Húnavaka - 01.05.1974, Page 48

44
HÚNAVAKA
GLÆFRAFERÐ AÐ REKA DILKA YFIR
GRÍMSTUNGUHEIÐI
— Hvernig stóð á því að þú lagðir í þá tvísýnu að reka sláturlömb
suður heiðar?
— Ég var kominn í 37 þús. kr. skuld og' þurfti að láta 200 dilka
til þess að borga vexti og afborganir, þó voru vextirnir ekki nema
4% af mestallri upphæðinni. Lambið var áætlað á 7 kr. hér fyrir
norðan, en ég fékk 10 kr. fyrir það hjá Isbirninum, sem var frystihús
í Reykjavík. Við lögðum at’ stað á milli réttanna eða síðustu dagana
í september. Þetta var náttúrlega ógurleg glæfraferð. Nokkrum árum
áður hafði ég lent í einhverri mestu hríð, sem ég hafði verið út í,
þegar ég fór norður yfir Stórasand með alla undanreiðarmennina.
Þá var ákveðin átt sem hélst, svo að það gekk. Ef við fengjum slíkt
veður var mikil hætta á að illa færi. Það hefur verið mikið talað um
þegar Kristján í Stóradal rak sauðina sína, en hann hefur liaft góða
færð og sauðir eru duglegir.
Við rákum suður tvö haust, 1932 og 1933, og bæði haustin voru
dilkarnir yfir 600 í rekstrinum. Það sem bjargaði þessu öllu saman
var að ég hafði svo góðan mann, en rekstrarstjórinn var Hallgrímur
á Kringlu og hann rak alveg snilldarlega.
LÁVARÐSDÓTTIR Á HEKLUTINDI
í GLAÐASÓLSKINI
— Ég hef heyrt að þú hafir verið leiðsögumaður ferðamanna.
— Það voru töluvert erfiðar ferðir. Árið 1931 kom breskur
menntaskólakennari að Grímstungu. Lárus teiknaði upp leiðina
suður Grímstunguheiði og þessi maður gekk með konu sinni suður
yfir heiði eftir teikningu Lárusar. Árið eftir skrifar þessi maður
honum og biður hann að útvega sér mann til þess að flytja sig og
nokkra fleiri frá Húsafelli austur Sand og suður í Árnessýslu og upp
á Heklu. Lárus gat ekki farið og biður mig að fara. Það voru 7 manns
í ferðinni og ég lagði til hestana. Þetta varð skemmtileg vikuferð.