Fréttablaðið - 30.08.2011, Blaðsíða 10

30. ágúst 2011 ÞRIÐJUDAGUR10
JAPAN, AP Japanska þingið sam-
þykkti í gær að Yoshihiko Noda,
fjármálaráðherra í ríkisstjórn
Naoto Kan, tæki við af Kan sem
forsætisráðherra. Kan sagði af
sér á föstudaginn eftir að hafa
sætt harðri gagnrýni fyrir að hafa
ekki tekið nógu vel á afleiðingum
náttúruhamfaranna í vor.
Vandamálin sem Noda tekur í
arf frá Kan eru ekki af smærra
taginu. Fyrir utan eyðilegginguna
sem jarðskjálftinn í mars og flóðið
mikla skildu eftir sig sliga miklar
og vaxandi ríkisskuldir efnahag
landsins. Mikil óánægja er meðal
almennings með stjórn landsins og
stjórnmálamenn almennt.
Lýðræðisflokkurinn, sem fer
með stjórn landsins, hefur átt erf-
itt með að koma málum í gegn-
um þingið þrátt fyrir meirihluta í
neðri deild, því stjórnarandstaðan
er með meirihluta í efri deildinni
þar sem hún getur stöðvað eða tor-
veldað framgang mála. Þar á ofan
eru harðvítugar innbyrðis deilur
í Lýðræðisflokknum, sem hefur
þar af leiðandi átt erfitt með að ná
einingu um stefnu í mikilvægum
málum.
Enn er gríðarmikið verk óunnið
við hreinsun og uppbyggingu á
flóðasvæðunum í norðvestan-
verðu landinu. Um hundrað þús-
und manns hafa ekki komist heim
til sín vegna geislamengunar frá
kjarnorkuverinu í Fukushima, auk
þess sem orkuframleiðsla í landinu
er illa löskuð eftir að kjarnorku-
verið þar var tekið úr notkun.
Sem fjármálaráðherra hefur
Noda reynslu af því að glíma við
fjárhagsvanda ríkisins en þarf nú
að takast á við innanflokksvanda
Lýðræðisflokksins og reyna að
efla trú almennings á stjórnmál-
in, sem hefur komist í nýjar lægðir
eftir að almenningur hefur horft
upp á ráðleysi stjórnvalda gagn-
vart náttúruhamförunum í vor.
Noda aðhyllist aðhaldssemi
í ríkisfjármálum og nýtur vin-
sælda meðal stórlaxa í viðskipta-
lífinu en þykir skorta persónu-
töfra og ákveðni. Hann verður
sjötti forsætisráðherra landsins á
fimm árum, enda áttu stjórnvöld
í mestu erfiðleikum með langvar-
andi stöðnun í efnahagsmálum
áður en áfallið reið yfir í vor.
Noda var í gær kosinn leið-
togi Lýðræðisflokksins með 215
atkvæðum eftir að Naoto Kan
sagði af sér fyrir helgina. Noda
tekur því formlega við sem for-
sætisráðherra á næstu dögum.
gudsteinn@frettabladid.is
Tekur við ógrynni
vandamála af Kan
Yoshihiko Noda verður sjötti forsætisráðherra Japans á sex árum. Hann er
flokksbróðir og fyrrverandi fjármálaráðherra í ríkisstjórn forvera síns, Naoto
Kan. Fáir spá honum langlífi í embætti, enda helstu verkefnin illviðráðanleg.
YOSHIHIKO NODA Nýr leiðtogi Lýðræðisflokksins og verðandi forsætisráðherra
hneigir sig á flokksþingi. FRÉTTABLAÐIÐ/AP
DANMÖRK Hópur Dana vonast til
þess að geta hjálpað sjóræningjum
í Sómalíu að segja skilið við glæpa-
starfið og leggja fyrir sig fiskveið-
ar á ný, en margir þeirra eru sjó-
menn sem enga atvinnu hafa og
stunda því sjórán.
Danirnir ætla, í samvinnu við
stjórnvöld og hjálparstofnanir,
að kaupa eða leigja færeyska eða
grænlenska togara til að veiða á
miðum úti af strönd Sómalíu. Frá
þessu er skýrt á vefsíðum danska
dagblaðsins Politiken.
