndar í Norðvesturkjördæmi á
fundi kjördæmisráðs í Hólmavík nk. laug-
ardag, líkt og fram kemur á blaðsíðu 12 í
blaðinu í dag.
Framboð flokkanna að taka á sig mynd fyrir alþingiskosningarnar næsta vor
Prófkjör að baki
en listar víða
ófrágengnir
Uppstillingarnefnd
Sjálfstæðisflokksins í
nýju Suðurkjördæmi
fundaði um helgina
þar sem lögð var fram
tillaga um hverjir
skipa fimm efstu sæti
listans í næstu þing-
kosningum. Hvorki
formenn nefndarinnar
né kjördæmisráðs
hafa viljað tjá sig um
tillöguna en sam-
kvæmt upplýsingum
Morgunblaðsins er
Kristján Pálsson, sem
verið hefur þingmaður
flokksins í Reykjanes-
kjördæmi frá árinu 1995, ekki með-
al fimm efstu manna. Er hann
mjög ósáttur við þá tillögu.
Nefndin hefur gert tillögu um
Árna Ragnar Árnason, þingmann í
Reykjaneskjördæmi, í fyrsta sætið,
Drífu Hjartardóttur, þingmann af
Suðurlandi, í annað sæti, Guðjón
Hjörleifsson, fyrrverandi bæjar-
stjóra í Vestmannaeyjum, í þriðja
sæti, Kjartan Ólafsson, þingmann
af Suðurlandi, í fjórða sæti og
Böðvar Jónsson, bæjarfulltrúa í
Reykjanesbæ, í fimmta sætið.
Ellert J. Eiríksson, formaður
uppstillingarnefndar, vildi hvorki
játa því né neita í samtali við
Morgunblaðið að þetta væri röð
fimm efstu manna. Þetta myndi
allt skýrast á fundi kjördæmisráðs
sem halda ætti í Stapanum í Njarð-
vík næstkomandi laugardag kl. 14.
Þar eiga seturétt á
annað hundrað manns
sem koma til með að
greiða atkvæði um til-
lögu uppstillingar-
nefndar.
„Harkalegar
aðgerðir“
Kristján Pálsson er
mjög ósáttur við til-
lögu nefndarinnar og
hefur boðað til borg-
arafundar í Sjálfstæð-
ishúsinu í Reykja-
nesbæ annað kvöld.
„Mér finnst það
harkalegar aðgerðir
gegn sitjandi þingmanni, að honum
skuli ekki einu sinni vera gefið
tækifæri á listanum. Ég minnist
þess ekki í sögu Sjálfstæðisflokks-
ins að svona aðferðir hafi verið not-
aðar við uppstillingu.
Ég er auðvitað mjög sleginn yfir
því hvernig þetta hefur þróast,“
segir Kristján og bendir á að hann
fengið rúmlega sjö þúsund atkvæði
í prófkjöri fyrir fjórum árum.
Hann vildi að prófkjörsleiðin yrði
farin nú en því var hafnað. Hann
hyggst fara fram á það við uppstill-
ingarnefnd að hún breyti afstöðu
sinni.
Sigurður Valur Ásbjarnarson,
formaður stjórnar kjördæmisráðs,
vildi ekkert tjá sig um framboðs-
málin á meðan uppstillingarnefnd
væri ekki búin að skila frá sér end-
anlegri tillögu til ráðsins.
Gengið frá lista Sjálfstæðisflokksins
í Suðurkjördæmi um næstu helgi
Kristján Pálsson
Kristján Pálsson
ekki á lista upp-
stillingarnefndar