Listin að lifa - 01.12.2004, Blaðsíða 3

Samskipti við stjórnvöld
í síðasta blaði var m.a. sagt aðeins frá fundi sem
talsmenn samtakanna áttu með fjármálaráðherra í
lok ágúst í sumar. Einnig var birtur útdráttur úr þeim
gögnum sem fram voru lögð á fundinum.
Ráðherra vildi lítið ræða þær upplýsingar sem fram komu í
gögnunum en kvaðst vilja beita sér fyrir að formlegur fundur í
samráðsnefnd ríkisstjórnarinnar og LEB yrði haldinn fljótlega
eftir 15. september þegar nýr forsætisráðherra hefði tekið við
störfum. Ennþá hefur þó ekki verið boðað til slíks fundar.
Landssambandið sendi hins vegar öllum alþingismönnum
bréf daginn sem þing kom saman í haust, þ.e. 1. október, með
fjölmörgum upplýsingum um þau umkvörtunarefni um kjör og
aðstöðu aldraðra sem til umfjöllunar hafa verið í samtökum
okkar.
Örfáir alþingismenn hafa síðan haft samband við LEB til
frekari upplýsingaöflunar.
Tvær af starfsnefndum Alþingis, heilbrigðis- og trygginga-
nefnd og fjárlaganefnd hafa í haust boðað fulltrúa frá samtökum
okkar til viðræðna.
Á fundinum með heilbrigðisnefnd, þar sem mættu af hálfu
samtaka okkar þau Stefanía Björnsdóttir, Ólafur Ólafsson og
Benedikt Davíðsson, gafst allgóður tími til skoðanaskipta. Full-
trúar samtakanna tjáðu sig jákvæða gagnvart því frumvarpi sem
var tilefni til fundarboðunarinnar. Það var frumvarp til laga
um breytingar á álögðu gjaldi til framkvæmdasjóðs aldraðra, úr
5576 krónum á ári í 5738 krónur eða um 2,9%, enda rynni sú
hækkun til framkvæmda en ekki til rekstrar. Siðan urðu allmiklar
umræður um nauðsyn á að flýta framkvæmdum við uppbygg-
ingu hjúkrunarheimila og einnig um eflingu heimahjúkrunar
og almennrar heimaþjónustu fyrir aldraða. Það væri kostur sem
margir aldraðir kysu frekar heldur en vist á hjúkrunarstofnunum.
Auk þess væri það líka verulega ódýrari kostur fyrir ríkið, þrátt
fyrir að aldraðir væru einu þjóðfélagsþegnarnir sem sjálfir væru
krafðir um vistunargjöld við innlagnir á sjúkrastofnanir.
Nefndinni voru einnig afhentir listar með upplýsingum um
vaxandi fjölda fólks á biðlistum eftir vistun á hjúkrunarheim-
ilum, svo og gögn um raunverulega skerðingu tryggingagreiðslna
á undanförnum árum og aukna skattlagningu slíkra greiðslna.
Á fundinn með fjárlaganefnd, sem haldinn var 8. nóvember,
mættum við fjölmenn, þ.e. Benedikt Davíðsson, Karl Gústaf
Ásgrímsson, Margrét Margeirsdóttir, Ólafur Ólafsson og Stefanía
Björnsdóttir.
Á þeim fundi gafst lítið sem ekkert tækifæri til umræðna, enda
stóð hann ekki nema í 15 til 20 mínútur. Við lögðum fram alla
okkar útreikninga sem áður hafa verið kynntir hér í blaðinu um
nauðsyn á lagfæringum tryggingagreiðslna, bæði í formi hækkaðs
grunnlífeyris og minnkandi tekjutenginga. Einnig um úrbætur í
skattamálum.
Þá rökstuddum við einnig áður framsett erindi LEB til fjárlaga-
nefndar um aukið fjárffamlag ríkisins til starfsemi samtakanna.
Fulltrúar samtakanna vöktu einnig athygli beggja þessara
þingnefnda á að hin svokallaða samráðsnefnd ríkisstjórnarinnar
og LEB hefði algerlega verið sniðgengin undanfarin misseri og
óskuðu eftir stuðningi þingnefndanna til að virkja þá nefnd.
Benedikt Davíðsson, Ólafur Ólafsson
Jólakveöja ritstjóra
Kæru lesendur;
Jólahughrifin streyma til ykkar frá Snæfellsbæ og Grund-
arfirði. Undan Jökli spretta álfasögur og frásagnir um dulræn
fyrirbæri sem sýna að margt er hulið sjónum okkur. Jólasaga
Áðalsteinu, Jólatréð í kistukassanum, snertir viðkvæma strengi,
sýnir hvernig lítið jólatré gat tendrað helgiljóma á fátæku heim-
ili, þrátt fyrir fráfall föður og frænda. Sjálfsbjörg úr helgreipum
hafsins er ótrúleg saga. Hvernig gat ófrísk og ósynd kona bjargað
sér upp í svellaða fjöru, langt frá landi? Sjálf segir hún að bænin
hafi bjargað sér.
Sögurnar í jólablaðinu vekja upp liðna tið. Á Sögumiðstöðinni
í Grundarfirði er hægt að ganga á vit mannlífs í litlu sjávarplássi
fyrir hálfri öld og skynja hinar miklu breytingar. Það er rétt sem
forstöðumaðurinn segir, að sá fróðleikur sem eldra fólkið býr yfir
er verðmætari en fólk almennt gerir sér grein fyrir. Myndin af
unglingunum í gær, eldri borgurum í dag - segir sína sögu. Látum
ekki tímann renna frá okkur. Skrásetjum merka þætti úr lífinu!
Snæfellsnes býr yfir miklum töfrum
í landslagi, enda rís sjöunda mesta
orkustöð heims yfir byggðinni. Stofnun
þjóðgarðs er mikið gæfuspor, stórbætir
aðgengi að magnþrunginni náttúrufegurð
og söguslóðum. Fuglalíf og fjara, hraunmyndanir og klettaborgir,
sjálfur Jökullinn - allt situr í minningunni. Hafið góða þökk fyrir
að veita innsýn í ykkar stórbrotna umhverfi, kæru Snæfellingar.
Það er mjög ánægjulegt að hafa fengið að kynnast svo mörgu
góðu fólki í heimsóknum á landsbyggðinni.
Megið þið öll njóta gleðiboðskapar jólanna. Fögnum saman
nýju ári og nýjum verkefnum.
Oddný Sv. Björgvins
3