Fréttablaðið - 31.12.2007, Síða 42

34 31. desember 2007 MÁNUDAGUR
Árið í teiknimyndum
Þeir sem teikna pólitískar teiknimyndir í dagblöð ná oft að lýsa anda viðburðanna betur en bestu fréttaskýrendur. Starfsmenn
New York Times Syndicate útnefndu bestu teiknimyndir ársins, að þeirra mati.
FEBRÚAR Þrátt fyrir vaxandi andstöðu við stríðsreksturinn í Írak og það
jafnvel meðal repúblikana á Bandaríkjaþingi, fór George W. Bush Banda ríkja-
forseti fram á það við þingið í febrúar að fjárframlög vegna stríðsins yrðu
aukin um 93 milljarða dala.
MARS Í lok mars samþykkti öldungadeild Bandaríkjaþings ályktun sem fól í sér fyrirmæli um að hefja
brottflutning herafla frá Írak. Fulltrúadeild þingsins hafði áður samþykkt sams konar ályktun en hvorug
var samþykkt með tilskildum meirihluta til að koma í veg fyrir neitunarvald Bandaríkjaforseta, sem
hann beitti 1. maí. Þetta var hins vegar í fyrsta sinn sem báðar deildir þingsins samþykktu ályktanir
sem miðuðu að því að binda enda á stríðsrekstur í Írak.
APRÍL Hinn 26. apríl tilkynnti Vladimír Pútín forseti Rússlands að Rússar segðu sig frá aðild að sam-
komulagi um takmörkun á uppbyggingu herafla í Evrópu auk vopnaeftirlitssáttmála sem á sínum tíma
var gerður milli NATO og Varsjárbandalagsins. Ástæðan fyrir þessu var áætlanir Bandaríkjamanna um
að koma upp eldflaugavarnakerfi í Austur-Evrópu, en Rússar líta á það sem ögrun við hagsmuni sína á
svæðinu.
JÚNÍ Um miðjan júní náðu Hamas-samtökin völdum á Gaza-svæðinu eftir margra vikna erjur og
átök við liðsmenn Fatah-hreyfingarinnar. Þeir síðarnefndu héldu hins vegar yfirráðum sínum yfir
Vesturbakkanum og þar með var það landsvæði sem Palestínumenn gera tilkall til ekki lengur bara
tvískipt milli Palestínumanna og Ísraela, heldur þrískipt.
JANÚAR Hinn 29. janúar söfnuðust vísindamenn hvaðanæva að til Parísar til að ljúka við fyrstu skýrsl-
una sem loftslagsnefnd Sameinuðu þjóðanna skilar af sér í sex ár. Skýrslan var birt 2. febrúar. Þar var
meðal annars komist að þeirri niðurstöðu að vísbendingar um hlýnun jarðar væru „ótvíræðar“ og að
hitastig á heimskautasvæðunum hækkaði sérlega hratt.
MAÍ Í endaðan maí lokaði lögregla í Venesúela elstu sjónvarpsstöð landsins,
Radio Caracas Television, en margir litu á þetta sem tilraun Hugo Chavez forseta
til að þagga niður í einni af fáum andófsröddum gegn sér í Venesúela. Til mikilla
mótmæla kom í kjölfar aðgerða lögreglunnar.
FRAMHALD Á NÆSTU OPNU