Fréttablaðið - 11.11.2008, Blaðsíða 34
22 11. nóvember 2008 ÞRIÐJUDAGUR
sport@frettabladid.is
Atvinnukylfingurinn Birgir Leifur Hafþórsson úr GKG skipuleggur
nú endurkomu sína til keppni í Evrópumótaröðinni í golfi eftir
að hafa fengið grænt ljós á að hann haldi keppnisrétti sínum
þar, en fyrsta mótið á nýju keppnistímabili fór fram um síðustu
helgi. Birgir Leifur varð sem kunnugt er að hætta keppni í maí
á síðasta keppnistímabili Evrópumótaraðarinnar vegna meiðsla
í baki en hefur nú gengið í gegnum endurhæfingu og er fullur
tilhlökkunar.
„Ég er kominn á fullt í æfingum og hef sett stefnuna á að
hefja keppni í Evrópumótaröðinni á móti í Ástralíu í lok nóv-
ember. Síðan taka við þrjú mót í Suður-Afríku í desember og
janúar. Ég er mjög ánægður með hvernig mér hefur tekist að
vinna úr þessum meiðslum sem voru að plaga mig þannig
að þetta lítur bara vel út,“ segir Birgir Leifur.
„Ég þurfti að gera smá breytingar á álaginu í sveiflunni
hjá mér til þess að vernda þann stað sem ég hef
verið verstur í og ég er mjög ánægður með það. Svo
nýtti ég tímann til þess að taka stutta spilið hjá mér
algjörlega í gegn og það er eitthvað sem ég þurfti að
laga og það á eflaust eftir að skila sér. Það verður gaman
að fara af stað aftur og ég er bara nokkuð bjartsýnn,“
segir Birgir Leifur.
Kaupþing hefur dyggilega styrkt Birgi Leif í
gegnum árin en það samstarf heyrir nú sögunni
til. Kylfingurinn snjalli lætur það þó ekki á sig fá
og ætlar bara að einbeita sér fyrst og fremst að því
að standa sig á golfvellinum.
„Efnahagsástandið á Íslandi og í heiminum öllum
hefur óneitanlega áhrif á það sem maður er að gera og
samstarf mitt við minn aðalstyrktaraðila, Kaupþing, mun
ekki halda áfram að svo stöddu. Ég hef ekkert kannað
jarðveginn hjá Nýja Kaupþingi eða hvernig staðan er þar og
ég held reyndar að það sé ekki rétti tíminn til þess núna.
Þetta er vissulega kostnaðarsamt sport en maður hefur
allavega möguleika á tekjum í þessu og ég ætla bara að
einbeita mér að því að standa mig vel á golfvellinum. Þetta
snýst bara um það.“
BIRGIR LEIFUR HAFÞÓRSSON: HEFUR KEPPNI AÐ NÝJU Í EVRÓPUMÓTARÖÐINNI Í GOLFI EFTIR MEIÐSLI Í BAKI
Breytingar þurfti að gera á álaginu í sveiflunni
FIMLEIKAR Norður-Evrópumótið í
áhaldafimleikum fór fram með
glæsibrag í Versölum um helgina
og til að bæta á ánægju mótshald-
ara vann Viktor Kristmannsson
brons í fjölþraut karla.
„Ég er svo ánægður með þetta
að ég er bara í skýjunum,“ sagði
Viktor í viðtali við Fréttablaðið í
gær. „Ég er líka mjög ánægður
með strákana í liðinu sem stóðu
sig eins og hetjur,“ segir Viktor en
alls komust fjórir aðrir í úrslit á
áhöldum, þar af þrír strákar.
„Það var gaman að keppa hérna
heima því það er svo allt öðruvísi,“
segir Viktor sem keppti fyrir troð-
fullu húsi. „Það hjálpaði rosalega
mikið og það var alveg æðisleg
stemning. Ég var mjög stressaður
því ég vildi standa mig vel á móti
hérna heima.“
Árangur Viktors sem er 24 ára
gamall er hans besti á þessu móti
á ferlinum. „Ég hafði best náð því
að vera í tíunda sæti í samanlögðu
og vera í úrslitum á tveimur áhöld-
um,“ sagði Viktor sem hefur keppt
með landsliðinu síðan hann var
ellefu ára gamall.
„Núna var ég í úrslitum á öllum
áhöldum og lenti í þriðja sæti í
samanlögðu. Þetta er langt
umfram það sem ég stefndi
á,“ segir Viktor sem gat ekki
leynt gleði sinni .
Viktor gat samt auðveld-
lega svekkt sig yfir því að
verðlaunin urðu ekki
fleiri.
