Morgunblaðið - 24.12.2007, Blaðsíða 38

38 MÁNUDAGUR 24. DESEMBER 2007 MORGUNBLAÐIÐ
Einar Sigurðsson.
Styrmir Gunnarsson.
Forstjóri:
Ritstjóri:
STOFNAÐ 1913
Útgefandi: Árvakur hf., Reykjavík.
Aðstoðarritstjóri:
Karl Blöndal.
Fréttaritstjóri:
Björn Vignir Sigurpálsson.
JÓLIN GETA EKKI MISTEKIST
Nú eru jólin. Aðfangadags-kvöld er þýðingarmikið ílífi flestra Íslendinga. Þá er
jólaguðspjallið lesið um fæðingu
frelsarans, þess guðs sem skapar
og sískapar, fyrirgefur og leiðir.
Fæðing er fallegt orð yfir gleði-
ríkan viðburð. Hvergi er hreinleik-
inn meiri og sakleysið. Svo mikil
gleði fylgir fæðingunni og boðskap-
urinn á alltaf erindi við okkur, fæð-
ing kærleikans inn í heim breysk-
leikans, þar sem væntumþykju og
fyrirgefningar er þörf.
Við minnumst fæðingar Krists á
aðfangadagskvöld og veltum fyrir
okkur því erindi sem frelsarinn á
við mannkynið, tökum afstöðu til
þess hvert og eitt í eigin lífi. Vit-
anlega eru ekki allir jafntrúaðir, en
öll getum við þó dregið lærdóm af
orðum Krists og því kærleiksríka
hugarfari sem hann boðaði.
Í kvöld og næstu daga gefst ráð-
rúm til slíkrar yfirvegunar.
„Ég er eins og nirfill. Ég safna
jólum. Ég má ekki við því að nein
þeirra mistakist.“ Þessi orð komu
fyrir í leikriti sem Guðrún Ás-
mundsdóttir skrifaði fyrir tuttugu
árum og byggt var á ræðum danska
skáldprestsins Kaj Munk.
Orðin hljómuðu inní hennar
hjarta. Svo velti hún fyrir sér hvað
gæti orðið til þess að jól mistækj-
ust. Framan af ævi hélt hún
kannski að sextán sortir af smákök-
um fyrirbyggðu það. En með meiri
þroska áttaði hún sig á því að jól
geta ekki mistekist – svo sterkur er
boðskapur kristinnar trúar í lát-
leysi sínu: Guð kemur til okkar sem
lítið barn sem hann felur okkur að
annast og vera góð við.
Það er kærkomið fyrir fjölskyld-
ur og ástvini að fá tækifæri til að
eiga samverustund, borða góðan
mat og deila gjöfum. Þá stund eig-
um við með okkar nánustu, treyst-
um böndin sem þurfa að halda þeg-
ar á reynir.
Áttræður maður sagði um sig og
konuna sína: „Ég held við höfum
aldrei verið ástfangnari en í ellinni,
af því að við þurfum svo á hvort
öðru að halda.“ Öll verðum við að
axla byrðar lífsins og gerum það
með okkar hætti. „Það hefur nú allt
heldur tilhneigingu til þess að fara
vel,“ sagði Jóhann Hannesson trú-
boði, prestur og prófessor á fundi
þegar honum fannst svartsýnin
fullmikil.
Við skulum njóta kvöldsins. Og
enginn skyldi láta friðhelgi jólanna
framhjá sér fara. Við öðlumst innri
ró og frið, sem er sama eðlis og
kyrrðin sem skapast á upplýstum
strætum og torgum í kvöld þegar
enginn er lengur á ferli og allir una
við sitt í heimahúsum. Jafnvel úti-
gangsfólk fær inni á heimilum á að-
fangadagskvöld. Þá á engum að
vera úthýst.
Stemmningin er mikil sem fylgir
aðfangadegi. Kirkjurnar eru yfir-
fullar bæði við aftansöng og mið-
næturmessu. Þátttaka almennings
kemur þar fram. Fólk sem annars
er feimið og lætur lítið á sér bera,
það syngur fullum hálsi við athafn-
irnar. Og gleymir sorgum og þraut-
um. Lífið getur verið erfið glíma.
„Svo kemur drottinn og bjargar
manni,“ sagði séra Árni Þórarins-
son.
Þegar hann hætti að taka í nefið
88 ára gamall, eftir að hafa tóbakað
sig frá unglingsárum, ráðlagði Árni
Pétursson læknir honum að leggja
ekki þann sið af – það yki á
blinduna að breyta um of um lífs-
stíl.
„Heldurðu að ég fari að þínum
ráðum með þetta,“ sagði séra Árni
brosandi. „Ég vil ekki koma fram
fyrir guði almáttugum með nautn.“
Og hann lagði það á sig að verða
staurblindur.
