Sveitarstjórnarmál - jun. 2019, Side 15

15
húsnæði fyrir verslun og þjónustu. Jafnvel
hótel sem gert er ráð fyrir á landfyllingu
við Sementsbryggjuna en langt er síðan
hótel var starfrækt á Akranesi.
Sigurður Páll segir að gert sé ráð fyrir að
húsnæði undir verslun og þjónustu verði
20-25 prósent byggingarmagns á reitnum
en áformað er að byggja þar 360 íbúðir.
Því má ætla að um eitt þúsund manns
muni búa á reitnum þegar hann verður
fullbyggður. Það er ansi hátt hlutfall af
núverandi íbúafjölda á Akranesi sem telur
ríflega sjö þúsund manns.
Að sögn Sigurðar Páls er nú unnið
að þarfagreiningum og undirbúningi
að markaðssetningu lóða. Ljóst þykir
að reiturinn verði markaðssettur um
allt land en markaðssetning mun
væntanlega ekki síst beinast að íbúum
höfuðborgarsvæðisins. Aðeins er um
25 mínútna akstur milli Akraness og
útjaðars höfuðborgarsvæðisins og sækir
fjöldi íbúa á Akranesi nám og vinnu á
höfuðborgarsvæðinu nú þegar.
Fjölgun íbúa
Sigurður Páll segist búast við að stór hluti
íbúa á svæðinu verði hrein viðbót við
núverandi íbúafjölda. Það ætti þó ekki að
hans mati að kalla á breytingu innviða á
borð við skóla og leikskóla því áætlað er
að núverandi innviðir geti staðið undir allt
að tíu þúsund manna byggð.
Vegna mikils kostnaðar við niðurrif og
með tilliti til kosta reitsins telur Sigurður
Páll ekki ólíklegt að verð lóða á reitnum
verði í hærri kantinum miðað við lóðaverð
á Akranesi að öðru leyti en engar
ákvarðanir liggja enn fyrir um það.
Skemmtilegur staður til að búa á
ASK arkitektar unnu deiliskipulag
að reitnum fyrir Akraneskaupstað. Í
greinargerð segir að skipulagssvæðið
sé tíu hektarar að stærð. Reiturinn verði
mikil lyftistöng fyrir miðbæ Akraness
og muni bæta útlit og ásýnd bæjarins. Í
deiliskipulagsvinnunni var lögð áhersla
á fjölbreytni í útliti húsa og húsagerða.
Hverfið verði þannig iðandi af lífi og
„skemmtilegur staður til að búa á og
heimsækja.“ Byggðin verður fremur
lágreist eða yfirleitt tvær til fjórar hæðir.
Talin eru nokkur markmið sem höfð voru
að leiðarljósi í deiliskipulagsvinnunni:
• Lögð verði áhersla á tengsl byggðar
við miðbæ, höfn og Langasand.
• Horft verði meðal annars til
ferðaþjónustu, til dæmis með byggingu
hótels.
• Heildstæðar götumyndir.
• Útsýni yfir sjóinn.
• Fjölbreyttar lausnir almenningsrýma
með áherslu á sól, skjól og upplifun.
• Leggja áherslu á gangandi umferð.
Áhersla á gangandi og hjólandi
Tryggja á gott aðgengi um svæðið
fyrir gangandi og hjólandi umferð
en að aðkoma akandi umferðar inn
í bílakjallara verði „lágstemmd“ og
falli inn í byggðarmynstur svæðisins.
Í deiliskipulaginu er gert ráð fyrir að
byggð þéttist eftir því sem nær dregur
miðbænum með stökum húsum næst
Langasandi.
Svæðið er sagt liggja vel við samgöngum
á Akranesi. Góðar tengingar eru við
stofnbrautir og þolir gatnakerfið í kring
mjög vel þá umferð sem bætist við vegna
uppbyggingarinnar. Lögð er áhersla á
góðar göngutengingar um svæðið og
jafnframt við aðliggjandi svæði, svo sem
Akratorg og Langasand.
Einstakt og spennandi verkefni
Sævar Freyr Þráinsson, bæjarstjóri á Akranesi, er afar
spenntur fyrir uppbyggingunni sem framundan er á
Sementsreitnum. Hann segir það mikið fagnaðarefni að
niðurrifi verksmiðjunnar skuli vera að ljúka svo bærinn geti
farið að einbeita sér að uppbyggingunni.
„Það er einstakt og afar spennandi verkefni að vera
að byggja upp svo glæsilegan íbúðareit sem mynda
mun nýjan miðbæ með tengingu við gamla miðbæinn.
Umhverfið verður einstakt með útsýni til hafs í suður
og í nágrenni við höfnina og Langasandinn sem er
eina bláfánaströnd landsins. Þetta verður sannkölluð
andlitslyfting fyrir Akranes og ég er sannfærður um að íbúðir á Sementsreitnum
eiga eftir að verða mjög eftirsóttar, ekki bara af Akurnesingum heldur langt út fyrir
okkar raðir. Í deiliskipulaginu er kapp lagt á að skapa fallegt, umhverfisvænt og
skemmtilegt umhverfi fyrir íbúana og byggðin verður þannig að hún mun henta
öllum aldurshópum. Það er mikið tilhlökkunarefni að sjá þetta verða að veruleika
á næstu árum,“ segir Sævar Freyr.
GJÖRBREYTT ÁSÝND AKRANESS
Sigurður Páll Harðarson, sviðsstjóri skipulags-
og umhverfissviðs Akraneskaupstaðar.
Nú bíður Sementsreiturinn
þess hljóður að vinnu-
vélarnar mæti til leiks á ný til
að byggja.