Skessuhorn - 14.03.2018, Blaðsíða 16
MIÐVIKUDAGUR 14. MARS 201816
Fyrir þremur árum var gerð breyt-
ing á rekstri ferðaþjónustunnar í
Fossatúni í Borgarfirði. Horfið var
frá hefðbundnum rekstri tjaldsvæð-
is og þess í stað sett upp svokölluð
timburtjöld, eða poddar, upphituð
smáhýsi með nettengingu, rafmagni
og öllu tilheyrandi. Síðan þá hefur
poddunum fjölgað jafnt og þétt og
nýverið var níu slíkum til viðbótar
bætt við. Eru poddarnir nú orðnir 17
talsins en að sögn Steinar Bergs Ís-
leifssonar, eiganda og framkvæmda-
stjóra Fossatúns, verður ekki hætt
þar. Stefnt er að því að bæta við fleiri
poddum seinna á þessu ári og síðan
eftir efnum og aðstæðum og á meðan
plássið á gamla tjaldsvæðinu leyfir.
„Þegar við hættum með tjaldsvæðið
fyrir þremur árum síðan höfðum við
verið forkólfar í því að bjóða meiri
þjónustu en þekktist á tjaldsvæðum
víðast hvar. Við veittum tjaldbúum
aðgang að rafmagni, heitum pottum
og interneti til dæmis. Síðan gerist
það að við fáum í röðum heimsókn-
ir frá bæjarfélögum sem vildu móta
sín tjaldstæði eftir okkar og gerðu
það. Þá vorum við allt í einu komin
í beina samkeppni við opinbera að-
ila. Við stöldruðum aðeins við, litum
til framtíðar og ákváðum í framhaldi
af því að fara alfarið yfir í poddana,“
útskýrir Steinar í samtali við Skessu-
horn. „Núna er sá rekstur orðinn
fjölbreyttari en í byrjun. Nýju podd-
arnir eru orðnir einangruð heilsárs-
hús og mjög hagstæður gistikostur,
enda er þetta langvinsælasti gisti-
möguleikinn hjá okkur,“ segir Stein-
ar. „Hér bjóðum við líka gistingu á
hefbundnum hótelherbergjum og á
gistiheimili, en poddarnir eru lang-
vinsælastir. Ég held að eftirspurnin
eftir poddunum sé þreföld á við aðra
gistingu hjá okkur,“ bætir hann við.
Gætu orðið 60 til 70
Þegar ferðaþjónar í Fossatúni fóru
að merkja mikla og vaxandi eftir-
spurn eftir gistingu í poddunum var
horft enn lengra til framtíðar með
poddana í huga. „Við fórum út í
það að deiliskipuleggja tjaldsvæðið
sem smáhýsabyggð. Þar gerum við
ráð fyrir að 60 til 70 poddar geti ris-
ið,“ segir Steinar en hefur orð á því
að deiliskipulagning svæðisins hafi
ekki gengið án vandkvæða. „Borg-
arbyggð hefur samþykkt skipulag-
ið en Skipulagsstofnun hafnaði því
og beindi tilmælum til sveitarfélags-
ins að breyta þyrfti aðalskipulagi til
að smáhýsabyggð fengist samþykkt.
Skipulagsstofnun hélt því fram að
um væri að ræða hús á föstum grunni
með fastri rafmagnstengingu. Hvort
tveggja er rangt,“ segir hann. „Hús-
in eru hífð á sinn stað og skrúfuð á
festingar. Síðan er þeim bara stung-
ið í samband við rafmagnsstaurana
á tjaldsvæðinu fyrrverandi og hægt
að fjarlægja þau eða færa hvenær
sem er,“ segir Steinar og er ósátt-
ur með vinnubrögð Skipulagsstofn-
unar. „Mér hefur stundum fundist í
samskiptum við opinberar stofnan-
ir, að þær fullyrði ýmislegt án þess
að hafa kynnt sér málin. Starfsfólk
Borgarbyggðar hefur aftur á móti
verið ákaflega liðlegt og samvinnu-
þýtt í þessu ferli og sveitarfélagið
stendur þétt við bakið á okkur. Það
er ánægjulegt. Vonandi endar þetta
allt saman vel,“ segir Steinar.
Þorpsbragur yfir svæðinu
Sem fyrr segir var nýlega bætt við
níu poddum til viðbótar við þá sem
fyrir voru í Fossatúni og þeir orðn-
ir 17 talsins. Á síðasta ári var útbúið
eldhús sem þeir sem dvelja í podd-
unum geta nýtt sér. Steinar segir
áætlað að fjölga poddum enn frek-
ar seinna á árinu og bæta við öðru
eldhúsi í framhaldi af því. „En fyrst
á dagskrá er að ganga aðeins frá í
kringum nýju poddana, aðeins að
laga til og tyrfa síðan þannig að
þetta verði fallegt og snyrtilegt. Það
gerum við um leið og veður leyf-
ir,“ segir hann. „Þá verður kominn
smá þorpsbragur yfir svæðið, með
þyrpingu 20 húsa sem öll hafa mjög
svipað yfirbragð þó þau séu ekki ná-
kvæmlega eins,“ segir Steinar. „Það
myndast oft góð stemning meðal
þeirra sem gista í poddunum, dálít-
ið eins og í litlu þorpi. Fólk nær ein-
hvern veginn meira og betur sam-
an en ef það gistir á hótelherbergi
eða gistiheimili. Það deilir eldhúsi,
fer saman í heita pottinn á kvöldin
og er meira eins og nágrannar en
ókunnugir ferðalangar í næsta her-
bergi,“ segir hann. „Það sem setur
síðan punktinn yfir i-ið, hvað podd-
ana varðar, er að þeir sem panta þá
dvelja gjarnan í nokkrar nætur. Hót-
elherbergi eru mest bókuð í eina og
kannski tvær nætur, en poddarnir
eru mikið bókaðir í þrjár til fjórar
og jafnvel fimm nætur í senn,“ seg-
ir Steinar ánægður.
