Dagblaðið Vísir - DV - 29.04.2014, Side 31

Vikublað 29. apríl–1. maí 2014 Sport 31
Úrvalslið unglinga
n Bestu leikmennirnir í sínum stöðum 20 ára og yngri n Vefritið GiveMeSport tók saman
Markmaður:
Simone Scuffet
Aldur: 17 ára
Þjóðerni: Ítalskur
Félag: Udinese
n Eru Ítalir loksins búnir að finna verðugan
arftaka Gianluigi Buffon? Það er aldrei að vita
nema svarið við þeirri spurningu sé já. Simone
Scuffet spilar með Udinese og hefur þrátt fyrir
ungan aldur unnið sér inn sæti í liðinu. Eins
dauði er annars brauð en Scuffet kom inn í liðið 1. febrúar síðastliðinn þegar aðalmarkvörð-
urinn, Zeljko Brkic, meiddist og hefur hann haldið stöðu sinni síðan. Það er sjaldgæft að svo
ungum markvörðum sé hent í djúpu laugina svo snemma en staðreyndin er sú að Scuffet
hefur staðist áskorunina vel og á bara eftir að verða enn betri.
Hægri bakvörður:
Kurt Zouma
Aldur: 19 ára
Þjóðerni: Franskur
Félag: St. Etienne (lánsmaður frá
Chelsea)
n Kurt Zoume hefur lengi verið talinn
í hópi efnilegustu varnarmanna
heims og getur þessi öflugi Frakki
leyst nánast allar stöður í vörninni.
Hann vakti athygli ekki alls fyrir löngu
þegar hann fékk 10 leikja bann fyrir að
fótbrjóta andstæðing í leik í frönsku
deildinni. Mestu athyglina hefur hann
þó fengið fyrir frammistöðu sína með
St. Etienne, svo mikla að Chelsea
festi kaup á honum í janúargluggan-
um en lánaði hann aftur til franska
félagsins. Líklegt verður að teljast að
framherjar ensku úrvalsdeildarinnar
muni þurfa að kljást við þennan stóra
og stæðilega varnarmann næsta
vetur.
Miðvörður:
Marquinhos
Aldur: 19 ára
Þjóðerni: Brasilíumaður
Félag: Paris St. Germain
n Marquinhos vakti mikla
athygli hjá Roma á síðasta
tímabili og var svo keyptur
síðasta sumar til Paris St.
Germain. Kaupverðið var 31,4 milljónir evra, eða 3,5 millj-
arðar króna. Hann hefur þurft að gera sér að góðu að verma
varamannabekkinn þó nokkuð á þessu tímabili, en enginn
efast þó um hæfileika hans og tíminn er á hans bandi. Þá
skemmir það ekki fyrir að landi hans, Thiago Silva, einn allra
besti miðvörður heims, er samherji hans hjá PSG og varla
hægt að finna betri lærimeistara en hann.
Miðvörður:
Aymeric Laporte
Aldur: 19 ára
Þjóðerni: Franskur
Félag: Athletic Bilbao
n Laporte er líklega ekki
þekktasta nafnið í liðinu, en
engu að síður hefur frammi-
staða hans með Athletic
Bilbao vakið mikla athygli. Laporte gekk í unglingaakademíu
Bilbao árið 2010 en spilaði sinn fyrsta leik árið 2012. Á þessu
tímabili hefur hann verið fastamaður í sterku liði Bilbao sem
væntanlega verður í Meistaradeildinni næsta vetur. Laporte
er hávaxinn, 1,89, og hefur leikið með öllum yngri landsliðum
Frakklands. Athygli vekur að hann er aðeins annar Frakkinn til
að spila með Bilbao, hinn er Bixente Lizarazu.
Vinstri bakvörður:
Luke Shaw
Aldur: 18 ára
Þjóðerni: Enskur
Félag: Southampton
n Luke Shaw hefur sýnt ótrúlega
takta með Southampton undan-
farnar tvær leiktíðir og engu líkara
en hann eigi áralanga reynslu að baki
í efstu deild. Staðreyndin er sú að
Shaw er einungis 18 ára og af mörgum
talinn efnilegasti vinstri bakvörður í
heimi ásamt David Alaba hjá Bayern
München. Öll stærstu félög Englands;
Manchester United, Manchester City
og Chelsea, eru sögð hafa áhuga á
að kaupa leikmanninn í sumar og eru
sögð reiðubúin að greiða 30 milljónir
punda fyrir þjónustu hans.
