Sameiningin - 01.09.1952, Side 17

Sameiningin
63
sitt í ljósi 53. kapítulans hjá Jesaja, ljóðsins um þjáningu
hins réttláta þjóns Jahve og friðþægingu hans. Þannig
standa meginstoðir kristinnar trúar rótum í Gamla testa-
mentinu, og til þess að skilja þær verðum vér að líta yfir
liðna sögu.
Nú er í trúarritunum, sem fundust ásamt Jesajastrang-
anum, minnst á einhvern Meistara Réttlætisins eða Hinn
Réttláta Meistara. Hann virðist vera liðinn leiðtogi hreyf-
ingarinnar og hafi liðið píslarvætti. í kringum dauða hans
hafa skapazt Messíashugmyndir, flokkurinn virðist skoða
hann sem Messías, enda þótt hann væri ekki sigrandi
Messías heldur hafi verið tekinn af lífi.
Þetta mál hefir enn verið lítt kannað og er hvergi
nærri tímabært að gera sér nokkrar hugmyndir um það,
hvað sú könnun muni leiða í ljós. En það er vitaskuld ó-
metanlegt til fróðleiks, að nú skuli gefast ný innsýn inn í
trúarheim aldarinnar fyrir Krists burð, sem líkleg er til
þess að varpa nýju ljósi á margar þær trúarhugmyndir, sem
oss eru fjarlægastar og torskildastar.
Nú eru liðin tæp fjögur ár síðan vísindamenn komust
fyrst yfir þennan merka fund. Samt er málið enn á því stigi,
að segja verður, að rannsóknir séu rétt að hefjast. Sérfræð-
ingar um heim allan vinna að rannsóknum handritanna
jafnóðum og þau eru gefin út. Það er ekkert efamál, að
handritafundurinn við Dauðahaíið verður þungamiðja um-
ræðna og kannana guðfræðinga og fornfræðinga mörg kom-
andi ár. Fyrstu bækurnar eru að koma út, sem gefa yfirlit
um fundinn og þýðingu hans. Dupont-Sommer prófessor
við Sorbonne í París hefir gefið út litla en ágæta bók um
handritin, sem gefur mjög glögga lýsingu á fundinum og
sögu þess tíma, er þau eru runnin frá. Hún mun um þessar
mundir vera að koma út í enskri þýðingu og er titill ensku
útgáfunnar “The Dead Sea Scrolls”. Vísa ég öllum, er vilja
kynna sér þetta nánar, á þessa bók.
Varpaðu öllum þínum áhyggjum á Drottinn, þá hefir
þú meiri tíma til að hjálpa öðrum.
Guð gefur fyrirheit, og trúin grípur það, vonin gleðst
af því og þolinmæðin bíður róleg eftir því.