Morgunblaðið - 12.11.2003, Qupperneq 40

40 MIÐVIKUDAGUR 12. NÓVEMBER 2003 MORGUNBLAÐIÐ
BRÉF
TIL BLAÐSINS
Kringlunni 1 103 Reykjavík  Sími 569 1100
 Símbréf 569 1329  Netfang bref@mbl.is
Allt efni sem birtist í Morgunblaðinu og Lesbók er varðveitt í upplýsinga-
safni þess. Morgunblaðið áskilur sér rétt t i l að ráðstafa efninu þaðan, hvort
sem er með endurbirtingu eða á annan hátt. Þeir sem afhenda blaðinu efni
ti l birtingar teljast samþykkja þetta, ef ekki fylgir fyrirvari hér að lútandi.
MIKIL og þung mótmælaalda er ris-
in meðal íbúa Kópavogs og annarra,
sem Fossvogsdalinn byggja, gegn
fyrirhugaðri byggingu átta 14 hæða
stórhýsa í landi Lundar í Kópavogi.
Sá hópur þrjú hundruð manna og
kvenna, sem sótti fund í Snælands-
skóla þriðjudagskvöldið 4. nóvember,
var ekki samblástur harðsvíraðra
vinstri eða grænna, heldur velflestir
fylgisspakir kjósendur þeirra sömu
fulltrúa bæjarstjórnarmeirihlutans
sem hunzuðu tilmæli Áhugamanna
um betri Lund, að mæta á fundinn, þó
ekki væri nema til þess eins að hlýða á
þau gagnmerku erindi, sem fagmenn
á sviði umhverfis-, húsagerðar-,
tækni- og félagsmála fluttu þar.
Með fyrirhugðum bygggingum er
eyðilagt útsýni fyrir talsverðan hluta
Fossvogsbyggðar beggja vegna dals-
ins. Einar Ólafsson arkitekt sýndi á
þriðjudagsfundinum með tölvumynd-
um hversu mikið skuggavarp þessara
stórhýsa yrði, við mismunandi sólar-
hæð og eyktamörk, bæði fyrir nær-
liggjandi byggð og „útivistarsvæði“ á
Lundarlóðinni. Þá er fyrirsjánleg
sveipamyndun þegar andanum hreyf-
ir, en veðursæld þessa dalverpis
þekkjum við bezt, sem þar búum.
Byggingarnar eru í hróplegu ósam-
ræmi við allar þær, sem fyrir eru, og
breyta mjög til hins verra öllu yfir-
bragði og aðkomu svæðisins. Það fer
ekki milli mála að 13-1500 manna
byggð útheimtir hagræðingu í um-
ferðar- og skólamálum, sem enn hef-
ur ekki verið sýnt fram á sannfærandi
lausn á og hlýtur verulega aukin um-
ferð gangandi og akandi að setja
mark sitt á þá byggð sem fyrir er.
Þessi atriði munu óhjákvæmilega
rýra markaðsgildi fasteigna á svæð-
inu og gætu skapað bænum bóta-
ábyrgð upp á tugi milljóna.
En hvernig eru þessi umfangs-
miklu byggingaráform til komin?
Fram hefur komið að Lundur er
erfðafestuland erfingja Geirs Gunn-
laugssonar bónda, sem rak myndarbú
í Lundi á liðinni öld og er erfðafestan
miðuð við sveitabúskap. Ekki hefur
verið rekinn búskapur á þessu svæði
síðasta aldarfjórðunginn, enda væri
Lundur metinn eyðibýli upp til dala.
Spurning vaknar hver sé réttur erfða-
festu við þær aðstæður. Fyrir liggur
úrskurður Héraðsdóms Reykjaness í
hliðstæðu máli. Dómurinn komst að
þeirri niðurstöðu að handhafi erfða-
festu hafi einungis rétt til að byggja
mannvirki, sem tengjast búskap, það
er að segja íbúðarhús, gripahús og
aðrar byggingar er lúta að búskap.
