AVS. Arkitektúr verktækni skipulag - 01.12.1998, Qupperneq 11

G E S T U R
O
A
O
N
Hannað umhverfi í þéttbýli, myndar nú umgjörð um daglegt líf
lang-flestra íslendinga. Ljósm: sav.
Aþessari öld hefur ísland
breyst úr því að vera eitt
strjálbýlasta land álfunnar
í að vera fyrst og fremst
þéttbýlissamfélag. Hlut-
fallslega fleiri búa nú í
þéttbýli á íslandi en í flestum þjóðlöndum
Evrópu. Á hverju ári, undanfarin ár, hafa
líka hátt í tvö þúsund manns flutt utan af
landi í þéttbýlið á höfuðborgarsvæðinu. Á
þessari öld höfum við einnig orðið sjálf-
stæð þjóð og þurft að axla alla þá ábyrgð
sem því fylgir. Þessum miklu breytingum
og hinu nýja hlutverki íslendinga hafa
óneitanlega fylgt vaxtarverkir, því við höf-
um á einni mannsævi þurft að tileinka
okkur þéttbýlismenningu sem margar aðrar menn-
ingarþjóðir hafa haft árþúsundir til þess að mynda.
Á síðustu árum höfum við líka farið að velta því
fyrir okkur hvernig við gætum tileinkað okkur
vistvæna, sjálfbæra lifnaðarhætti og hafa land-
slagsarkitektar ekki síst verið talsmenn þeirra
hugmynda.
Ekki hafa íslendingar alltaf tekið tveimur höndum
nýjum hugmyndum þeirra sem hafa lært hönnun,
skipulag og umhverfismótun í menntastofnunum
erlendis. Ennþá skortir t.d. mikið á að samvinna
þeirra sérfræðinga sem koma að mannvirkjagerð,
skipulagi og umhverfismótun sé sem skyldi. Enn-
þá reyna einstök þekkingarsvið alltof oft að „gína
yfir“ ákveðnum verkum og útiloka þannig framlag
annarra fræðigreina sem þó gætu oft stuðlað að
mun farsælli framkvæmd en ella. Mannvirkjagerð,
hvar sem hún er á landinu, er ekkert einkamál
viðkomandi framkvæmdaaðila, heldur varðar hún
okkur öll. Þetta þurfa m.a. stjórnmálamenn að
gera sér fulla grein fyrir.
Ennþá finnst samt mörgum brjóstvitið best. Ennþá
finnst mörgum tryggast að leita beint til erlendra
aðila til þess að reyna að ráða fram úr okkar um-
hverfis- og skipulagsmálum og ennþá hæla menn
sér jafnvel af því í fjölmiðlum ef þeir hafa „sloppið
við að láta hanna“ opinberar framkvæmdir. Hvað
sem því líður þá er það engu að síður staðreynd
að íslenskar umhverfismótandi stéttir geta í dag
kennt öðrum þjóðum margt sem lýtur að því að
búa til gott umhverfi á norðlægum slóðum.
Á þeirri tæplega hálfu öld sem íslenskir landslags-
arkitektar hafa unnið íslandi og íslendingum hefur
sérgrein þeirra náð að skjóta hér traustum rótum
og menn eru að gera sér betur og betur grein fyrir
því hvers virði þekking þeirra er. Á 20 ára afmæli
Félags íslenskra landslagsarkitekta óska aðstand-
endur avs þeim alls hins besta um ókomin ár. Þeir
ráða nú þegar yfir mikilli þekkingu sem getur nýst
okkur vel við að gera ísland ennþá byggilegra en
það er og daglegt líf okkar allra bæði skjólbetra,
fegurra og skemmtilegra. ■
9