Tímarit Þjóðræknisfélags Íslendinga - 01.01.1966, Side 26

RICHARD BECK:
Tvö kvæði úr Noregsferð
FJALLASÝN í RAUMSDALSFIRÐI
(15. júní 1966)
Hvítir rísa Tröllatindar,
tignir, út við sjónarrönd.
Mildir sofa sumarvindar
sætt og rótt viði dreymna strönd.
Svönum lík í sólarbjarma
sigla ský um loftin há,
mjúkra vængja vefja arma
vanga hlíða og fjöllin blá.
Fjörður lygn í faðmi tinda
fagur speglar dýrðarsýn.
Heimur æðri undramynda
innri sjónum mínum skín.
MORGUNN í NORÐFIRÐI
(17. júní 1966)
Hér standa fjöll um fornar slóðir vörð,
en fögur vorblóm prýða græna jörð,
og horfa út á himinbláan fjörð.
Um fannkrýnd höfuð leikur geislaglóð,
en glaðir þrestir syngja morgunljóð,
og hamrar taka undir þeirra óð.
I laufi hvíslar léttur sævarblær,
á lundi skóga gullnum roða slær;
við sólarrisi fjallafossinn hlær.
Hér yngir huga yndisleikans mynd,
með ódauðleikans svip um strönd og tind,
er mótast djúpt í minninganna lind.