Fréttablaðið - 19.06.2021, Side 58

Helga Dögg Björgvinsdóttir
er varaformaður Kvenrétt-
indafélags Íslands. Hún
segir að áhuginn á jafn-
réttismálum hafi komið með
móðurmjólkinni en móðir
hennar, Esther Ragnheiður
Guðmundsdóttir, var um
tíma formaður þessa sama
félags.
sigriduringa@frettabladid.is
„Kvenréttindabaráttan var allt um
lykjandi þegar ég var að alast upp
og ég varð mikill femínisti strax
sem krakki. Ég var oft með mömmu
niðri á Hallveigarstöðum og fékk að
leika mér þar. Eftir tvítugsaldurinn
fór ég að láta meira til mín taka í
jafnréttismálum en líkt og margar
ungar konur fór ég að rekja mig á
ýmsa veggi, bæði innan háskólans
og á atvinnumarkaðnum,“ segir
Helga Dögg, sem vinnur hjá upplýs-
ingatæknifyrirtækinu Crayon.
Hún gekk til liðs við Sjálfstæðis-
flokkinn og var um tíma formaður
Landssambands sjálfstæðiskvenna
en sagði sig svo síðar úr flokknum.
„Mér finnst ég hafa miklu meiri
áhrif á samfélagið með því að starfa
innan Kvenréttindafélagsins en
innan stjórnmálaflokks. Þar gat
oft verið strembið að láta sína rödd
heyrast. Við konurnar sem vorum
í Sjálfstæðisflokknum náðum þó
nokkrum málum í gegn og mér
fannst til dæmis stórsigur að á
landsfundi var sett inn í stefnuskrá
Sjálfstæðisflokksins að jafn-
réttismál yrðu eitt af grunngildum
flokksins. Hins vegar upplifði ég að
konum gekk illa í prófkjörum og
það var tregða til að hleypa fleiri en
einni til tveimur konum ofarlega á
lista. Vonandi er það að breytast, en
það var mikil íhaldssemi á sumum
sviðum innan flokksins þegar ég
var þar innanbúðar,“ segir Helga
Dögg.
Góð samstaða í hópnum
Tilurð þess að hún gekk til liðs við
Kvenréttindafélagið má rekja til
þess að Helga Dögg var fengin til að
tala á fundi félagsins um hvernig
Sjálfstæðiskonur upplifðu jafnrétt-
ismál innan flokksins og hvernig
konum farnaðist almennt í stjórn-
málum. „Þar hitti ég þáverandi for-
mann og framkvæmdastjóra KRFÍ,
sem spurðu hvort ég hefði áhuga
á að koma í stjórn en þá var stutt í
næsta aðalfund. Ég sló til og bauð
mig fram og síðan eru liðin tæp tíu
ár. Um tíma var ég ritari en síðustu
tvö árin varaformaður,“ segir Helga
Dögg, en starfið er unnið í sjálf-
boðaliðavinnu.
„Þetta er frábær hópur og góð
samstaða í hópnum. Innan félags-
ins eru ólíkar konur en við náum
alltaf að tala okkur saman að sam-
eiginlegri niðurstöðu, sem er alveg
magnað. Við erum óhræddar við
að láta í okkur heyra úti í samfélag-
inu og finnum að það er hlustað á
okkur. Stjórnvöld kalla okkur til,
til að heyra hvað okkur finnst um
ýmis mál og við skrifum mikið af
umsögnum um frumvörp til laga,“
segir Helga Dögg.
Vill að konur njóti sannmælis
Innt eftir því hver hafa verið hennar
helstu baráttumál segir Helga Dögg
að þau séu mörg. „En fyrst og fremst
að konur njóti sannmælis. Að þegar
konu og karli er stillt upp hlið við
hlið, með sömu menntun og starfs-
reynslu, sé konan ekki endalaust
vanmetin og karlinn ofmetinn.
