Dagskrá: tímarit um menningarmál - 01.06.1957, Page 13

Þorgeir Sveinbjarnarson:
Dýfingar
Lífs míns perlufljót.
Eg leita þín,
lokkaelfur,
drauma minna Rín.
Hátt yfir alla bakka
ást þín streymir.
Þinn öldubarmur kvikur
dýran fjársjóð geymir.
Ég skyggnist órór
ofan í reginhyl.
Undir lygnum hjúpi
bœrist strengur glettinn.
Hverfist
eins og hringiða
við klettinn.
Ég steypi mér á kaf
í strauminn þann
og finn
í faðmi þínum
annan mann.
Kvöld við ósinn
Síðasta aldan á voginum
hnigin vestur.
Vegalaus gestur
á ferð
um þagnarhyl
með þunga ævi í spori.
Kominn langa leið
frá sínu vori.
Með storm í fangi
stökk hann eitt sinn fram
úr þröng,
þræddi streng
og söng.
En nú er hann aðeins
gamalt vatn
á gangi.
Staulast,
styðst við bakka.
Stynur hljótt.
Horfir sljótt
á nótt
við næsta leiti.
Neyðaróp hans hvísl
sem varla skilst.
Enginn heima.
Hefur hann kannski
villzt?
DAGSKRÁ
ll