Það er nokkuð sem fólk hlýtur að
leiða hugann að – hvaða augum það
lítur lífsgönguna á hinstu stund. Ef
til vill er einn tilgangur lífsins að
búa í haginn fyrir þá stund; að geta
dáið drottni sínum sáttur við sjálf-
an sig og lífshlaupið. Um það sann-
færðist Skröggur í Jólaævintýri
Dickens – og lesendur með honum.
Aðfangadagskvöld er ekki síst
stund barnanna. Þá hafa fullorðnir
tíma til að ræða við börnin sín. Það
finnst þeim gaman. Og má brosa að
því að oft vaknar þörfin fyrir það
þegar þau eiga að fara að sofa.
Álitaefnin sem upp koma eru af öllu
tagi. Sex ára stúlka gengur út frá
því sem vísu að jólasveinar búi til
allar gjafir sjálfir. Þess vegna
finnst henni skrítið þegar hún fær
mandarínu í skóinn. „Jólasveinar
geta ekki búið til mandarínur,“
segir hún tortryggin. „Það er alltof
kalt á norðurpólnum.“
Og auðvitað má boðskapurinn
ekki gleymast. Það er gömul saga
og ný að eldra fólk hristir oft höf-
uðið yfir yngri kynslóðum. Fólk
sem óx úr grasi í upphafi tutt-
ugustu aldar á erfitt með að skilja
kapphlaupið og æðibunuganginn í
þjóðfélagi allsnægtanna. Og nefnir
gjarnan að það hafi nú bara leikið
sér með legg og skel.
Þannig hefur gamall maður
áhyggjur af því að börn séu stöðugt
að þiggja og kunni ekki annað.
Hann hristir höfuðið, eins og til-
heyrir, og segir að þau verði líka að
læra að gefa. Þegar hann ól upp sín
börn, þá söfnuðu þau gjöfunum sem
þau fengu í skóinn og gáfu svo.
En kannski eru slíkar áhyggjur
óþarfar, því börn eru kærleiksrík
og hafa mikla réttlætiskennd. Þau
hafa mikið að gefa, safna leikföng-
um í skókassa í skólanum til að
senda fátækum börnum í útlöndum
og læra með því flókið orð eins og
Úkraína. Svo selja þau dúkkur og
leikföng við Melabúðina eða Nes-
veginn til styrktar góðu málefni.
Það er í hinu smáa sem stórtíðindin
verða.
„Þetta er svoddan undur,“ sagði
gamli maðurinn. „Að fólk geti búið
sér til svona dásamlega helgi eins
og jólin gefa okkur – ef við getum
meðtekið eins og eðlilegt óskaddað
fólk.“
Morgunblaðið óskar lesendum
sínum og landsmönnum öllum
gleðilegra jóla.
Hægt er að lýsa skoðun á ritstjórnargreinum Morgunblaðsins á slóðinni http://morgunbladid.blog.is/
NÆTUR margra barna hafa verið
svefnlitlar síðustu daga, því spenning-
urinn og tilhlökkunin er allsráðandi
fyrir jólin. Nú er stóri dagurinn loksins
runninn upp og biðinni eftir því að
kveikt verði á jólatrénu og pappírinn sé
tekin utan af gjöfunum að verða lokið.
Til þess að stytta biðina standa skól-
arnir fyrir jólatrésskemmtunum fyrir
börnin þegar jólafríið er um það bil að
hefjast. Ljósmyndarar á vegum Morg-
unblaðsins litu inn á nokkrum þeirra og
tóku létt dansspor í kringum jólatréð á
milli þess sem þeir festu gleðina á
filmu.
Jólin, jólin
alls staðar
Helgileikur Um fjörutíu krakkar úr Eyjum tóku þátt í helgi
G
Morgunblaðið/Kristinn
Melaskóli Krakkarnir í Melaskóla stunda nám í einni af fallegustu byggingunum í Reykjavík. Forsal-
urinn hentar prýðilega til jólatrésskemmtana þar sem hægt er að koma fyrir myndarlegu jólatré.
Morgunblaðið/Golli
Andakt Þetta augnaráð fá engir nema jólasveinar. Aðdáunin skein úr andlitum barnanna á leik-
skólanum Nóaborg þegar jólasveinarnir komu í heimsókn og fengu óskerta athygli barnanna.
Morgunblaðið/Golli
Kveðjustund Á endanum þurftu jólasveinarnir að kveðja börnin á Nóaborg, enda biðu þeirra ótal
krakkar um allt land. Þeir snúa örugglega aftur á næsta ári eftir hlýjar móttökur hjá krökkunum.