Erfðafestuhafar gætu ekki krafizt
bóta fyrir landið eins og um væri að
ræða land undir íbúðabyggð. Héraðs-
dómur Reykjaness féllst á að við eign-
arnám skyldu einungis greiddar bæt-
ur vegna ræktunar og
búskaparbygginga á svæðinu.
Berum þetta saman við þau hundr-
uð milljóna sem renna að öllum lík-
indum beint í vasa Lundarfjölskyld-
unnar ef af áformum um háhýsin
verður. Spurningum um eignarnám
eða athugun á þeim kosti hefur verið
hafnað af forseta bæjarstjórnar og
bæjarstjóra. Sú afstaða vekur áleitn-
ar spurningar um hvílíkt steinbítstak
erfingjar Lundar hafi á bæjarstjórn
Kópavogs.
Allar samningaviðræður við Lund-
armenn virðast hafa farið fram í skjóli
sumars, þegar sízt var von að íbúar og
einhverjir nefndarmenn væru með
múður. Niðurstaðan kom ekki fyrir
almenningssjónir fyrr en 21. septem-
ber á síðum Morgunblaðsins. Svo er
að sjá að arkitekt á vegum Lundar-
fjölskyldunnar hafi otað fullbúnum
teikningum af byggðinni að bæjar-
stjórn og hún bitið á agnið.
En málið er ekki höfn. Skipulags-
nefnd hefur ekki gengið á íbúa nær-
liggjandi hverfa varðandi grenndar-
könnun, sem þó væri krafizt ef maður
ætlaði að smíða kvist eða bíslag á hús-
ið sitt. Forseti bæjarstjórnar hafði á
fundi með sjálfstæðismönnum hinn
25. október góð orð um „að sjálfsögðu
yrði hlustað á óskir nágranna og
þegnanna yfirleitt“. Eitthvað fannst
manni skorta á sannfæringarmátt
þeirra orða, sem voru þó snöggtum
hógværari en svör bæjarstjóra viku
seinna, sem taldi ekki ástæðu til að
sinna kvabbi eins og stöðluðum mót-
mælalistum, sem væru hvort eð er
komnir til fyrir áeggjan öfgamanna
eða undirróður andstæðinga bæjar-
meirihlutans. Ég mótmæli fram-
komnum skipulagstillögum um byggð
á Lundarsvæðinu og krefst þess að
Kópavogsbær skipuleggi svæðið að
nýju. Stefnt verði að blandaðri byggð,
sem falli betur að því umhverfi, sem
hér er fyrir. Ennfremur áskil ég mér
rétt lögum samkvæmt til að krefja
Kópavogsbæ um bætur vegna þeirrar
rýrnunar á markaðsverði húseignar
minnar, sem leiða kann af hinu nýja
skipulagi.
SIGURGEIR KJARTANSSON,
Víðigrund 59,
Kópavogi.
Hverjir eiga
Kópavog?
Frá Sigurgeiri Kjartanssyni
FALLEG og sterk í hógværð sinni,
fagnaðarrík og opnandi sýn inn í
heim Guðs er greinin hans séra Úlf-
ars á Eyrarbakka í Morgunblaðinu
laugardaginn 8. nóv.
Bara fyrsta setningin er eins og
lausnarorð inn í löngu staðnaða um-
ræðu þar sem vantrúin, efinn og nið-
urrifsandinn höfðu sett áhrifagjarnri
hugsun okkar mannanna stólinn fyr-
ir dyrnar. Framhaldið hjá greinar-
höfundi stendur allt undir þeim
væntingum sem upphafið vekur, og
er þá mikið sagt. „Á allraheilagra-
messu 2003“ eru orð eins sjáandans
enn í langri lærisveinasögu kristn-
innar. Hafi séra Úlfar þökk fyrir, og
mættu sem flestir lesa þessa grein,
læra af henni og taka anda hennar
sér til eftirbreytni.
JÓN VALUR JENSSON,
Sólvallagötu 14,
101 Reykjavík.
Þakkarverð grein sr.
Úlfars Guðmundssonar
Frá Jóni Val Jenssyni