Fréttablaðið - 23.03.2011, Blaðsíða 28
23. MARS 2011 MIÐVIKUDAGUR12 ● fréttablaðið ● fermingar
Í hverjum fermingarhópi eru börn
sem ekki hafa tekið skírn. Þau
þurfa hins vegar að skírast áður
en hægt er að ferma þau og er afar
persónubundið hvernig sú athöfn
fer fram. Í Dómkirkjunni er al-
gengt að þessi börn taki skírn í
svokallaðri kvöldkirkju sem er
opin alla fimmtudaga, árið um
kring.
„Í kvöldkirkjunni eru ljósin
dempuð og fólki gefst kostur á að
kveikja á kertum. Þá eru fyrir-
bænir og kvöldbæn. Þeir sem
vilja taka skírn mæta með fjöl-
skyldu sinni og fer athöfnin fram
á milli bæna. Þessar skírnir fara
oft fram snemma á vormánuðum
áður en fermingarnar taka við,“
segir Anna Sigríður Pálsdóttir
Dómkirkjuprestur.
Hún segir ýmsa velja að láta
skíra sig heima, í messu eða
við annað tækifæri en skírnir
í kvöldkirkjunni séu vinsælar
enda umgjörðin falleg og nota-
leg stemning. „Fjölskyldan safn-
ast þá í kringum skírnarfont-
inn og eru jafnvel dæmi um að
yngri systkini fermingarbarns-
ins, sem þó eru komin til vits og
ára, ákveði að láta skíra sig í leið-
inni og ég hef meira að segja skírt
heilu systkinahópana.“
Fermingarbörn taka
skírn í kvöldkirkju
Á skírnarfontinum í Dómkirkjunni, sem er eftir Bertel Thorvaldsen, má sjá Jóhannes
skírara skíra Jesú. Við hann taka stálpuð tilvonandi fermingarbörn gjarnan skírn og
oftar en ekki fer athöfnin fram í svokallaðri kvöldkirkju. FRÉTTABLAÐIÐ/STEFÁN
Deilur fráskilinna foreldra
skyldu ætíð látnar lönd og
leið á fermingardegi barna og
gleði fá í staðinn stærstan sess.
„Aðeins einn dagur í ævi barns heit-
ir fermingardagur. Því þurfa for-
eldrar að hafa hagsmuni barns síns
að leiðarljósi og setja eigin ágrein-
ing til hliðar, sé hann til staðar. Við
getum haldið mörg jól og farið í
mörg sumarfrí, en hvaða sögu vilj-
um við að barn okkar segi af ferm-
ingardegi sínum? Minningarnar
munu lifa og því skal hafa í huga að
deilur foreldra bitna mest á börn-
unum,“ segir Valgerður Halldórs-
dóttir, félagsráðgjafi og formaður
Félags stjúpfjölskyldna, spurð um
heillaráð til handa foreldrum barna
sem eiga tvö heimili.
„Stundum er í góðu lagi að halda
tvær fermingarveislur, sé sam-
komulag um það, en æskilegt er að
foreldrar geti staðið saman á þess-
um degi í lífi barnsins. Foreldrar
þurfa að vera börnum sínum góð
fyrirmynd því deilur fylgja kynslóð
eftir kynslóð, og því þroskamerki
að geta brotið odd af oflæti sínu
til að ná samkomulagi um að halda
skemmtilegt boð,“ segir Valgerður
og útskýrir að foreldrum beri einn-
ig að hugsa til framtíðar því börn
þeirra eigi eftir að gifta sig og eign-
ast fjölskyldu.
„Ætla þeir þá ekki að mæta í
brúðkaup barna sinna eða skírn
barnabarna af því fyrrverandi
maki verður þar líka? Hversu lengi
ætla þeir að láta börn sín líða fyrir
ágreininginn? Stundum þarf að
setja punkt og vinna úr samskipta-
vandanum ef ekki á að smita kom-
andi kynslóðir, og ef við treystum
okkur ekki til að haga okkur eins
og manneskjur í einn dag þurfum
við að endurskoða margt í sjálfum
okkur,“ segir Valgerður, sem ráð-
leggur fólki að setja sig í spor hins
aðilans þegar leysa á deilur.
„Gæta þarf þess að vera ekki
eigingjarn þegar ákveða á hverj-
um og hversu mörgum á að bjóða.
Ef fólk upplifir ákveðna sam-
keppni er skynsamlegt að nýi mak-
inn sýni foreldrunum stuðning og
gefi þeim það pláss sem þau þurfa,
því fleiri tækifæri munu gefast
síðar á lífsleiðinni til að sýna vel-
vilja og stuðning,“ segir Valgerður
og leggur einnig áherslu á samráð
um fermingargjafir. „Fermingar-
gjafir eru eign barnsins sem það á
að geta tekið milli heimila að vild,
sem og fermingarföt sín og fleira,“
segir Valgerður, sem bendir á þriðja
aðila, eins og vin, skynsaman fjöl-
skyldumeðlim eða félagsráðgjafa,
ef samráð gengur illa.
„Ferming er einstakur atburður
og góð skilaboð til barns ef foreldr-
ar geta gefið barninu gjöf saman.
Auðvitað mega stjúpforeldrar vera
með í gjöfinni, en líka er gott að
þeir gefi sér gjöf og skapi sér þann-
ig sérstöðu. Í sameiginlegri gjöf fel-
ast skilaboð um að mamma og pabbi
séu tilbúin að standa með barni sínu
þegar þarf á að halda; alveg sama
hvernig hjónabandi þeirra var hátt-
að. Börnum er nauðsynlegt að finna
þetta bakland, því baklandið gliðn-
ar oft með tilkomu stjúpfjölskyldna,
jafnvel þótt fjölskyldumeðlimum
fjölgi.“ - þlg
Bara einn fermingardagur
Valgerður Halldórsdóttir er framkvæmdastjóri Félagsráðgjafafélags Íslands. Hún segir mikilvægt að virða óskir fermingarbarna,
en geti fólk ómögulega verið undir sama þaki sé stundum skynsamlegt að halda tvær veislur, enda sé andrúmsloftið þá síður
óþægilegt og streitufullt fyrir fermingarbarnið. FRÉTTABLAÐIÐ/VALLI
„Ef við treystum okkur
ekki til að haga okkur
eins og manneskjur í
einn dag þurfum við að
endurskoða margt í sjálf-
um okkur.“