Lögmannablaðið - 2021, Blaðsíða 15
LÖGMANNABLAÐIÐ TBL 02/21 15
ÉG ER … DÁLEIÐARI, ORKUHEILARI OG
RITHÖFUNDUR
Sara Pálsdóttir lögmaður hjá lögmannsstofunni Lausnum er dáleiðari og orkuheilari
og hjálpar fólki til að fá frelsi frá kvíða, eyða streitu, þreytu og verkjum svo fátt eitt
sé nefnt.
Hvað kemur til að þú fórst í dáleiðslu og orkuheilun?
„Fyrir nokkrum árum glímdi ég við mikinn kvíða, brotna sjálfsmynd og krónískt
verkjavandamál. Þetta olli mikilli þreytu og vanlíðan og ég átti orðið erfitt með að
endast heilan vinnudag. Ég var búin að fara til alls kyns lækna og sérfræðinga en það
var ekki fyrr en leitaði inn á við, fór í hugleiðslu og dáleiðslumeðferð, sem að ég fékk
fullan bata. Í því ferli uppgötvaði ég hvað það var sem raunverulega olli kvíðanum og
verkjunum. Í dag hef ég öðlast algert frelsi frá öllum óheilbrigðum kvíða, glími ekki
við neina verki. Í kjölfarið fór að brenna eldur innra með mér að hjálpa öðrum til
að öðlast hið sama og ég fór í dáleiðslunám og lærði einnig orkuheilun. Það var eins og ég væri leidd áfram. Ég man
eftir því þegar ég sat í fyrsta tímanum í dáleiðslunáminu og horfði á töfluna en þar stóð „dáleiðsla 101“. Ég spurði
sjálfa mig hvað ég væri eiginlega að pæla og hvort það ætti ekki frekar að standa „skaðabótaréttur“ eða eitthvað álíka!
Nú býð ég upp á einstaklings- og hópmeðferðir og tvinna saman dáleiðslu og orkuheilun. Ég er með námskeið sem
heita „Frelsi frá kvíða“ og er einnig með hóp á Facebook en þar býð ég upp á ókeypis fræðslu, dáleiðslur o.fl. Ég skrifaði
barnabókina „Litla snareðlan sem gat“ til að hjálpa ungum börnum, sem glíma við kvíða, að velja hugrekkið og hafa
trú á sjálfum sér. Kvíði er alvarlegt og algengt vandamál og það er mikilvægt að fólk viti að það er til lausn.“
Er eitthvað sameiginlegt með því að vera lögmaður og dáleiðari?
„Já. Bæði störfin snúast í grunninn um að hjálpa fólki. Um að hjálpa fólki að komast út úr ástandi eða aðstæðum sem
veldur fólki vanlíðan og yfir í frelsi og betri líðan. Það er líka það besta við bæði störfin!“
Ef þú þyrftir að velja á milli lögmennskunnar og dáleiðslunnar, hvort yrði fyrir valinu?
„Ég færi í dáleiðsluna út af því að ég sinni því af köllun. Þá á ég ekki endilega við um einstaklings dáleiðslurnar heldur
námskeiðin mín. Námskeiðin gefa svo mikið en þótt ég elski lögmannsstarfið og það gangi vel þá munu námskeiðin
verða mitt aðalstarf í framtíðinni.“
Sara Pálsdóttir er með köllun og
segir að orka hafi mikið að segja um
hvernig andleg og líkamleg heilsa
okkar er.
ÉG ER … BÓNDI
Óðinn Elísson lögmaður titlar sig sem refaskyttu í símaskránni
en samhliða lögmannsstörfum sínum hjá Fulltingi er hann bóndi
á Klörustöðum í Kjós. „Ég er með 76 kindur, slatta af hestum og
landnámshænur sem eru skemmtilegar skepnur.“
Hvernig á það saman að vera lögmaður og bóndi?
„Þetta passar fullkomlega saman, þetta er mitt jóga og veitir ró sem
er nauðsynleg í lögmannsstarfinu.“
Ef þú þyrftir að velja á milli, hvort myndir þú velja lögmannsstörf eða bústörf?
„Ég hef ekki þurft að velja á milli, það er kosturinn. Það veitir mér
frelsi.“
Óðinn Elísson markar lamb með fjármarki sínu sem er
sneitt framan hægra og tveir bitar framan vinstra.