Lögmannablaðið - 2018, Blaðsíða 17

Kolbrún: Það er öðruvísi streita, þú stjórnar hlutunum
meira. Það er ætlast til þess að fulltrúar vinni ákveðin
verkefni og þeir eru með skilafrest. Svo er hlaðið á þá
verkefnum.
Daníel: Er það menning í lögmennsku að eðli starfsins
sé þannig að það sé unnið myrkranna á milli? Mér
finnst margir lenda í því að vera að vinna um kvöld og
helgar. Ef það er málflutningur á mánudagsmorgni þá
þarf að nota helgina til að undirbúa sig. Ég velti fyrir
mér hvort lögmennska á Íslandi þurfi að vera meira
en fullt starf? Þetta eru óskrifaðar reglur. Allir hinir
fulltrúarnir vinna frameftir þegar þú ferð heim klukkan
fjögur. Enginn segir að þú þurfir að gera það líka en
þetta verður innprentað.
Kolbrún: Já, mér finnst menningin vera þannig. Það er ekki
hægt að ganga að því sem vísu að lögmennska sé eingöngu
frá 8:00-16:00.
Reimar: Ég held að þetta sé mjög mismunandi.
Marta Margrét: Já, ég held að þetta sé rétt. Fall bankanna
leiddi af sér mikla vinnu hjá mörgum lögmönnum og það
er spurning hvernig þetta verður á næstu árum. Svo verður
að hafa í huga að það er grundvallarmunur á hlutverki
og aðstöðu á milli eigenda stofa eða þeirra sem eru í
sjálfstæðum rekstri og fulltrúa, sem eru bara starfsmenn.
Reimar: Af tveimur valkostum, að hafa of mikið að gera
eða of lítið, þá held ég að flesti lögmenn velji fyrr kostinn.
Þetta er lífsviðurværi fólks.
Kolbrún: Fulltrúarnir lenda í því að þurfa uppfylla einhvern
ákveðinn fjölda útseldra tíma til að fá bónusgreiðslu. Það
þarf að gera miklu ítarlegri greiningar á þessu.
Marta Margrét: Það hefur verið skrifað talsvert um þessa
áherslu sem lögð er á útselda tíma. Útseldur tími segir
ekki alltaf allt. Útseldur tími hjá reyndum starfsmanni
getur skilað meiru heldur en hjá óreyndum. Þessi kerfi
geta svo verið ýmiss konar og eftir því sem starfshópurinn
heyrði af virðast þau leggja mismunandi forsendur til
grundvallar. En óháð þessu þá hlýtur það að vera keppikefli
fyrir lögmannsstofur að halda í sitt starfsfólk sem hefur
áhuga á að vera í lögmennsku. Eins og ég nefndi hafa
einstaka stærri stofur reynt að greina hvar vandamálin
liggja og gripið til aðgerða, svo sem í Noregi og Danmörku.
Daníel: Hvað er til ráða?
Marta Margrét: Það vantar ef til vill almennt samtal
við stjórnendur lögmannsstofa á Íslandi. Eins og við
nefnum í skýrslunni er komist að þeirri niðurstöðu í
rannsókn norska lögfræðingafélagsins frá 2011 að það
þurfi viðhorfsbreytingu og það náist meðal annars með
stjórnendum lögmannsstofa.
LÖGMANNABLAÐIÐ TBL 01/18 17