„Á svifránni mun-
aði bara 0,1 sem er
bara eins og ég hafi
ekki náð að spenna
eina tá. Á gólfinu
munaði bara 0,05
stigum sem er
ennþá minna,“
segir Viktor í létt-
um tón. Hann rétt
missti líka af verð-
launum á tvíslánni
þar sem hann endaði í
5. sæti „Ég gerði smá
mistök á tvíslánni,
þetta voru mjög lítil mistök hjá
mér en það var svo mikið dregið
frá mér fyrir þessi mistök. Annars
hefði ég mjög líklega verið á palli
þar líka. Smá mistök geta kostað
mann þvílíkt,“ segir Viktor.
„Róbert stóð sig líka rosalega
vel,“ segir Viktor en Róbert náði
að slá honum við í æfingum á
stökki. „Maður þarf aðeins að
bæta sig þar,“ segir Viktor og
keppnisskapið leynir sér ekki. „Ég
gerði nýtt stökk sem ég hafði
aldrei gert á ævi minni,“ sagði
Viktor en hann þurfti að auka erfið-
leikastuðulinn í stökkinu til þess
að eiga möguleika í bestu mennina
á mótinu.
„Ég vissi að strákarnir sem voru
í fyrstu þremur sætunum voru að
gera svo rosalega erfið og góð
stökk. Ég gat ekki gert gamla
stökkið því þó að ég hefði gert það
hundrað prósent þá hefði ég ekki
náð þeim,“ segir Viktor.
Viktor er kominn með nýjan
úkraínskan þjálfara sem hann er
virkilega ánægður með þrátt fyrir
að hann hafi aðeins komið fyrir
tveimur vikum. „Hann keppti
fyrir sovéska landsliðið í gamla
daga og það verður gaman að
sjá hversu miklu hann nær
að bæta við hjá okkur,“
segir Viktor sem ætlar sér
enn lengra í fimleikunum.
Næsta mót er ekki fyrr en
í byrjun mars en á næsta ári
stefnir Viktor á að keppa á
Evrópumótinu í Mílanó
í vor, á Smáþjóðaleik-
unum á Kýpur í
sumar og síðan á
heimsmeistaramót-
inu í London næsta
haust. „Nú ætla ég
bara að reyna að
bæta mig pínulít-
ið á öllum áhöld-
um þannig að ég
nái fyrsta sætinu
næst,“ segir Viktor
að lokum.
ooj@frettabladid.is
Ætlaði að standa sig á heimavelli
Viktor Kristmannsson er í skýjunum með frábæran árangur á Norður-Evrópumótinu í fimleikum sem var
haldið í Versölum um helgina. Viktor fékk brons í fjölþrautinni og komst í úrslit á öllum áhöldunum sex.
ÍSLENDINGAR Í ÚRSLITUM
Á NORÐUR-EVRÓPUMÓTINU
Viktor Kristmannsson, Gerplu
3. sæti í fjölþraut
4. sæti á gólfi á svifrá
5. sæti á tvíslá og á bogahesti
7. sæti í hringjum og í stökki
Róbert Kristmannsson, Gerplu
5. sæti á gólfi
6. sæti í stökki
Bjarki Ásgeirsson, Ármanni
6. sæti á bogahesti
Embla Jóhannesdóttir, Gróttu
7. sæti á jafnvægisslá
Ingvar Ágúst Jochumsson, Gerplu
8. sæti á tvíslá
Thelma Rut Hermannsdóttir, Gerplu
9. sæti í fjölþraut
Á SVIFRÁNNI Það mun-
aði bara einni beygðri
tá, eins og Viktor
Kristmannsson komst
sjálfur að orði, að hann
næði bronsverðlaunum
á svifránni á Norður-Evr-
ópumótinu um helgina.
FRÉTTABLAÐIÐ/STEFÁN
FRJÁLSAR Fjórir íslenskir frjáls-
íþróttamenn komast inn á lista
yfir hundrað bestu afrek ársins í
hverri grein fyrir sig en þetta
kom fram á heimasíðu Frjáls-
íþróttasambandsins. Þetta eru
Ármenningurinn Ásdís Hjálms-
dóttir og FH-ingarnir Bergur Ingi
Pétursson, Þórey Edda Elísdóttir
og Óðinn Björn Þorsteinsson en
þrjú þau fyrstnefndu tóku þátt í
Ólympíuleikunum í Peking.
Ásdís Hjálmsdóttir, spjótkast-
ari úr Ármanni, er í 36. sæti á
heimslistanum með Íslandsmetið
sem hún setti í Lapinlahti í Finn-
landi 29. júlí. Ásdís kastaði þá
59,80 metra sem er annar besti
árangurinn á Norðurlöndunum á
árinu. Aðeins Finninn Mikaela
Ingberg náði að kasta lengra
en hún er í 22. sæti á heims-
listanum með kast upp á
61,59 metra.
Bergur Ingi Pétursson,
sleggjukastari úr FH, er í
61. sæti heimslistans með
Íslandsmetið sem hann setti
í Hafnarfirði 25. maí.
