Fréttablaðið - 19.12.2013, Side 70

19. desember 2013 FIMMTUDAGUR| MENNING | 58
Gunnari Andreas Kristinssyni
hlotnast margvísleg upphefð um
þessar mundir. Í fyrsta lagi var
diskurinn hans, Patterns, valinn
einn af sjö bestu íslensku diskum
ársins 2013 af Kraumi, tónlistar-
sjóði. Á Patterns er sólóverk fyrir
píanó og annað fyrir orgel. Einnig
er eitt stórt verk fyrir orgel og
víólu og þessi verk eiga það sam-
eiginlegt að hafa verið flutt oft,
bæði hérlendis og erlendis, að
sögn Gunnars Andreasar. „Elsta
verkið er frá 2000 þannig að þetta
er úrvalið á einum áratug frá
mér,“ segir hann. Aðspurður segir
hann verkin flokkast undir klass-
íska nútímatónlist en aðgengileg
að því leyti að mörg þeirra séu
byggð á íslenskum þjóðlögum
og nefnir sem dæmi Liljulagið
og Fagurt er í fjörðum. „Ég nota
eigin hugmyndaflug og spinn út
frá lögunum en þau eru vel falin,“
tekur hann fram.
Flytjendur á diskinum eru norski
píanóleikari Joachim Kwetzinsky,
danski orgel virtúósinn Christian
Præstholm og víóluleikarinn Guð-
rún Hrund Harðardóttir, eigin-
kona tónskáldsins.
Þetta er ekki allt því hljóm-
sveitarverk Gunnar Andreasar,
Gangverk englanna, sem flutt var
á Myrkum músíkdögum á fyrstu
mánuðum ársins, er tilnefnt til
Íslensku tónlistarverðlaunanna
sem tónverk ársins og hann er líka
tilnefndur sem tónhöfundur árs-
ins fyrir það verk. „Þetta í fyrsta
skipti sem ég fæ tilnefningu til
Íslensku tónlistarverðlaunanna
þannig að það kom skemmtilega
á óvart,“ segir hann ánægður með
uppskeru erfiðis síns.
Gunnar Andreas er einn þeirra
sem hefur vinnustofu í Reykja-
víkurakademíunni og inntur eftir
hvað hann sé að fást við núna
svarar hann: „Ég er að semja klar-
inettukonsert fyrir Kammersveit
Reykjavíkur og Ingólf Vilhjálms-
son á klarinett. Hann verður
fluttur á Myrkum músíkdögum á
næsta ári. Svo er ég líka að gera
saxófónkvartett fyrir Stokkhólm
saxofónkvartett sem verður líka
frumfluttur á Myrkum.“
En að lokum: hvaðan er
Andreasar nafnið? „Andreas er
í ættinni minni sem kemur frá
Bakkafirði. Langafi minn hét
Gunnlaugur Andreas og tveir
frændur bera þetta sem annað
nafn. Ég tel mig þó vera Reykvík-
ing í húð og hár þó ég eigi ættir að
rekja út á land eins og flestir.“
gun@frettabladid.is
Ágætis uppskera þessa dagana
Gunnar Andreas Kristinsson er meðal þeirra sjö sem hljóta Kraumsverðlaunin fyrir bestu íslensku diska ársins 2013. Hann er og tilnefnd ur
til Íslensku tónlistarverðlaunanna sem tónhöfundur ársins fyrir verkið Gangverk englanna sem er líka tilnefnt sem tónverk ársins.
Kraumur er sjálfstæður sjóður
og starfsemi á vegum Auroru
velgerðasjóðs. Hann hefur það
hlutverk að efla íslenskt tónlistar-
líf, fyrst og fremst með stuðningi
við unga listamenn, auðvelda
þeim að vinna að listsköpun
sinni og koma verkum sínum á
framfæri innanlands sem utan.
Markmiðið er að styrkja stöðu
ungra tónlistarmanna á Íslandi
með beinum styrkjum, faglegri
aðstoð og samstarfi af ýmsu tagi.
➜ Kraumur
Gunnar Andreas Kristinsson
stundaði grunnnám í tónsmíðum
við Tónlistarskólann í Reykjavík
á árunum 1997 til 2001 undir
leiðsögn Kjartans Ólafssonar og
Atla Heimis Sveinssonar og sótti
tíma hjá Krzysztof Meyer sem
skiptinemi við Tónlistarháskólann í
Köln. Þá var hann við meistaranám
við Konunglega tónlistarháskólann
í Haag frá 2001 til 2004.
Eftir útskrift starfaði Gunnar
við tónsmíðar í Hollandi og sótti
samhliða því ýmis starfstengd nám-
skeið. Hann flutti til Íslands 2009
og var stundakennari í tónsmíðum
og tónfræði við LHÍ á árunum
2010 til 2012. Á ferli sínum hefur
hann samið verk af ýmsum toga.
Þau hafa ratað inn á tónlistarhá-
tíðir víðs vegar um Evrópu eins
og Listahátíð í Reykjavík, Myrka
músíkdaga, Norræna músíkdaga,
Ung Nordisk Musik, Gaudeamus
Festival, Nederlandse Muziek dagen,
Ultima Festival, Suså Festival og
Darmstadt Summer Course.
SMÁVEGIS UM FERILINN
GUNNAR ANDREAS
Er einn þeirra sem hljóta
Kraumsverðlaunin fyrir
bestu íslensku diska ársins,
fyrir diskinn Patterns sem
inniheldur úrval verka hans
á einum áratug.
FRÉTTABLAÐIÐ/VILHELM