Gerðir kirkjuþings - 2010, Síða 117

117
Biskup Íslands auglýsir prestsembætti innan kirkjunnar og skipar í embætti
sóknarpresta og önnur prestsembætti að fenginni umsögn valnefndar. Biskup Íslands
útnefnir prófasta úr hópi presta.

Biskupi Íslands er heimilt að ákveða að í prófastsdæmum starfi héraðsprestar. Biskupi
Íslands er heimilt að samþykkja að ráðnir séu prestar á vegum stofnana og
félagasamtaka. Biskupi Íslands er heimilt að samþykkja að prestar séu ráðnir til starfa
meðal Íslendinga erlendis.

Skrifstofa biskups Íslands er Biskupsstofa sem hann veitir forstöðu og ber ábyrgð á.
Sjá nánar kafla 26.5.
Kjör biskups
Um kjör til embættis biskups Íslands og vígslubiskupa gilda starfsreglur nr. 818/2000.
Embættisklæði og skrúði
Sjá 23. kafla um embættisklæði og skrúða.
Lög og starfsreglur
Um biskup Íslands og vígslubiskupa gilda ákvæði í lögum um réttindi og skyldur
starfsmanna ríkisins nr. 70/1996, lög um stöðu, stjórn og starfshætti þjóðkirkjunnar nr.
78/1997 og starfsreglur um kjör biskups Íslands og vígslubiskupa nr. 818/2000.
Um vígslubiskupa gilda starfsreglur um vígslubiskupa nr. 968/2006.
24.2 Vígslubiskupar
Vígslubiskup starfar á grundvelli laga um stöðu, stjórn og starfshætti þjóðkirkjunnar
nr. 78/1997. Í umboði biskups Íslands og eftir þeirri kirkjulegu skipan sem segir í
lögum, reglugerðum og starfsreglum veitir vígslubiskup andlega leiðsögn og tilsjón
innan kirkjunnar í umdæmi sínu, eflir kirkjulíf, vísiterar og annast sáttaumleitanir.

Vígslubiskup sá, sem eldri er að biskupsvígslu, gegnir störfum biskups Íslands í
forföllum samkvæmt 15. gr. þjóðkirkjulaga nr. 78/1997.

Vígslubiskupar bera ábyrgð á uppbyggingu biskupsstólanna eftir því umboði sem
Kirkjuráð veitir. Þeir eru Kirkjuráði til stuðnings og samráðs í málefnum
biskupsstólanna, svo og öðrum kirkjulegum stjórnvöldum og koma fram í nafni
staðanna og umdæmanna eftir því sem við á. Þeir bera ábyrgð á helgihaldi dómkirkna
sinna í samráði við viðkomandi sóknarprest og sinna helgihaldi reglubundið.

Að öðru leyti er vísað til starfsreglna um vígslubiskupa nr. 968/2006.
24.3 Um presta
Meginhlutverk
Presti er skylt að sinna starfi sínu samkvæmt þeirri köllun sem hann hefur hlotið og
vígslubréfi. Frumskylda presta þjóðkirkjunnar er við íbúa innan sókna sinna og
samstarfssvæða.