Morgunblaðið - 12.05.2004, Page 53

FÓLK Í FRÉTTUM
MORGUNBLAÐIÐ MIÐVIKUDAGUR 12. MAÍ 2004 53
GUNNLAUGUR Briem sendir
nú frá sér aðra sólóskífu sína en
árið 2001 kom frá honum platan
Earth sem lítið fór
fyrir. Jarðtenging-
in heldur áfram
hér og notast
Gunnlaugur við
nafnið Earth
Affair fyrir þetta
verkefni. Platan
heitir Chapter One og því má gera
því skóna að von sé á framhaldi.
Jarðarmál er fremur hógvær sóló-
diskur því hvergi kemur fram á
plötuumslagi nafn Gunnlaugs. Þeg-
ar gluggað er í textabók sést þó að
öll lögin eru eftir hann og með hon-
um er heill haugur af fólki hvaðan-
æva, allt úrvals fólk á sínu sviði, til
að færa lögin í réttan búning. Má
nefna upptökustjórann Flood sem
hefur starfað með U2 og Depeche
Mode, gregorísku söngvarana Voc-
es Thules og írska sekkjapípuleik-
arann Michael McGoldrick og síð-
ast en ekki síst Morten Harket,
söngvarann góða úr AHA. Það lag
sem Morten syngur, „Gildas Pray-
er“, er reyndar ekki með bestu lög-
unum á diskinum, ekki nógu gríp-
andi poppballaða en flauelsmjúkur
söngur Mortens hefur hana upp á
hærra plan, það er einhver löngun
og ferðaþrá í rödd hans sem hrífur
mann með sér. Ferðalag er rauði
þráðurinn hér, þetta er nútímaleg
heimstónlist sem sækir áhrif frá
skoskri þjóðlagatónlist, seiðandi
takti Arabíu, munkasöng og frakk-
neskri poppfágun, svo eitthvað sé
nefnt. Í flestum lögunum er söngur
ekki í aðalhlutverki, meira sem
stemmningsþáttur eins og dulúðug-
ur gregorískur söngur Voces Thul-
es og loftkenndar bakraddir. Því
hér er meira verið að skapa
hljómalandslag, andrúmsloft sem
gefur hlustandanum rými til að
lesa inn í tónlistina það sem hann
vill. Ljósmyndir á umslagi endur-
spegla þetta, víðátta íslensks sjón-
deildarhrings með grænum norður-
ljósaböndum yfir – það
er ákveðinn hreinleiki
og vídd í hljómnum hér
sem lyftir tónlistinni
upp. Þetta er þægileg
afslöppunartónlist sem
fer á köflum inn á
smart kaffihús þar sem
allt er úr beyki og
burstuðu stáli og djass-
skotin sófatónlist St.
Germain minnir á sig
(„French Touch“) og
sumstaðar kryddmett-
aðar tjaldbúðir hirð-
ingja eins og í
„Tunisia“, verulega
góðu og þéttu lagi sem
er hárrétt blanda af
straumlínulöguðu nútímapoppi,
seiðandi arabískri sveiflu og tyrk-
nesku þjóðlagastefi. Áhugaverðust
eru einmitt þau lög þar sem þessi
þjóðlegu áhrif eru ofin inn í heild-
ina, það gefur annars nokkuð
kunnuglegu trip-hoppi og sveim-
stemmningum meiri kraft en ella.
Nokkur laganna hér má finna í
eldri búningi á fyrri plötu Gunn-
laugs og verður að segja að breyt-
ingin er mikil, því þar er útkoman
andlaus og klisjukennd biðstofu-
tónlist, hér fá laglínurnar að anda,
óþarfa búningi er kastað burt, og
mun meiri kraft og frumleika er að
finna í taktgrunninum. Munka-
söngur og sekkjapípur yfir nútíma-
legum takti er kannski ekkert nýtt,
jafnvel klisja, en það er farið nokk-
uð hóflega með kryddið og sett
saman á smekklegan hátt og
grunnurinn er sterkur; þéttofin
hrynjandi, með áhugaverðum inn-
skotum og hljóðum frá framandi
hljóðfærum, sem leiðir lögin áfram.
Þægilegt hnattferðalag sem endar
fyrsta kaflann hér heima, kannski í
heitum potti undir bylgjandi norð-
urljósum.
Tónlist
Heitur
pottur
Earth Affair
Chapter One

Gunnlaugur Briem forritun, trommur,
hljómborð, raddir o.fl., Eyþór Gunnarsson
píanó, Rhodes o.fl., Michael McGolrick
uilleann-pípur, flautur o.fl., Kevin Arm-
strong gítar, Óskar Guðjónsson sópran-
saxófónn, Phil „Soul“ bassi, Samúel Jón
Samúelsson básúna og blásturs-
útsetning í einu lagi, auk fjölda annarra
listamanna. M.a. syngur Morten Harket í
einu lagi og Voces Thules leggja til greg-
orískar raddir í öðru. Upptökustjórn:
Clive Martin, Sodi, Guy Dennings o.fl.,
hljóðblöndun og vinnsla: G. Briem, Addi
800, Clive Martin & SodiE-Berg, Flood.
Tekið upp í hljóðhúsum víða um heim.
Skip Records gefa út.
Steinunn Haraldsdóttir
Steinunn Haraldsdóttir lýsir nýrri sólóplötu
trymbilsins Gulla Briem sem þægilegu hnatt-
ferðalagi.
Morgunblaðið/Árni Sæberg
GAGNASAFN
MORGUNBLAÐSINS
mbl.is