Rauði borðinn : fréttabréf alnæmissamtakanna á Íslandi - 01.12.2012, Blaðsíða 21

21
Aðgerðir sem komnar eru
í gang
Ýmislegt hefur áunnist frá því að
hópurinn var skipaður og verður
hér greint frá nokkrum aðgerðum
hans.
Meðferð
Þar sem talið er mikilvægt
að fagleg áfengis- og
vímuefnameðferð sé veitt og
ástunduð hefur samstarfið á milli
smitsjúkdómadeildar LSH og Vogs
verið eflt og eiga nú hiv-jákvæðir
sprautufíklar greiðan aðgang að
plássi þar.
Hiv-lyf
Farið er að gefa sprautufíklum
í neyslu hiv-meðferð, en þeir
sækja lyfin sín reglulega
til hjúkrunarfræðings á
smitsjúkdómadeild LSH og fá
þá yfirleitt samtal um leið og
stundum við félagsráðgjafann
líka. Náðst hefur gott samstarf á
milli borgarvarða og göngudeildar
smitsjúkdóma sem keyra fíkla í
virkri neyslu á göngudeildina til
að sækja hiv-lyfin. Það hefur mikið
að segja fyrir meðferðarheldni
lyfjanna. Þeir láta líka deildina
vita ef einhver hefur farið í
meðferð. Meirihluti sprautufíkla
eru núna á lyfjum, sem er
mjög jákvæð þróun og í anda
markmiða Sóttvarnastofnunar
Evrópusambandsins (ECDC).
Lyfin eru lífsnauðsynleg
sprautufíklinum og draga verulega
úr smithættu sé skipst á sprautum
eða stundað óvarið kynlíf.
Sprautur og smokkar
Sóttvarnalæknir styrkti
heilsubílinn Frú Ragnheiði í
upphafi árs 2012 til kaupa á
einnota búnaði, þ.e. nálum sem
ekki er hægt að endurnýta og
blöndunarbúnaði. Þannig má
betur koma í veg fyrir útbreiðslu
hiv, lifrarbólgna og sýkinga. Einnig
hafa samtökin HIV-Ísland verið
styrkt til kaupa á smokkum fyrir
hiv-jákvæða árið 2011 og 2012
í viðbót við styrkinn til að halda
fræðsluerindi um hiv í skólum.
Húsnæði
Samstarfshópurinn fundaði með
yfirmönnum þjónustumiðstöðvar
Miðborgar og Hlíða um stöðu
mála og samstarfsfleti. Farið var
á þeirra vegum í vettvangsferð
og skoðað húsnæði fyrir fíkla
og sprautufíkla í Reykjavík.
Gengið hefur nokkuð betur
að fá viðunandi húsnæði
fyrir sprautufíkla á þessu
ári þótt róðurinn sé enn
þungur. Fundað var með
borgarvörðum Reykjavíkur
og þeir m.a. beðnir um að
gera úttekt á húsnæðisþörfum
utangarðsmanna, sem taldir eru
vera um 180 manns í Reykjavík
í dag. Óskað var eftir því að
húsnæðisvandi fíkla yrði jafnframt
greindur eftir því hvers kyns
neyslu væri um að ræða svo betri
upplýsingar fengjust um þörfina
fyrir húsnæði og hvers konar
húsnæði hentaði best.
Málþing
Þann 25. október 2012 átti
samstarfshópurinn frumkvæði
að málþingi fyrir lyfjafræðinga
sem var skipulagt í samstarfi við
Lyfjafræðingafélag Íslands. Heiti
málþingsins var Málþing um
sprautufíkla – aukin fagmennska,
betri þjónusta og héldu fimm
sérfræðingar um málefni
sprautufíkla erindi. Málþingið
var mjög vel sótt og almenn
ánægja með það. Stefnt er að því
að halda fleiri slík málþing og þá
fyrir aðrar stéttir sem koma að
þjónustu við sprautufíkla eins og
starfsfólk félagsþjónustunnar,
lögreglunnar og fangelsisyfirvalda.
Einnig hefur verið fundað með
fíklunum sjálfum, t.d. í fangelsum,
og haldnir fræðslufundir fyrir
Hjálpræðisherinn, Samhjálp
og starfsfólk fíknideilda LSH.
Fyrir liggur að halda fleiri
fræðsluerindi.
Tölfræði
Til að afla betri tölfræðilegra
upplýsinga um sprautufíkn,
viðhorf, áhættuhegðun og
viðhaldsmeðferð sprautufíkla
á Íslandi hleypti Vogur af
stokkunum rannsókn í formi
ítarlegs spurningalista meðal
þeirra sem lögðust inn á Vog í
febrúar 2012. Niðurstaðna er
að vænta eftir að rannsókninni
lýkur í febrúar 2013. Samkvæmt
tillögum ECDC þarf að finna
leiðir til að fá góðar tölfræðilegar
upplýsingar um þessa þætti. Þær
skipta máli fyrir skipulagningu
og endurskoðun aðgerða sem eru
viðhafðar.
Í lokin
Formlegu samstarfi
samstarfshópsins mun væntanlega
ljúka bráðlega með afhendingu
skýrslu til sóttvarnaráðs um
mögulegar aðgerðir til að stemma
stigu við útbreiðslu hiv meðal
sprautufíkla á Íslandi. Það skiptir
miklu máli að þeir sem koma að
málum sprautufíkla taki höndum
saman til að sporna við fleiri
hiv-sýkingum meðal þeirra.
Þannig má efla lífsgæði þeirra og
öryggi. Skýrsla samstarfshópsins
um málefni sprautufíkla verður
vonandi skref í þá átt.
Sigurlaug Hauksdóttir
Félagsráðgjafi hjá Embætti
landlæknis og á Landspítalanum