Gerðir kirkjuþings - 2010, Síða 66

66
Samþykki þjóðkirkjunnar á ofangreindri 5% skerðingu verði háð því að fjárhæð
sóknargjalda árið 2011 breytist ekki frá árinu 2010 og verði 767 krónur á mánuði á
hvern gjaldanda 16 ára og eldri, enda eru þau félagsgjöld í eðli sínu sem standa undir
grunnþjónustu safnaðanna sem er mikilvægur þáttur í velferð samfélagsins.
Samkomulag um niðurskurð fjárframlaga til þjóðkirkjunnar skal gert með fyrirvara
um samþykki kirkjuþings og Alþingis og gildi einungis fyrir árið 2011.

2. Þingsályktun um að fela kirkjuráði að vinna að niðurskurði á fjárlagalið biskups
Íslands
Aukakirkjuþing 2010 felur kirkjuráði að halda áfram vinnu við aðgerðaáætlun vegna
niðurskurðarkröfu ríkisins á fjárlagalið Biskups Íslands 2011, þar sem tekið verði mið
af umræðum á þinginu. Þriggja manna nefnd sem kjörin var af aukakirkjuþingi 2010
vinni með kirkjuráði að útfærslu áætlunarinnar í samræmi við niðurstöðu samninga
við ríkisvaldið. Sparnaðaráætlunin komi í heild til umfjöllunar á kirkjuþingi í haust.
Meðal þeirra atriða sem verða til skoðunar eru:
1. Endurskipulag prestsþjónustunnar og stofnana þjóðkirkjunnar.
2. Starfshlutfall starfsmanna Biskupsstofu og stofnana kirkjunnar lækki og/eða
starfsfólki fækki.
3. Námsleyfi verði 10 mánuðir árið 2011 í stað 36 mánaða árið 2009.
4. Fækkun prófastsdæma.
5. Almennur 10% sparnaður í rekstri embættis biskups Íslands.
6. Sala fasteigna.
7. Framlag Jöfnunarsjóðs sókna og kirkjumálasjóðs til prestsþjónustu, rekstrar og
stofnkostnaðar.
8. Tímabundin lántaka.
9. Tekjuöflun með þjónustusamningum.
10. Efling sjálfboðastarfs í þjóðkirkjunni.
Í þriggja manna nefnd til að vinna með kirkjuráði voru kjörnir kirkjuþingsfulltrúarnir
Ásbjörn Jónsson, sr. Gunnlaugur Stefánsson og Katrín Ásgrímsdóttir.

Samskiptamál
Kirkjuráð samþykkti að ganga til samninga við KOM almannatengsl ehf. í fjóra
mánuði um fjölmiðlun og almannatengsl. KOM tekur að sér almenn kynningarmál,
ráðgjöf og fjölmiðlun fyrir þjóðkirkjuna.
Unnin var skoðanakönnun um traust til presta og sóknarkirkna í októbermánuði 2010 í
framhaldi af þjóðarpúlskönnun sem Gallup stóð fyrir. Niðurstöður voru um margt já-
kvæðar fyrir þjóðkirkjuna. Könnunin er kynnt á kirkjuþingi 2010.
Kirkjuráð stóð fyrir tveimur upplýsingafundum um fjármál og lagalega stöðu þjóð-
kirkjunnar fyrir presta og sóknarnefndir í Reykjavíkurprófastsdæmunum. Kirkjuráð
telur þýðingarmikið að halda þessu kynningarstarfi áfram til að upplýsa fólkið í
kirkjunni um stöðuna gagnvart ríkisvaldinu og um niðurskurðinn.

Fjármál
Fjármálakreppa sem skall á í lok septembermánaðar 2008 hefur enn veruleg áhrif á
störf kirkjuráðs og hefur mikið verið unnið að því á starfsárinu að greina hvar hægt sé
að draga úr útgjöldum og auka tekjur. Í fjárlögum 2010 gerði ríkið kröfu á hendur
kirkjunni um 10% niðurskurð. Eins voru sóknargjöld skert enn eitt árið þannig að
heildarskerðing sóknargjalda miðað við árin 2008 til 2010 nemur 17,5%.
Við úthlutanir úr Jöfnunarsjóði sókna og kirkjumálasjóði fyrir árið 2010 voru flestir
útgjaldaliðir lækkaðir um 10%. Þá var formönnum sóknarnefnda skrifað og brýnt fyrir