Það er stundum ótrúlegt hversu oft
hallar á konur í þessum efnum. Ég
brenn líka fyrir því að stúlkurnar
okkar þurfi ekki að alast upp við
það misrétti að þær eigi mögulega
eftir að hafa lægri laun en strákar
fyrir sömu vinnu. Mér finnst líka
mikilvægt að konur hafi mögu-
leika á sama framgangi í starfi og
karlar. Oft gleymist að konur hverfa
um tíma frá vinnumarkaði vegna
til dæmis barneigna, eða vegna
þess að þær eru að sinna veikum
börnum eða öldruðum foreldrum.
Það hefur ekki bara áhrif á tekjur
þeirra akkúrat á þeim tíma heldur
líka þegar kemur að því að þær fara
á eftirlaun, því þetta hefur kjara-
skerðingaráhrif á þeirra lífeyri,“
bendir Helga Dögg á.
Hún segir að vissulega séu
Íslendingar framarlega í jafnréttis-
málum miðað við margar aðrar
þjóðir. „Á sumum sviðum erum við
hálfgerðar rokkstjörnur í þessum
efnum en svo er margt sem enn
þarf að laga. Við þurfum til dæmis
að laga launamálin en meirihluti
þeirra sem eru í láglaunastörfum
eru konur, en meirihluti þeirra sem
er í hálaunastörfum eru karlar,“
segir Helga Dögg.
Þá nefnir hún að #metoo-
byltingin sé ótrúlega mikilvæg
fyrir alla. „Hún hefur opnað augu
karlmanna fyrir ýmsu sem hingað
til hefur ekki verið vandamál í
þeirra augum. Um leið og farið er
að tala opinskátt um kynbundið
ofbeldi átta þeir sig á að það er
eitthvað sem ekki er í lagi og þarf
að breyta,“ segir Helga Dögg, sem
er líka hugsandi yfir umræðu um
Only Fans.
„Við þurfum að skoða hvaðan
sú hugsun kemur inn í kollinn á
drengjunum okkar að það sé í lagi
að borga fyrir aðgang að líkama
annarra. Við eigum að ala alla upp í
að það sé jafn óeðlilegt og að okkur
finnst óeðlilegt að ganga um með
skotvopn. Ég held að það sé mikil-
vægt fyrir framtíðina að koma
kynjafræði og meiri kynfræðslu
inn í námsskrá bæði grunn- og
framhaldsskóla. Það væri skref í
rétta átt,“ segir Helga Dögg. ■
Höfum sterka rödd
Helga Dögg
segir það hafa
verið skrifað í
skýin að hún
hellti sér út
í jafnréttis-
baráttu. „Ég
brenn fyrir því
að stúlkurnar
okkar þurfi ekki
að alast upp við
það misrétti að
þær eigi mögu-
lega eftir að
hafa lægri laun
en strákar fyrir
sömu vinnu,“
segir hún.
MYND/EYÞÓR
ÁRNASON
Raquelita Aguilar tók við
starfi forstöðumanns staf-
rænnar þróunar hjá Isavia
í byrjun maí síðastliðinn.
Hún segist vera spennt fyrir
komandi tímum enda ætli
fyrirtækið sér stóra hluti
þegar kemur að tækni í
rekstri flugvallarins og far-
þegaupplifun.
Raquelita byrjaði að vinna sem
prófari hjá Stokki Software
árið 2015 og þróaðist þar í starfi
sem gæða- og verkefnastjóri. „Í
byrjun árs 2018 tók ég svo við
sem rekstrarstjóri. Í júlí sama
ár útskrifaðist ég sem tölvunar-
fræðingur og mánuði eftir útskrift
var mér boðin staða framkvæmda-
stjóra Stokks sem ég sat í þar til ég
kom til Isavia. Hjá Stokki öðlaðist
ég dýrmæta reynslu sem hefur og
mun nýtast mér mjög í starfi mínu
hjá Isavia,“ segir Raquelita.
Fyrri kynni flugvallarins
Raquelita segist hafa kynnst
starfsemi flugvallarins þegar hún
starfaði í sumarafleysingum hjá
lögreglunni 2012–2015. „Ég var
meðal annars í landamæraeftir-
litinu uppi á flugvelli. Ég er því
kunnug þeim hluta flugvallarins
þar sem ég lærði meðal annars
hverjir mega koma inn á Schengen-
svæðið og hverjir ekki, ásamt því
að þekkja fölsuð skilríki og skilríki
sem verið er að misnota.“
En hvernig kom til að þú sóttir
um starfið hjá Isavia?
