Tölvumál - 01.10.2013, Blaðsíða 33

33
Hilmar Veigar er góð fyrirmynd og frumkvöðull. Hann hefur verið
óþreytandi í að vinna með og styðja menntastofnanir, allt frá grunnskóla
upp í háskóla, þegar kemur að upplýsingatæknimiðuðu námi. Hilmar er
verðug fyrirmynd unga fólksins og sýnir svo ekki verður um villst að
hægt sé að ná langt með þrautseigjunni og að ekkert gerist ef ekki er
haldið af stað og haldið áfram þó að móti blási. Hann hefur einnig í
gegnum starf sitt hjá CCP og samtökum upplýsingafyrirtækja aukið
almennan áhuga á upplýsingatækni og nýsköpun.
Hilmar Veigar Pétursson hefur starfað sem framkvæmdastjóri CCP frá
2004 og alla tíð síðan leitt fyrirtækið í gegnum viðvarandi velgengni og
gríðarlegan vöxt. Meðal verkefna sem hann hefur tekist á við eru
umtalsverð stækkun reksturs fyrirtækisins í Shanghai, Kína og samruna
við White Wolf Publishing í Atlanta árið 2006. Hilmar hefur tryggt sess
CCP sem leiðandi afls á tölvuleikjamarkaði og er þekktur sem
frumkvöðull í þróun sýndarveruleika, útgáfu sýndarveruleikaleikja og
þróun tækninnar á bak við slíka leiki. Hann var nefndur einn af 20
áhrifamestu mönnum á sviði nettölvuleikja (e. MMO Industry) árin 2007
og 2008 af Beckett Massive Onliner Gamer Magazine. Hilmar er
eftirsóttur fyrirlesari og hefur m.a. talað á Edinburgh Interactive Festival,
Nordic Game Conference og the Austin Game Developer’s Conference.
Hilmar gekk til liðs við CCP árið 2000 sem yfirmaður tæknimála (CTO)
og leiddi verkefnið EVE Online sem leit dagsins ljós árið 2003. Áður
starfaði Hilmar hjá SmartVR og OZ. Nýlega hefur CCP fyrirtækið tengt
saman tvo tölvuleiki DUST 514 og EVE Online. CCP hefur náð þeirri
stöðu að mestur hluti tekna félagsins er erlendis frá og telur því í samtölu
útflutningstekna þjóðarinnar. Hilmar Veigar tekur virkan þátt í mótun
vaxtar íslensks hugvits með setu í ýmsum stjórnum og ráðum sem
tengjast upplýsingatækni og frumkvöðlastarfsemi henni tengdri. Hilmar
er tölvunarfræðingur B.S. frá Háskóla Íslands.
Leikjaiðnaðurinn er nú orðinn einn af máttarstólpum í útflutningi
skapandi greina. Hilmar og samstarfsfólk hans hjá CCP hafa komið að
og hvatt til hugmyndaauðgi í sprotastarfsemi og þannig tekið þátt í vexti
tölvuleikjaiðnaðar á Íslandi og aðstoðað þar sem þeir hafa getað. CCP
er einkafyrirtæki sem margir rekstraraðilar horfa upp til og leitast við að
gera sambærilega hluti og ná árangri. Oftar en ekki leita þessir aðilar
ráða hjá Hilmari sem góðfúslega hefur deilt áralangri reynslu sinni og
tengslaneti, því Hilmar veit að ólíkt flestum auðlindum sem eyðast þegar
þær eru notaðar þá má segja að þekking vaxi sé henni deilt.
Hilmar snertir strengi víða og heyrst hefur að ungur drengur hafi horft á
mynd af Hilmari, litið á móður sína og sagt: „Ég ætla sko að verða
tölvunörd eins og hann„.
Það er Skýrslutæknifélagi Íslands mikill heiður að veita Hilmari Veigari
Péturssyni þessa viðurkenningu. Verðlaunagripurinn er glerlistaverk eftir
Ingu Elínu listamann.
um upplýSingaTækniVerðlaun Ský
Upplýsingatækniverðlaun Ský eru heiðursverðlaun fyrir framúrskarandi
framlag til upplýsingatækni á Íslandi. Skýrslutæknifélag Íslands (Ský) veitir
verðlaunin og eru þau að danskri fyrirmynd og er veiting þeirra er árleg frá
árinu 2010.
Tilfnefningar og Val
Hægt er að tilnefna einstakling eða forsvarsmann fyrirtækis eða verkefnis
sem hefur skarað framúr á sviði upplýsingatækni, skapað verðmæti og
auðgað líf Íslendinga með hagnýtingu á upplýsingatækni. Áhersla er lögð
á að framlagið hafi þegar sannað sig með afgerandi hætti.
Allir í tengslaneti Ský geta sent inn tilnefningar. Valnefndin getur einnig
sent inn tilnefningar. Hver aðili getur aðeins sent inn eina tilnefningu og
skal hún rökstudd. Eftir að fresti til tilnefninga lýkur velur valnefnd þann
aðila sem þykir skara framúr og skal hún vera einróma um valið og
rökstyðja það vel. Tilnefningar skulu sendar í tölvupósti til sky@sky.is og
skal rökstyðja tilnefningu svo valnefnd hafi forsendur til að meta hvort
um sé að ræða framlag sem kemur til álita við val á verðlaunahafa.
Valnefnd
Árlega skipar stjórn Ský valnefnd sem hefur sérþekkingu og reynslu á
sviði upplýsingatækni. Valnefnd samanstendur af tveimur síðustu
verðlaunahöfum, fulltrúa frá samtökum upplýsingatækni fyrirtækja, fulltrúi
háskóla, fulltrúi styrktaraðila, fulltrúi stjórnar Ský ásamt starfandi
framkvæmdastjóra Ský.
VerðlaunaHafar frá uppHafi
• Friðrik Skúlason fékk fyrstu Upplýsingatækiverðlaun Ský 20.
maí 2010. Gylfi Magnússon viðskiptaráðherra afhenti honum
verðlaunin á UT-deginum.
• Reiknistofa bankanna fékk önnur Upplýsinga tækni verðlaun
Ský 18. mars 2011. Forseti Íslands hr. Ólafur Ragnar Grímsson
afhenti verðlaunin á UTmessunni.
• Maríus Ólafsson fékk þriðju Upplýsingatækniverðlaun Ský 9.
febrúar 2012. Ari Kristinn Jónsson, rektor HR afhenti verðlaunin
á UTmessunni.
• Hilmar Veigar Pétursson fékk fjórðu Upplýsingatækni verðlaun
Ský 8. febrúar 2013. Forseti Íslands hr. Ólafur Ragnar Grímsson
afhenti verðlaunin á UTmessunni.
Rökstuðningur valnefndar er birtur á vef Ský ásamt myndum frá
verðlaunaafhendingum.
Við hvetjum alla sem tengjast UT geiranum til að senda inn tilnefningar
og auka þannig breidd þeirra sem koma til greina við næstu veitingu
verðlaunanna sem verður á UT messunni 2014.
Hilmar Veigar péTurSSon fær
uT Verðlaun Ský 2013
Hilmar Veigar Pétursson, framkvæmdastjóri CCP, fékk UT verðlaun Ský 2013 en þetta er í fjórða sinn sem verðlaunin
eru afhent. Það var forseti Íslands, Ólafur Ragnar Grímsson, sem afhenti Guðrúnu E. Stefánsdóttur, eiginkonu
Hilmars Veigars, verðlaunin á UTmessunni í Hörpu, en Hilmar var staddur erlendis starfa sinna vegna.