Morgunblaðið - 07.07.2017, Síða 6

6 FRÉTTIRInnlent
MORGUNBLAÐIÐ FÖSTUDAGUR 7. JÚLÍ 2017
Funahöfða 7, 110 Reykjavík | Sími 577 6666
., '*-�-��,�rKu�,
KIEL/ - OG FRYSTITJEKI
Iðnaðareiningar
í miklu úrvali
BAKSVIÐ
Helgi Bjarnason
helgi@mbl.is
Framkvæmdir við lagningu há-
spennulína frá Þeistareykjavirkjun
til iðnaðarsvæðisins á Bakka og til
Kröflu eru nú í hámarki. Unnið er að
slóðagerð og gerð undirstaða á síð-
ustu köflunum og á allri línuleiðinni
er verið að setja saman möstur og
reisa. Í gær var síðan byrjað að
hengja einangrara á háspennu-
möstrin og draga vír á þau.
Meira liggur á að tengja virkjun-
ina við Kröflu en Bakka því ekki er
hægt að hefja prófanir á vélum
Þeistareykjavirkjunar fyrr en hún
hefur verið tengd við meginflutn-
ingskerfi landsins. Þrátt fyrir allar
tafirnar eru framkvæmdir við þá
línu aðeins mánuði eða einum og
hálfum á eftir áætlun. Landsvirkjun
féllst á að fresta prófunum frá áætl-
uðum tíma en ljóst er að ekki má
neitt óvænt gerast á síðustu metrun-
um til þess að þær áætlanir standist.
„Við erum að vinna í kappi við tím-
ann. Eins og staðan er núna virð-
umst við ætla að ná að koma línunni í
rekstur á réttum tíma, þrátt fyrir
alla þá erfiðleika sem við höfum ver-
ið að glíma við,“ segir Guðmundur
Ingi Ásmundsson, forstjóri Lands-
nets.
Meira liggur á Kröflulínu
Búið er að reisa allflest háspennu-
möstur Kröflulínu 4, fyrir utan
syðsta kaflann, í landi Reykjahlíðar
sem mestu deilurnar hafa staðið um.
Verktakar hófu í gær vinnu við að
hengja einangrara og útdráttarhjól
á möstrin. Það er fyrsti undirbún-
ingur þess að strengja leiðarana
(vírana) á milli mastranna og
spennusetja línuna. Þórarinn
Bjarnason, verkefnastjóri hjá
Landsneti, segir að þetta sé vanda-
verk. Leiðararnir megi ekki snerta
jörðu því þá sé hætta að þeir rispist
og skemmist.
Vegslóðinn er kominn í gegnum
Leirhnjúkshraun og langleiðina í
gegnum land Reykjahlíðar. Jafn-
framt er grafið fyrir undirstöðum
þar. Þórarinn segir stefnt að því að
ljúka undirstöðum í byrjun ágúst og
þá verði hægt að reisa möstrin og
strengja línuna. Stefnt sé að því að
spennusetja Kröflulínu 4 í byrjun
september og þá verði hægt að hefja
prófanir á Þeistareykjavirkjun.
Ekki liggur eins mikið á að ljúka
uppsetningu Þeistareykjalínu 1 sem
tengir virkjunina við iðnaðarsvæðið
á Bakka og Húsavík. Rúmur helm-
ingur af framleiðslu virkjunarinnar
fer til kísilvers PCC. Verið er að
reisa möstur í þeirri línu og ljúka
undirstöðum næst Þeistareykjum.
Stefnt er að því að spennusetja lín-
una í október, vel tímanlega fyrir
gangsetningu kísilversins sem
áformuð er í desember.
Háspennumöstrin eru mikil
mannvirki. Samt er ótrúlega létt yfir
þeim í landslaginu, þar sem þau
sjást í röð, að vísu án víranna.
Þriðja framkvæmdin er bygging
þriggja tengivirkja (spennistöðva), á
Bakka, Þeistareykjum og í Kröflu.
Þau eru yfirbyggð. Guðmundur Ingi
segir að það hafi reynst hagkvæmari
kostur, þegar heildarmyndin var
skoðuð, en að hafa þau undir beru
loft, óvarin fyrir veðrum. Þótt stofn-
kostnaður sé meiri við yfirbyggðar
stöðvar dragi það fyrirkomulag úr
skemmdum og kostnaði og auki
rekstraröryggi flutningskerfisins.
„Þetta er einnig útlitsmál. Við viljum
hafa tengivirkin í fallegum húsum,“
segir Guðmundur.
Byrjað að draga víra á möstur
 Framkvæmdir við lagningu háspennulína frá Þeistareykjavirkjun í hámarki  Unnið í kappi við
tímann á deilulandi Reykjahlíðar  Þeistareykjavirkjun tengd við landskerfið í byrjun september
Morgunblaðið/Helgi Bjarnason
Reising Starfsmenn verktaka reisa nyrsta háspennumastur Þeistareykjalínu, það sem næst er tengivirkinu við Bakka. Verksmiðjuhús PCC sést í baksýn.
„Mér finnst vel hafa tekist til. Menn gera sitt allra
besta til að fella slóðana að landinu og reyna að hafa
eins lítið rask og hægt er,“ segir Guðmundur Ingi Ás-
mundsson, forstjóri Landsnets, í skoðunarferð um
Leirhnjúkshraun í landi Reykjahlíðar í Mývatnssveit í
fyrradag. Deilur og málaferli hafa verið um lagningu
háspennulínu þar um.
Eftir að Landsnet fékk loks umráð yfir landi undir
slóða og línu eftir málaferli við Landvernd og tvo land-
eigendur hófst undirbúningur fyrir lagningu Kröflu-
línu 4 á þessum stað af fullum krafti. Lagður hefur
verið línuslóði í gegnum hraunið og verið er að grafa
fyrir möstrum.
Lega slóðans er ákveðin í sameiningu af fulltrúum
Landsnets og Umhverfisstofnunar og verktakinn og
jafnvel einstaka landeigendur leggja einnig gott til.
Meðal annars er haft í huga að hann sjáist lítið eða
alls ekki frá viðkomustöðum ferðafólks í nágrenninu.
Guðmundur segir að reynt verði að vanda frágang
eftir að línan hefur verið lögð og gerð verði umhverf-
isúttekt í lokin til að fá álit hagsmunaaðila á því hvort
eitthvað megi gera betur. „Við vöndum okkur eins vel
og við getum,“ segir Guðmundur.
Tenging Þeistareykjavirkjunar við Kröflu og þar
með flutningskerfi landsins er mikilvæg fyrir Lands-
virkjun. Framkvæmdinni á deilukaflanum í landi
Reykjahlíðar hefur seinkað mikið vegna málaferlanna.
Guðmundur Ingi segir að tafirnar og málaferlin hafi
einnig kostað Landsnet talsverða fjármuni. Ákveðnir
angar í deilumálunum eru þó enn óútkljáðir fyrir dóm-
stólum og í stjórnkerfinu.
Vöndum okkur eins og við getum
VEGUR UM LEIRHNJÚKSHRAUN
Í Leirhnjúkshrauni Þórarinn Bjarnason, Guð-
mundur Ingi Ásmundsson og Árni Jón Elíasson í
skoðunarferð um framkvæmdasvæðið.
Þrætuland Gamli Landsvirkjunarslóðinn
liggur inn í Leirhnjúkshraun. Í framhaldi af
honum leggur Landsnet sinn slóða.