Skírnir - 01.09.2011, Qupperneq 118

348
KRISTÍN LOFTSDÓTTIR
SKÍRNIR
mjög af kristni". Félag kennara í kristnum fræðum, siðfræði og
trúarbragðafræðum (FEKKST) ritaði bréf til menntamálaráðherra
í tilefni af endurskoðun grunnskólalaganna, 13. september 2006. Þar
leggur félagið áherslu á að haft verði að leiðarljósi að starfshættir
grunnskólans byggist sem fyrr á kristnum gildum, en tekur þó
einnig fram að við megi bæta að þeir byggist á húmanískum gildum.4
I umsögn sinni um grunnskólalagafrumvarpið lögðu hagsmuna-
samtökin Heimili og skóli á svipaðan hátt til að þar ætti að koma
fram að starfshættir grunnskólanna byggist á þjóðlegum, kristnum
og húmanískum arfi íslenskrar menningar en samtökin höfðu áður
talið að taka ætti út áhersluna á kristinn arf sem var í fyrri lögum.
Hægt er að geta sér til að samtökin hafi verið að reyna að sætta eða
koma til móts við þá tvo hópa sem höfðu haft sig sem mest í frammi
í þessari umræðu.
Frumvarpi til laga um grunnskóla var vísað til umfjöllunar
menntamálanefndar Alþingis 7. desember 2007 þar sem sérstaklega
er fjallað um hlutverk grunnskólans. I umfjölluninni segir: „Með
hliðsjón af því sem að framan greinir og þess hversu mjög íslensk
saga, menning og þau gildi sem íslenskt þjóðfélag byggist á eru sam-
ofin hinni kristnu arfleifð íslenskrar menningar, telur nefndin rétt að
tekið sé mið af þeirri staðreynd í markmiðsgrein frumvarpsins og
leggur til breytingar á henni" (Nefndarálit 2008). Félagið Vantrú
sendi einnig alþingismönnum bréf þar sem þessari breytingartillögu
menntamálanefndar — sem síðan var samþykkt — var mótmælt og
orðalagið talið vera of vítt. Lagt var til að í staðinn mætti segja að í
„trúarbragðafræðslu skuli leggja sérstaka áherslu á kristni og þátt
hennar í menningu Islendinga frá upphafi“ (Vantrú 2008).
Var með þessum fyrirhuguðu breytingum verið að skerða hlut
kristninnar verulega í grunnskólum? Ef ný aðalnámskrá grunnskóla
er skoðuð má sjá að kristin trú heldur áfram að vera mjög mikilvæg
í skólastarfinu og erfitt að líta svo á að verið sé að úthýsa henni. í
hinum almenna hluta aðalnámskrárinnar er sagt að starfshættir í
4 Félag kennara í kristnum fræðum, siðfræði og trúarbragðafræðum (FÉKKST)
2006. Benda má á að á vefsíðu samtakanna eru margvíslegar upplýsingar um ólík
trúarbrögð og siðferði, og vísað á aðrar vefsíður þar sem hægt er að leita frekari
upplýsinga.