Skírnir - 01.09.2011, Síða 199

SKÍRNIR
GUÐIR OG GIRND
429
með reiði sjálfs Óðins og Þórs. Hver er hræddur við Gerði Gymis?
Skírnir skelfist aðeins Nei-ið hennar því að þá verður hann að skila
bæði sverði og fáki.
Ármann Jakobsson hefur komið víða við í fræðum sínum og
meðal annars dvalið í jötunheimum. Samkvæmt honum búa jötnarnir
í skógum og til stranda, fyrir austan en líka fyrir norðan og Skírnir fer
einmitt á Blóðhófni norður. Þar eru Gymisgarðar. Það er eins með
þann stað og Bílasölu Guðfinns og Hlöllabáta. Eigendurnir eru svo
magnaðir að ekki kemur annað til greina en að kenna staðina við þá.
Skírnir og Blóðhófnir komast saman til jötunheima án þess að
tröllin nái í skottið á þeim og komast með nokkuð léttum leik að
Gymisgörðum. Þar hittir Skírnir Gerði fyrir. Hann reynir að múta
henni til að koma með sér, býður henni skartgripi, sjálfan hringinn
Draupni en af honum hrynja átta aðrir hringir níundu hverja nótt.
Síðan býður hann henni gullepli Iðunnar. Gerður afþakkar. Hún
segir að sig vanti ekki fé því pabbi hennar sé svo ríkur. Þótt tröllin
séu ásunum vissulega grimm og hættuleg ríkir með þeim samheldni.
Gerður sér enga ástæðu til yfirgefa æskuheimilið.
Þá tekur heldur betur að síga í Skírni og hann hótar að drepa
Gerði en jafnvel það bítur ekki á hana því það eina sem hún segir er
að faðir hennar eigi eftir að hefna hennar. Þá taka galdrarnir við. I
formála sínum að Þremur Eddukvœðum (1959) segir Sigurður Nor-
dal um Eddukvæðin að þessari „litlu bók“ hafi „verið sköpuð mikil
og fjölbreytileg örlög af hálfu lesendanna“. Kvað hann þau hafa
„verið skoðuð í smásjá orðaskýringa og textagreiningar og farið
með þau hamförum um háloft lærdómsóra" (bls. 473).
Og órarnir eru vissulega ekki langt undan þegar lagst er yfir
Skírnismál og ekki hægt að kenna þá alla við lærdóm — þannig séð,
því ekki verður litið fram hjá því að galdrahótanirnar eru í kyn-
ferðislegri kantinum. Skírnir hótar Gerði með tamsvendi og segir
að enginn vilji hana nema þríhöfða þurs. Skósveinninn romsar upp
úr sér galdrastöfunum og um leið breytist bragarhátturinn. Brugðið
er út af ljóðahættinum með því að endurtaka línur, ýmist óbreyttar
eða með breyttri endurtekningu. Þetta er kallað galdralag. Tempóið
verður stríðara, hljóðin kröftugri og hljómsterkari. Þá má heyra
sefjandi áhrif galdraseiðsins: