Bankablaðið - 01.12.1986, Side 7

7
ER JAFNRÉTTI í ÞÍNUM BANKA?
Ef svo er ekki hvað er þá til úrbóta
í þeim athugunum sem gerðar hafa verið að undanförnu hefur komið í ljós að
menn líta jafnréttismál mjög misjöfnum augum. Við höfum fengið nokkra félaga
SÍB til að velta fyrir sér þessum málum og við spurðum: Er jafnrétti í þínum
banka?
ÓlöfÞ. Haraldsdóttir:
Margs konar misrétti viðgengst í
bankanum. Launamisrétti milli karla
og kvenna er duldara en áður. Ýmsar
aukagreiðslur eru inntar af hendi, sem
ekki er talað um. Allar þessar sposlur
veikja siðferðis- og baráttuþrekið. Enn
erfiðara er fyrir konur að fá stöður
eftir því sem valdapýramídinn hefur
hækkað og stækkað. Klíkuskapurinn
hefur aukist.
Hvað er til ráða?
Samstaða, umræða um málin, sofna
ekki á verðinum. Lausnin er ekki fólgin
í því að ganga í klíkurnar, heldur þarf
að breyta starfsháttum. Bankar eru í
eðli sínu afturhaldssamar stofnanir og
eru því dæmigerðir fyrir karlaveldið í
þjóðfélaginu.
Halldóra Sveinbjömsdóttir:
Til þess að konur nái jöfnum rétti við
karla, þarf að verða hugarfarsbreyt-
ing. Að þessari hugarfarsbreytingu
þurfum við að vinna markvisst, t. d.
með því:
1. Að styrkja sjálfstraust kvenna. Að
því má vinna með aukinni menntun,
svo sem í formi námskeiða eða með
aukinni fjölbreytni í starfi t. d. með
meiri tilfærslum milli deilda, útibúa
eða jafnvel stofnana.
2. Að dreifa ábyrgð heimilanna. Það
er viðurkennt að ábyrgð á
uppeldis- og heimilisstörfum hvíli
fyrst og fremst á konum og veldur því
oft að þær hafa ekki þrótt til að taka á
sig aukna ábyrgð úti á vinnumark-
aðnum.
Þessu þurfum við að breyta með því
að auka möguleika karla til að taka þátt
í uppeldisstörfum t.d. með fæðingaror-
lofi fyrir feður og aukinni athygli á því
að frí vegna veikinda barna nær ekki
eingöngu til mæðra.
3. Að hafa strangt eftirlit með því að
konur séu ekki beittar misrétti í
launum (sömu laun fyrir sömu vinnu).
Þessu eftirliti er best framfylgt með
því að við séum sjálfar vakandi yfir því
og látum ekki hið minnsta tilefni af-
skiptalaust.
Linda Óskarsdóttir:
Nei, því miður er ekki jafnrétti í
mínum banka. Misrétti kemur aðallega
fram í launum og stöðuveitingum enda
fylgist þetta tvennt oft að.
Varðandi launamismun, þá eru karl-
arnir ekki bara ráðnir inn í bankann á
hærri launum, heldur eru þeir líka mun
fljótari upp launastigann en konurnar.
Mismunurinn er mikill og það er ekki
bara í bönkunum sem skjótra úrbóta er
þörf í þessum efnum, heldur líka í
þjóðfélaginu í heild.
Misrétti kemur líka fram í stöðu-
veitingum, en þar er þó ails ekki ein-
göngu við yfirmenn bankans að sakast,
því í flestum tilfellum virðist ekki vera
farið eftir kyni umsækjanda þegar
ráðið er í auglýstar stöður. Þar virðast
konurnar sjálfar vera aðalvandamálið,
ef svo má að orði komast. Þær sækja
hreinlega ekki um, þó svo að þær eigi
alla möguleika á að fá stöðuna sem
Frh. á bls. 9
Jafnréttisnefndir
í seinustu kjarasamningum varð
samkomulag um að stofna jafnréttis-
nefnd SÍB og bankanna sem á að leggja
mat á stöðuna í jafnréttismálum í
bönkunum og koma með tillögur í sam-
ræmi við það. í nefndinni sitja 3 full-
trúar frá S.Í.B. og jafnmargir frá
bönkunum.
Einnig varð samkomulag um að
beina því til starfsmannafélaga bank-
anna að stofna jafnréttisnefndir.
Hlutverk nefndanna skal vera að
leggja mat á stöðuna í jafnréttismálum
í bönkum og koma með tillögur. Nefnd-
irnar áttu að skila skýrslum fyrir 1.
nóvember til jafnréttisnefndar S.Í.B.
og bankanna.
Fljótlega eftir að þetta samkomulag
náðist var skipað í 16 jafnréttisnefndir
innan bankanna. Þessar nefndir hafa
starfað af miklum áhuga í sumar og
haust og hafa borist vandaðar skýrslur
til SÍB um þessi mál. Ljóst er að ýmis-
legt þarf að laga og er nú unnið á fullu
við að samræma niðurstöður. Þessar
niðurstöður verða síðan lagðar fyrir
banka, en tillögur þeirrar nefndar
verða lagðar fyrir samninganefnd-
irnar í næstu kjaraviðræðum.