Hægri kantmaður:
Raheem Sterling
Aldur: 19 ára
Þjóðerni: Enskur
Félag: Liverpool
n Við svindluðum aðeins hérna. Í
úttekt GiveMeSport var Gerard Deu-
lofeu á hægri kantinum en framganga
Raheems Sterling með Liverpool
að undanförnu tryggir honum sæti í
liðinu. Deulofeu hefur átt fína leiktíð
með Everton en bara ekki jafn góða
og Sterling. Velgengni Liverpool eftir
áramót, ef leikurinn gegn Chelsea
er undanskilinn, hefur ekki síst verið
frammistöðu Sterlings að þakka.
Þessi 19 ára Englendingur skoraði
frábært mark gegn Manchester
City á dögunum og var besti maður
vallarins í sigrinum gegn Norwich um
þar síðustu helgi. Framtíðin er björt
hjá Sterling.
Sókndjarfur
miðjumaður:
Lucas Piazon
Aldur: 20 ára
Þjóðerni: Brasilíumaður
Félag: Vitesse (á láni frá
Chelsea)
n Þessum unga Brasilíumanni
hefur verið líkt við landa
sinn, Kaka, enda þykir leikstíll þeirra svipaður. Piazon er
samningsbundinn Chelsea en hefur farið frá félaginu á
láni undanfarnar tvær leiktíðir; fyrst til Malaga og síðan til
Vitesse í Hollandi þar sem hann hefur spilað óaðfinnanlega.
Þessi tvítugi leikmaður hefur leikið 22 landsleiki fyrir yngri
landslið Brasilíu og skorað í þeim 19 mörk. Piazon getur
leikið sem framherji, vængmaður eða í holunni fyrir aftan
framherjann sem er líklega hans besta staða.
Vinstri vængmaður:
Adnan Januzaj
Aldur: 19 ára
Þjóðerni: Belgi
Félag: Manchester United
n Adnan Januzaj hefur verið einn
af fáum ljósum punktum í liði
Manchester United í vetur. Hann
hefur komið eins og stormsveipur inn
í liðið og leikið vel. David Moyes, stjóri
United, hefur þó farið vel með þennan
gullmola og passað að hann fái næga
hvíld milli leikja. Januzaj getur leikið
í flestum stöðum á miðjunni en hefur
að mestu verið notaður á vinstri
vængnum í vetur hjá United. Hér er
um virkilega spennandi leikmann að
ræða sem væntanlega á bara eftir að
verða betri og betri.
Framherji:
Aleksandar Mitrovic
Aldur: 19 ára
Þjóðerni: Serbi
Félag: Anderlecht
n Belgíska úrvalsdeildin telst jafnan ekki til
sterkustu deilda Evrópu en reynslan hefur
sýnt að þaðan koma margir af efnilegustu
leikmönnum Evrópu. Aleksandar hefur skorað
15 mörk í 29 leikjum á sínu fyrsta tímabili í
efstu deild með Anderlecht og skoraði sitt fyrsta landsliðsmark með aðalliði Serba gegn
Króötum í undankeppni HM í september í fyrra. Fjölmörg stórlið fylgjast vel með þróun mála
hjá þessum unga og stórefnilega framherja.
Miðjumaður:
Adrien Rabiot
Aldur: 19 ára
Þjóðerni: Franskur
Félag: Paris St. Germain
n Ólíkt liðsfélaga sínum, Marquinhos, hefur
Adrien Rabiot ekki átt í miklum vandræðum með
að festa sig í sessi hjá PSG. Þrátt fyrir að vera
nýorðinn 19 ára hefur hann tekið þátt í 20 leikjum
Parísarliðsins í deildinni í vetur og sex Meistara-
deildarleikjum. Rabiot er nokkuð hávaxinn, 1,88 á
hæð, og hefur leikið fyrir öll yngri landslið Frakk-
lands. Merkilegt nokk var þessi efnilegi leikmaður
í unglingaakademíu Manchester City um tíma en
yfirgaf félagið eftir aðeins sex mánuði árið 2008.
Djúpur miðjumaður
Leon Goretzka
Aldur: 19 ára
Þjóðerni: Þýskur
Félag: Schalke
n Fjölmargir ungir og efnilegir leikmenn hafa komið úr
akademíu Schalke á undanförnum árum. Helst ber að
nefna Julian Draxler og Max Meyer en Leon Goretzka er
ekki síðri leikmaður. Goretzka er djúpur miðjumaður og í
umfjöllun Gazzetta dello Sport um efnilegustu leikmenn
heimsfótboltans var Goretzka í 7. sæti á listanum, á undan
bæði Draxler og Meyer. Hann hefur leikið með landsliði
Þjóðverja skipuðu leikmönnum 21 árs og yngri en talið er
að aðeins tímaspursmál sé hvenær hann kemst í aðallið
Þjóðverja. Ef hann heldur vel á spöðunum gæti hann vel
látið ljós sitt skína á EM 2016.
einar@dv.is