Undanfarin ár, meðan sjórán
hafa fælt fiskiskip annarra þjóða
frá miðunum úti af Sómalíu, hafa
fiskistofnarnir fengið frið til að
stækka. Hugmyndin er sú að fara
með stóra verksmiðjutogara á
þessar slóðir og fara þar að dæmi
Grænlendinga og bjóða heima-
mönnum að sigla upp að togurun-
um og kaupa þar af þeim fisk sem
þeir hafa veitt á eigin bátum.
Það er danskur blaðamaður,
Jakob Johannsen, sem er frum-
kvöðull þessarar tilraunar. Hann
hefur áður starfað með hjálpar-
stofnunum á borð við Barnaheill
og Lækna án landamæra.
„Hugmyndin er sú að sjómenn
á staðnum, sem taka þátt í verk-
efninu, fái borgað svo mikið
reiðufé fyrir útflutninginn að þeir
kjósi að vera sjómenn frekar en
sjóræningjar,“ segir Johannsen.
- gb
Danir hyggjast sigla með gamla verksmiðjutogara á miðin úti af Sómalíu:
Ætla að fá sjóræningja til að veiða
SÓMALSKIR SJÓRÆNINGJAR Fiskistofnar úti af ströndum Sómalíu hafa dafnað í skjóli
sjórána síðustu árin. NORDICPHOTOS/AFP
GERIR GUÐ ÚR PAPPÍRSMÁLUM
Indverski listamaðurinn K. Surya
Prakash leggur lokahönd á styttu af
hindúaguðinum Ganesh, sem hann
hefur búið til úr pappírsmálum.
NORDICPHOTOS/AFP
Allra síðustu sætin 10. september
í 10 nætur
Frá kr. 88.400
Costa del Sol
Aguamarina ★★★
Kr. 88.400
Netverð á mann, m.v. 2 fullorðna og 2 börn, 2-11 ára, í íbúð
10 nætur. Verð m.v. gistingu í tvíbýli kr. 99.900.
Heimsferðir bjóða frábæra 10 nátta ferð til Costa del Sol þann 10.
september. Í boði er einstakt sértilboð á Aguamarina íbúðahótelinu.
Gríptu þetta tækifæri og skelltu þér í frábæra ferð til Costa del
Sol og njóttu lífsins á hreint ótrúlegum kjörum.
Einnig önnur sértilboð í boði.
Ath. mjög takmarkaður fjöldi íbúða - verð getur hækkað án
fyrirvara.
Allt sem þú þarft
Þú færð Fréttablaðið
á kostnaðarverði á 120 stöðum
um land allt. Nánari upplýsingar
á visir.is/dreifing
DANMÖRK Bandalag Íhaldsflokksins og Róttæka
flokksins, tveggja danskra stjórnmálaflokka
af sitthvorum væng stjórnmálanna, hefur haft
óvænt áhrif á kosningabaráttuna þar í landi.
Lars Barfoed, leiðtogi Íhaldsflokksins, og
Margrethe Vestager, leiðtogi Róttækra, hafa
lofað hvort öðru því að ganga ekki til stjórnar-
samstarfs nema báðir flokkarnir verði með í
stjórn.
Þar með hafa þau í reynd útilokað að Danski
þjóðarflokkurinn, sem leggur alla áherslu á að
takmarka möguleika útlendinga í Danmörku,
geti haft áhrif á stjórnarstefnuna, eins og hann
hefur gert undanfarin ár með því að styðja
minnihlutastjórn Íhaldsflokksins og frjálslynda
Venstre-flokksins.
Nú strax eru áhrifamiklir einstaklingar
innan Venstre byrjaðir að hvetja til þess
að Venstre gangi til liðs við bandalag
Íhaldsflokksins og Róttækra.
Vinstriblokkin í Danmörku, sem inniheldur
Róttæka flokkinn, er þó enn með gott forskot á
hægriblokkina samkvæmt skoðanakönnunum.
Lars Løkke Rasmussen forsætisráðherra, sem
er leiðtogi Venstre, ákvað fyrir helgi að boða til
þingkosninga 15. september næstkomandi þrátt
fyrir slæma stöðu hægriflokkanna. - gb
Rúmar tvær vikur eru þar til þingkosningar fara fram í Danmörku:
Útlendingastefna mætir aukinni andstöðu
LEIÐTOGAR STÆRSTU FYLKINGANNA Helle Thorning-
Schmidt, leiðtogi sósíaldemókrata, og Lars Løkke
Rasmussen forsætisráðherra að loknum sjónvarps-
umræðum um helgina. NORDICPHOTOS/AFP