Hagkvæmur gistikostur
En hvað telur hann að skýri vin-
sældir poddanna? „Okkur finnst
poddarnir eiginlega ekki hafa neitt
nema kosti. Þeir eru hagkvæm-
ir í rekstri og fólk sækist eftir þeim,
hrífst af laginu, þessum mjúku lín-
um. Það fyrsta sem allir gera þegar
þeir koma inn í poddana er að reka
upp stór augu og segja; „þetta er
miklu stærra og rýmra en ég hélt.“
Þeir leyna nefnilega á sér,“ segir
Steinar og blaðamaður viðurkennir
að hafa gert einmitt það sama. „En
þar fyrir utan held ég að ferðamenn
sem koma hingað til lands, einkum
að vetri, séu í auknum mæli farnir
að leita að hagkvæmari gistikostum
en hótelherbergjum og gistiheimil-
um. Poddarnir eru í sambærilegum
verðflokki og hostel, en sérherbergi
og miklu meiri þægindi. Eftirspurn-
in flóði yfir okkur eftir að við fórum
að selja gistingu í poddana allt árið
um kring,“ segir Steinar. „Ferða-
menn eru líka mjög vel upplýstir. Í
gegnum bókunarsíður fær fólk mik-
ið af upplýsingum og veit nákvæm-
lega hvað það er að borga fyrir og
hvað það á að fá fyrir peninginn.
Það er mikil eftirspurn eftir hag-
kvæmri gistingu og við reynum að
mæta henni,“ segir hann.
Ferðaþjónustan að
finna fjölina sína
Að nýju poddunum meðtöldum er
gistirými fyrir milli 75 og 80 manns
í Fossatúni og reksturinn geng-
ur afar vel að sögn Steinars. „Bók-
anir í vetur hafa verið það góðar að
við ákváðum að opna veitingastað-
inn núna 1. mars og reiknum með
að hafa opið hér eftir, allt árið um
kring,“ segir hann. „Þeir sem gista
í poddunum hafa þá val um að elda
í sameiginlega eldhúsinu eða borða
á veitingastaðnum. Hér er morgun-
matur, hádegis- og kvöldverður og
hægt að kaupa kaffi og með því allan
daginn. Við fundum fyrir því að það
var kallað eftir því að veitingastað-
urinn væri opnaður og við ákváð-
um því að slá til,“ segir Steinar en
bætir því við að það eigi við um allt
í þessum geira. „Ferðaþjónustan er
ennþá aðeins að finna sína fjöl. Við
sem stöndum vaktina gerum okk-
ar besta við að huga að óskum fólks
og bregðumst við þeim eftir bestu
getu. Í vetur hafa verið milli 30 og
40 manns í gistingu á hverjum degi.
Við reynum að læra af þessu fólki og
öðrum gestum hvað við gerum vel
og hvað við gætum gert betur,“ seg-
ir hann. „Núna erum við til dæmis
að reyna að bæta þráðlausa netsam-
bandið í poddunum lengst frá mót-
tökunni og veitingastaðnum. Við
erum á örbylgjutengingu sem gerir
málið aðeins flóknara en við reynum
að finna út úr þessu,“ segir Steinar.
„Ýmiss infrastrúktúr í landinu, eins
og bara netsamband og samgöng-
ur, er ótrúlega mikið á eftir miðað
við þann vöxt sem hefur átt sér stað
undanfarin ár,“ segir hann og bæt-
ir því við að með betri samgöng-
um gæti Fossatún notið sín enn bet-
ur. „Staðsetningin hér í Fossatúni
er einstaklega góð. Ferðafólki þykir
staðurinn mjög miðlægur og hent-
ugur. Héðan fer fólk í ferðir í Þjóð-
garðinn á Snæfellsnesi einn daginn
og Gullna hringinn hinn daginn.
Sem dæmi eru ekki nema um 60 km
á Þingvelli ef farið er um Uxahryggi.
Um leið og vegurinn þar var lagað-
ur fundum við fyrir aukinni umferð.
Ég myndi vilja fá góðan malbikaðan
veg um Lundarreykjadal. Ef sam-
göngur væru betri myndi góð stað-
setning njóta sín enn betur,“ segir
Steinar Berg Ísleifsson að endingu.
kgk
Timburtjöldin hafa fest sig í sessi í Fossatúni:
„Eftirspurnin eftir poddunum þreföld á við aðra gistingu“
Steinar Berg Ísleifsson, eigandi og framkvæmdastjóri Fossatúns, við einn af poddunum í Fossatúni.
Þorpsbragur er að færast yfir svæðið og Steinar segir að góð og notaleg stemning
myndist oft meðal þeirra sem dvelja í poddunum hverju sinni.
Hér sjást sex af þeim níu poddum sem nýlega var bætt við í Fossatúni. Eru þeir nú
orðnir 17 samtals. Framundan er frágangur í kringum nýju poddana um leið og
veður leyfir.
Þegar blaðamaður var að taka saman föggur sínar að viðtali loknu
tók Steinar til við að opna póstinn. Þar leyndist viðurkenningarskjal
frá bókunarsíðunni Booking.com þar sem Fossatún hefur ein-
kunnina 9,3. Steinar var að vonum hæstánægður með sendinguna.
Innan úr einum poddi af stærri gerðinni, svokölluðum fjöl-
skyldupodda. Eins og sjá má er rúm í litlu herbergi í endanum og
ljósmyndari situr á endanum á tvíbreiðu rúmi.
Horft inn í einn af hefðbundinni stærð.