Rauði borðinn : fréttabréf alnæmissamtakanna á Íslandi - 01.12.2012, Blaðsíða 22

Alþjóðleg
ráðstefna í
Washington DC
sumarið 2012
Alheimsráðstefnan sem haldin var í
höfuðborg Bandaríkjanna í sumar,
var fyrsta alþjóðlega ráðstefnan
um hiv og alnæmi þar í landi í
áratugi vegna ferðahamlana sem
hiv-jákvæðir hafa mátt búa við og
Bush eldri kom á í byrjun níunda
áratugarins. Þessar ferðahamlanir
voru svo sannarlega umdeildar og
var ekki aflétt fyrr en í tíð núverandi
forseta, Obama. Fyrir marga, og ekki
síst fólk sem er búsett í þessu mikla
ríki, markaði þessi alheimsráðstefna
því tímamót. Umfang ráðstefnunnar
var viðamikið en skipulag
hennar var gott og allt gekk upp.
Það er líka hvetjandi að finna
samkenndina sem jafnan ríkir
meðal hiv-jákvæðra á fundum sem
þessum. Gríðarlegt úrval var að
finna á efnissskrá ráðstefnunnar
og fyrirlestrar og málstofur sem
undirritaður sótti fjölluðu um
nýjustu meðferðarúrræði, forvarnir
og mannréttindi hiv-jákvæðra.
Það ríkti meiri bjartsýni á þessu
heimsþingi en undirritaður hefur
nokkurn tímann upplifað í 30 ára
baráttusögu gegn hiv og alnæmi.
Dregið hefur úr útbreiðslu hiv á
heimsvísu og eru um 8 milljónir
manna komnar á lyfjameðferð
í heiminum. Lyf verða sífellt
aðgengilegri og betri og það hjálpar
til við að hefta útbreiðslu veirunnar.
Alþjóðleg samþykkt hefur að
markmiði að 15 milljónir manna
verði komnar á lyfjameðferð árið
2014. Menn eru jafnframt mjög
bjartsýnir á að fundið verði bóluefni
sem hentar innan fárra ára.
Mannréttindabrot eru framin gegn
hiv-jákvæðum í miklum mæli um
allan heim. Ofbeldi, fyrirlitning
og virðingarleysi hafa viðgengist
í garð hiv-jákvæðra frekar en
gengur og gerist meðal annara
hópa í samfélaginu. Ferðahömlur
eru því miður algengar og 46 ríki
og landsvæði í heiminum hafa
einhverskonar hömlur á ferðalögum
hiv-jákvæðra.
Hiv-veiran breiðist enn nokkuð
út í Austur-Evrópu og Mið-Asíu
og er eiturlyfjaneysla, áhættusöm
kynhegðun og neikvæður
félagslegur stimpill sem fylgir því
að sækja sér ráðgjöf og meðferð
ekki til að laga ástandið. Aðgengi að
þjónustu vegna hiv hefur almennt
aukist í lág- og meðaltekjulöndum
og meðferð og umönnin er almennt
að verða skilvirkari um allan heim.
Forvarnarstarf sem nær til þeirra
sem eru í hvað mestri smithættu
– fólks sem stundar vændi,
eiturlyfjaneytenda og karla sem
stunda kynlíf með körlum, er enn
allt of takmarkað.
Aldrei hefur verið eins brýnt að
taka höndum saman og vinna gegn
útbreiðslu hiv á heimsvísu og nú,
þegar þekking, tækni og leiðir eru til
staðar. Vinna þarf saman af samhug,
mannúð og víðsýni, því ef vel er
staðið að málum án fjárhagslegra
hindrana er hægt að koma
einhverkonar böndum á útbreiðslu
sjúkdómsins á komandi árum líkt og
gerðist með berklana.
Alheimsráðstefnan var fræðandi
og hvetjandi. Þeir sem hafa
áhuga á að fræðast meira geta
nálgast efni frá ráðstefnunni á
Hverfisgötunni jafnframt er hægt
að fara á vefslóðina:
http://www.aids2012.org
og þar er að finna allt sem í boði
var á ráðstefnunni og niðurstöður
hennar.
Næsta alheimsráðstefna verður
haldin í Melbourne í Ástarlíu 18.-
23. júlí árið 2014. Sjá
http://www.aids2014.org
Einar Þór Jónsson