Borgfirðingabók - 01.12.2016, Síða 84

84
B O R G F I R Ð I N G A B Ó K 2016
leið að þetta væri gott og fallegt nafn og að hann vonaði að það héldist
lengi í ættinni. Þessi orð afa urðu mér minnisstæð og seinna átti ég eftir
að láta eina af dætrum mínum heita Helgu. Í sama skipti, sagði afi mér
að nafnið á Gústu frænku væri þannig til komið að henni hefði verið
gefið Ágústu nafnið eftir mánuðinum sem hún fæddist í en Ingu nafnið
hefði hún frá móðurömmu sinni Ingveldi. Þar höfðu konur borið þetta
myndarlega nafn í þrjá ættliði en oftast verið kallaðar Ingu nafninu og
líkað það best. Þess má geta að Ingveldur langamma var síðustu æviárin
í Hraundal og voru Ingurnar þá þrjár á heimilinu.
Ytri-Hraundalur var stór og erfið jörð til búskapar og auk þess fremur
afskekkt. Fyrr á tímum lá leið þeirra Borgfirðinga sem áttu erindi í
verstöðvarnar undir Jökli þar um garð. Ég held að Hraundalsárin hafi
verið þeim afa og ömmu mjög erfið og fátæktin mikil, þó þau hafi eflaust
átt þar sínar góðu stundir því sumarfagurt er á þessum slóðum. Ég hef
líka grun um að afi og amma hafi saknað sjávarins og gjafa hans því að
afi var í eðli sínu veiðimaður og hefur örugglega fengist töluvert við
slíkt í Rauðanesi sem þótti dágóð hlunnindajörð. Þar lá lúða stundum
und an landi, rauðmaginn var árviss og einnig svolítil fuglatekja. Enda
fór það svo að þann 20. desember 1920 var undirritaður samningur um
maka skipti á jörðinni Ytri-Hraundal og húseigninni Klöpp í Borgarnesi
sem var í eigu Álftaneshrepps. Mun þetta hafa verið góður kostur fyrir
Álft hreppinga sem vantaði sárlega afréttarland og tóku undan stóran
hluta af jörðinni þegar þeir seldu hana aftur.
Um vorið flutti fjölskyldan í Borgarnes og settist að á Klöpp. Þar
fæddist sjöunda barnið, Jóhanna, þann 20. maí. 1921. Amma var þá á
fertugasta og fimmta aldursári.
Húsið Klöpp var engin höll. Þrátt fyrir eftirgrennslan hefur mér ekki
tekist að hafa upp á stærð þess í fermetrum en húsnæðið samanstóð af
eldhúsi, búri, einu herbergi og svolitlum gangi eða forstofu. Yfir húsinu
var svolítið loft sem mun hafa verið notað sem geymsla. Þetta litla hús
varð heimili afa og ömmu til æviloka og var afi jafnan við það kenndur
og kallaður Keli á Klöppinni. Þegar hér var komið sögu var pabbi farinn
í vist til vandalausra en var þó hjá foreldrum sínum veturinn fyrir
fermingu og gekk þá í skóla. Elstu systurnar fóru líka fljótlega að vinna
fyrir sér og voru í vistum á velmegandi heimilum í Borgarnesi, til dæmis
munu þær allar, nema Jóhanna, hafa verið í vist í læknishúsinu.