Morgunblaðið - 08.10.2020, Síða 12

12 FRÉTTIR
Sigtryggur Sigtryggsson
sisi@mbl.is
Verður styttan af Jónasi Hallgrímssyni flutt úr
Hljómskálagarðinum vestur á Mela, í námunda
við Hús íslenskunnar og Þjóðarbókhlöðuna?
Þetta lagði Sigurður E. Þorvaldsson læknir til í
grein í Morgunblaðinu 3. september sl.
Morgunblaðið ákvað að kanna hvort þessi
hugmynd Sigurðar yrði mögulega að veruleika.
Í ljós kom að engar ákvarðanir hafa verið tekn-
ar, hvað sem síðar kann að verða, enda nægur
tími til stefnu. Sigurður læknir leggur til í grein
sinni að styttan verði færð á Degi íslenskunnar,
afmælisdegi Jónasar. Það verður alla vega ekki
á næsta afmælisdegi listaskáldsins, en Jónas
fæddist 16. nóvember 1807.
Styttan af Jónasi Hallgrímssyni er á skrá
yfir þau útilistaverk sem eru í eigu og umsjá
Reykjavíkurborgar, upplýsir Ólöf Kristín Sig-
urðardóttir, safnstjóri Listasafns Reykjavíkur.
Styttan var reist fyrir forgöngu Stúdentafélags
Reykjavíkur. Höfundur er Einar Jónsson og er
verkið ársett 1905 en var sett upp við Lækjar-
götu 1907 en síðar fundinn staður í Hljómskála-
garði eða árið 1947. Hús íslenskunnar við Arn-
grímsgötu stendur á lóð Háskóla Íslands og
hafa ekki átt sér stað viðræður um flutning
styttunnar að húsinu, segir Ólöf.
Reykjavíkurborg á styttuna og Háskólinn
lóðina svo flutningur hennar er á borði stjórn-
enda þeirra. Væntanlega með aðkomu stjórn-
enda Árnastofnunar.
„Oft koma upp hugmyndir um flutning úti-
listaverka og eru þær ætíð skoðaðar með opn-
um huga og þá einkum litið til þess hvort breytt
viðhorf, framkvæmdir eða umhverfishönnun
kalli á nýja staðsetningu en einnig þarf að horfa
til kostnaðar. Glæsilegur arkitektúr nýbygg-
inga á borð við Hús íslenskunnar býður upp á
tækifæri til nýsköpunar og gerð listaverka sem
vekja nýjar kynslóðir til vitundar um menning-
arsögu landsins og þá sem lögðu hönd á plóg,“
bætir Ólöf við.
Sigurður E. Þorvaldsson segir í grein sinni
að í ljósi sögunnar hafi flutningur styttu Jón-
asar í Hljómskálagarðinn ekki reynst farsæl
ráðstöfun, þótt ugglaust hafi hún verið gerð af
góðum hug.
„Nú líða dagar án þess að styttan – reist til
að halda minningu Jónasar á lofti – minni í fá-
förnum Hljómskálagarðinum nánast nokkurn
mann á að þjóðin hafi átt þetta ástsæla skáld
sem greiddi stúlkunni lokka við Galtará, eggj-
aði til endurreisnar Alþingis – og lýsti atvikinu
svo ljóslifandi að okkur finnst við hafa verið við
Gunnarshólma þegar Gunnar sneri aftur,“ seg-
ir Sigurður m.a. í grein sinni.
Morgunblaðið/sisi
Listaskáldið Stytta Jónasar er nú í trjálundi í Hljómskálagarðinum. Skáldið er í frakka að sinn-
ar tíðar sið, stingur hægri hendi inn undir frakkann og heldur á blómi í vinstri hendinni.
Verður stytta
Jónasar flutt
vestur á Mela?
 Borgin á styttuna en Háskólinn á lóð Húss ís-
lenskunnar  Hljómskálagarður óheppilegur?