„Ég var í raun ekki að leita mér
að starfi enda ánægð hjá Stokki.
Svo var mér bent á starfsaug-
lýsinguna frá Isavia og fannst hún
hljóma spennandi. Ég ákvað því
að senda inn umsókn. Mig langaði
líka til að sjá hvar ég stæði þegar
kæmi að því að sækja um svipaða
stöðu hjá fyrirtæki eins og Isavia.
Eftir að hafa komist í fyrsta starfs-
viðtalið opnaðist nýr tækniheimur
fyrir mér sem mig langaði að fá að
kynnast betur,“ segir Raquelita.
Stafrænar lausnir
Hlutverk einingarinnar sem
Raquelita leiðir hjá Isavia er að
styðja við þarfir annarra rekstrar-
eininga Isavia þegar kemur að
upplýsingatækni og stafrænum
lausnum. „Eitt af okkar hlut-
verkum er að þarfagreina, velja
tæknilausnir og innleiða þær með
hagsmunaaðilum, í samræmi við
stefnu og kröfur Isavia. Við erum
einnig að byggja upp vöruhús
gagna og erum að leggja enn meiri
áherslu á viðskiptagreind og styðja
þannig við gagnadrifnari hugsun
og upplýstari ákvarðanatöku
innan Isavia.“
Ný deild
Það fyrsta sem Raquelita gerði
þegar hún tók við starfinu var að
ráða inn nýja starfsmenn í teymið
enda var af nægum verkefnum
að taka. „Starfið mitt og deildin
mín, sem heitir Stafræn þróun, er
alveg ný eining hjá Isavia og þar
fæ ég tækifæri til að taka þátt í að
móta mjög mikilvæga stoðeiningu
hjá fyrirtæki sem hefur sérstöðu í
okkar samfélagi og hagkerfi. Það er
mikil uppbygging í gangi hjá allri
Isavia-samstæðunni, sérstaklega
þegar kemur að stafrænni þróun,
viðskiptagreind og upplýsinga-
tækni. En það er einungis rúmt
ár síðan sviðið sem ég er undir,
Stafræn þróun & upplýsingatækni,
var stofnað. Þar á undan var ekki
mikil áhersla á upplýsingatækni
eða stafræna uppbyggingu.
Tæknileg uppbygging félagsins
sem snertir innviðina, flugvöllinn
og farþegaupplifun, er risastórt
og margra ára verkefni sem mér
finnst alveg hrikalega spennandi
og það eru forréttindi að fá að taka
þátt í að byggja það upp og þróa. Ég
fann strax fyrir mikilli jákvæðni
hjá Isavia og allir eru tilbúnir til
að fara í breytingar og gera nýja og
spennandi hluti.“
Spennt fyrir næstu verkefnum
Raquelita segist vera full eftirvænt-
ingar að taka við og þróa verkefni
næstu ára. „Ég hlakka mikið til
að fara að hlaupa almennilega af
stað en eðlilega gengur allt aðeins
hægar en maður ætlar sér þegar
maður er að komast inn í nýtt starf.
Næstu verkefni eru helst að stækka
teymið enn frekar, innleiða lausnir
og ferla þvert á samstæðuna og
byggja upp vöruhúsið okkar og
viðskiptagreind. Allt þetta mun
styðja við framtíðarplön flug-
vallarins til næstu ára. Við ætlum
okkur nefnilega stóra hluti þegar
kemur að tækni í rekstri f lugvallar-
ins og farþegaupplifun.“ ■
Tæknileg og spennandi verkefni fram undan
Raquelita Aguilar er forstöðumaður nýstofnaðrar deildar Isavia sem snýr að stafrænni þróun fyrirtækisins.
MYND/AÐSEND
Ég hlakka mikið til
að fara að hlaupa
almennilega af stað en
eðlilega gengur allt
aðeins hægar en maður
ætlar sér þegar maður er
að komast inn í nýtt
starf.
6 kynningarblað 19. júní 2021 LAUGARDAGURKVENRÉTTINDADAGUR