Nýtt Helgafell - 01.04.1956, Qupperneq 13

Davíð Stefánsson frá Fagraskógi:
Sonur jarðccr
Ungur lyfti ég höndum til himins
í heilögu skógarrjóðri.
Með árdagsblænum, sem auðnina strýkur,
berst ilmur frá dánum gróðri.
Ennþá man ég stofnana sterku,
sé stjörnur í fjarska glóa.
Ennþá rísa minningar mínar
úr moldum höggvinna skóga.
Þar kveikti ég forðum fórnareldinn
og fagnaði sól og degi.
Ég reikaði um merkur með reidda öxi
og ruddi mér nýja vegi.
En að mér þyrptist leitandi lýður,
sem laut mér í verki og anda.
Ég kom og sá og sigraði hafið
og sigldi til nýrra landa.
Ég ógnaði þeim sem að mér sóttu,
tók eignir þeirra og brunna.
Marga borg hef ég brennt til ösku
og brotið niður til grunna.
Ég fyrirleit allar fornar vættir
og fegurð í söng og ljóði.
Ég trúði á sverðsins odd og eggjar
og eldinn í mínu blóði.