Skessuhorn - 12.03.2014, Blaðsíða 25
25MIÐVIKUDAGUR 12. MARS 2014
Salurinn smám saman fylltist af
fólki sem raðaði sér við borðin með
gosflösku eða jafnvel dós í hönd.
Nokkurrar eftirvæntingar gætti
síðastliðið föstudagskvöld enda var
framundan frumsýning, sem jafnan
er tilhlökkunarefni, meira að segja
mikið. Ekki var spennan minni að
þessu sinni því nú skyldi frumflytja
splunkunýja revíu eftir Bjartmar
bónda Hannesson, skáld og grínara
á Norður Reykjum. Félagið sem
stendur að uppfærslu þessa verks
stendur á tímamótum. Rétt 100
ár eru nú síðan fyrst var sett upp
leikverk í Logalandi, félagsheimili
Ungmennafélags Reykdæla. Þá var
aðsóknin reyndar svo góð að einn
stjórnarmanna í félaginu lagði það
til að fleiri yrðu sýningarnar ekki,
því þrengslin hefðu verið of mikil.
Sem betur fer var ekkert hlustað á
hann. Sýningarnar síðan þetta var
skipta mörgum tugum og reyndar
búið að byggja við og ofan á hús-
ið mörgum sinnum síðan þannig að
alltaf er nóg pláss.
Nú sem fyrr feta ungmennafélag-
ar ekki troðnar slóðir í leiklistinni,
enda fáir sem búa að því að hafa
leikrita- og revíuskáld í sinni sveit.
Sögusviðið í revíunni „Ert´ekk´að
djóka (elskan mín)?“ er uppsveit-
ir Borgarfjarðar. Svo slæðist jú ein
og ein saga með úr neðri byggð-
um, meðal annars handan Hvít-
ár og alla leið úr Borgarnesi. Hæfi-
leg kerskni, mikið glens og hellings
grín eru í bland við örlítið „dass“ af
alvarleika. Í leikskránni mátti lesa
að í sögupersónum mætti finna
sambland, eða hreinræktun, ým-
issa sveitunga og annarra mektar-
manna. Það má til sanns vegar færa.
Léttleikinn var í fyrirrúmi en stutt
í alvarleikann, enda afar nauðsyn-
legt að fá einstaka sinnum tækifæri
til að hvíla vanbúna brosvöðva, nú á
síðustu og verstu tímum. Söguum-
hverfið í verkinu er dæmigerð ís-
lensk sveit - með bætiefnum. Hefð-
bundin hjón með afkomendum,
viðhengjum ásamt frönskum kokki
hafa þegar hér er komið sögu stofn-
að til ferðaþjónustu. Fram kem-
ur að hvert skúmaskot á bænum
og útihúsum er nú nýtt til að þjóna
ferðamönnum á einhvern hátt. Síð-
ast var hrútastían tekin í gagn-
ið - og jú, klósett gamla mannsins
á efri hæðinni, þar sem japanskir
ferðamenn fá að skoða norðurljós-
in. Góðlátlegt grín er gert að hin-
um nýjungagjörnu bændum sem
ætla að „meika það“ af þjónustu við
ferðamenn, eins og reyndar rest-
in af þjóðinni einnig. Nágranni
þeirra, bóndi af kærulausari gerð-
inni, blandast í spilið, með allt niðr-
um sig í hreinlæti í fjósinu og er við
það að fá allra síðustu aðvörun full-
trúa MAST. Gestir á ferðaþjón-
ustubænum eru af ólíkum toga, allt
frá hálf-kynskiptum starfsmanni
Páfagarðs til forsetahjóna. Hverj-
um dytti önnur eins blanda í hug,
nema þá Bjartmari?
Söguþráðurinn í verkinu er ótrú-
lega margslunginn og víða sem
komið er við. Staðfærðir brand-
arar við raunveruleikann, söng-
ur og glens. Kvartett söngvara,
Hálsasveitin, leikur stórt hlut-
verk og syngur við raust af og til
og stígur dansspor vítt um salinn.
Þar eru ýmis þekkt lög sungin við
texta Bjartmars og við gítarundir-
leik hans. Burðarhlutverk í verkinu
hafa síðan sem fyrr bræðurnir þrír
frá Geirshlíð, eiginkonur, börn eða
nágrannar þeirra. Ekki alveg laust
við að læðist að manni sá grunur að
Bjartmar hafi skrifað nokkur hlut-
verkanna fyrir þá. Einstaka Reyk-
dælingur og Hálssveitungur fær svo
að fljóta með.