Bergur Ingi kastaði
þá 74,48 metra
en hann bætti
Íslandsmetið
þá í þriðja
sinn á
árinu.
Aðeins tveir Norðurlandabúar
náðu að kasta sleggjunni lengra
en Bergur á árinu en það
eru Finnarnir Ole-Pekka
Karjalainen (79,59 m, 18.
sæti) og David Söderberg
(75,82 m, 49. sæti).
Þórey Edda Elísdóttir,
stangarstökkvari úr FH,
er í 65.-78. sæti heimslist-
ans með 4,30 metra en
hún hefur ákveðið að
leggja afreksskóna á hilluna.
Þórey Edda náði sínum besta
árangri á Bikarkeppni FRÍ í Kópa-
vogi 5. júlí. Þórey Edda er aðeins
einum sentimetra frá því að ná
besta árangrinum á Norðurlönd-
unum en finnska stúlkan Vanessa
Vandy stökk yfir 4,31 metra á
þessu ári.
Óðinn Björn Þorsteinsson, kúlu-
varpari úr FH, er síðan í 97. sæti
listans með kast upp á 19,20 metra
frá því í Hafnarfirði 10. júní. Þetta
er fimmti besti árangurinn á
Norðurlöndunum í ár en Finninn
Robert Häggblom er með besta
árangur á Norðurlöndum á þessu
ári með 20,06 metra kast. - óój
Ásdís Hjálmsdóttir komst hæst Íslendinga á lista yfir bestu afrek ársins 2008 í frjálsum íþróttum:
Fjögur komust inn á heimslistann í ár
Í 36. SÆTI Ásdís
Hjálmsdóttir
kastaði langt á
árinu. FRÉTTABLAÐ-
IÐ/VILHELM
> Grétar Rafn í liði vikunnar
Landsliðsmaðurinn Grétar Rafn Steinsson var í gær
valinn í lið vikunnar á heimasíðu Setanta Sports fyrir
frammistöðu sína í 0-1 sigurleik Bolton gegn Hull um
helgina. „Frábær leikmaður er hér á ferðinni. Þrátt fyrir
að hann sé líkari eggi en fótboltamanni
þá brotnar hann aldrei undan pressu.
Þetta var enn einn leikurinn þar sem
hann skilar frábærri frammistöðu og
knattspyrnustjórinn Gary Megson
hlýtur að krossleggja fingur í
von um að stóru félögin reyni
ekki að fá hann til sín,“ segir í
umsögninni um Grétar.
FÓTBOLTI Khaldoon Al Mubarak,
stjórnarformaður Manchester
City, ítrekaði í gær að staða Mark
Hughes sem knattspyrnustjóra
félagsins væri ekki í hættu, en
sögusagnir þess efnis að Hughes
yrði rekinn fóru sem eldur um
sinu í breskum fjölmiðlum í gær.
„Stjórn City ber virðingu fyrir
Hughes og persónulega hef ég
mikla trú á honum. Ég hef ekki
lesið þessar blaðagreinar en þetta
er alltént algjör skáldskapur og
tómt rugl,“ segir Al Mubarak
meðal annars á opinberri
heimasíðu City. - óþ
Stjórnarformaður Man. City:
Hughes er enn
öruggur í starfi
ÖRUGGUR Stjórnarformaður City segir
stöðu Hughes örugga. NORDIC PHOTOS/GETTY
FÓTBOLTI Frank Lampard, miðju-
maður Chelsea, nýtti tækifærið í
viðtali við Evening Standard í
gær til þess að skjóta létt á
Manchester United en Chelsea er
komið með átta stiga forskot á
United eftir leiki helgarinnar.
„Við erum komnir með gott
forskot á United og það er
ánægjulegt þar sem síðustu tvö
ár höfum við lent í því að elta þá.
Það er ekki auðvelt að standa í
því að elta vegna þess að þá
máttu ekki tapa leik,“ segir
Lampard. - óþ
Frank Lampard, Chelsea:
Man. Utd má
nú ekki við tapi
STRÍÐINN Frank Lampard skýtur á
Manchester United. NORDIC PHOTOS/GETTY
FÓTBOLTI Samkvæmt heimildum
fréttastofunnar Sky Sports er
Alexandre Gaydamak, eigandi
Portsmouth, í viðræðum við
suðurafríska viðskiptajöfra um
kaup á úrvalsdeildarfélaginu.
Samkvæmt breskum fjölmiðlum
gæti tími Tony Adams í starfi
knattspyrnustjóra hjá félaginu
enn fremur orðið stuttur. Nöfn á
borð við Slaven Bilic og Avram
Grant hafa verið nefnd í umræð-
unni, ef af yfirtökunni verður. - óþ
Sky Sports um Portsmouth:
Eigendaskipti
fram undan?