Í heildina er revían Ert´ekk´að
djóka (elskan mín)? alveg ljómandi
góð. Þráðurinn er heilsteyptur, hef-
ur sitt upphaf og eðlilegan endi,
innansveitar- og héraðsskaupið er
vel skiljanlegt meira að segja brott-
fluttum, og húmorinn er prýðileg-
ur, enda ekki við öðru að búast.
Ef út á eitthvað mætti setja þá er
það annars vegar nafnið á verkinu.
Kostur að allir kunni að slá því inn
á tölvu. Hins vegar er það lengd-
in. Það hefði bætt verkið að kippa
tveimur eða þremur smáatriðum úr
til að koma heildarlengd sýningar-
innar með hléi niður í tvo og hálfan
tíma. Engu að síður tekst hér Þresti
Guðbjartssyni leikstjóra að vinna
vel úr efniviðnum; leikurum og
handritinu, og enginn vafi að hann
nær vel til hópsins. Semsagt: Prýði-
leg frammistaða leikara, söngvara,
baksviðsfólks, Þrastar og ekki síst
Bjartmars. Mér fannst þetta besta
verkið hans til þessa. Héraðsbú-
ar og nágrannar allir verða að gera
sér ferð í Logaland til að sjá þetta
verk. Annað er einfaldlega ekki í
boði. Sýnt verður þétt næstu daga,
fimmtudag til laugardags og hefjast
allar sýningar klukkan 20:30.
Magnús Magnússon
Ungmennasamband Borgarfjarð-
ar hélt sambandsþing sitt í félags-
heimilinu Brautartungu í Lundar-
reykjardal á laugardaginn. Að sögn
Pálma Blængssonar, framkvæmda-
stjóra sambandsins, var þingið vel
sótt. Stjórn UMSB var endurkjör-
in á þinginu en hana skipa þau Sig-
urður Guðmundsson sambands-
stjóri, Ásgeir Ásgeirsson varasam-
bandsstjóri, Kristín Gunnarsdóttir
gjaldkeri, Þórhildur María Krist-
insdóttir ritari og Aðalsteinn Sím-
onarson meðstjórnandi. Pálmi seg-
ir að þingið hafi verið starfssamt og
gengu þingstörf vel.
Auk hefðbundinna dagskrár-
atriða var undirritaður samning-
ur á milli UMSB og þekkingar-
fyrirtækisins KPMG. Samningur-
inn snýr að því að KPMG styrk-
ir sambandið rausnarlega með því
að sjá um færslu á bókhaldi þess
og gerð ársreikninga. Að auki býð-
ur KPMG aðildarfélögum UMSB
sambærilega samninga. Notuðu
fulltrúar tveggja deilda hjá Umf.
Skallagrími í Borgarnesi tækifærið
á þinginu og skrifuðu undir samn-
inga við fyrirtækið. Í samningi
UMSB og KPMG er einnig kveðið
á um að KPMG muni aðstoða sam-
bandið við að útbúa nýja handbók
fyrir gjaldkera íþróttafélaga. Pálmi
segir að handbókin muni auðvelda
gjaldkerum aðildarfélaganna sitt
starf auk þess sem skil og færsla á
bókhaldi verður sambærilegra á
milli aðildarfélaga sambandsins.
hlh/ Ljósm. pb.
Mikið „djók“ í Reykholtsdalnum
Sambandsþing UMSB fór fram í Brautartungu
Við setningu sambandsþings UMSB í Brautartungu. Sigurður Guðmundsson sambandsstjóri er í ræðustóli en honum á hægri
hönd eru fundarstjórarnir, þeir Pálmi Ingólfsson og Guðmundur Sigurðsson.
Ívar Örn Reynisson formaður knattspyrnudeildar Skallagríms, Konráð Konráðs-
son hjá KPMG og Kristinn Óskar Sigmundsson formaður körfuknattleiksdeildar
Skallagríms handsala samstarfssamningana.
Konráð Konráðsson hjá KPMG
og Sigurður Guðmundsson sam-
bandsstjóri skrifa undir samstarfs-
samninginn.