Iðjuþjálfinn - 2022, Blaðsíða 23

Iðjuþjálfinn I Fagblað iðjuþjálfa23
Þann 20. maí 2022 var Geðdagurinn haldinn í fyrsta sinn,
þverfagleg ráðstefna um geðþjónustu. Ráðstefnan er á
vegum geðþjónustu Landspítala þar sem kynntar eru rann-
sóknir og verkefni sem unnin hafa verið í tengslum við
geðþjónustu á Íslandi. Stefnt er á að ráðstefnan verði árleg
og gaman væri að sjá erindi frá iðjuþjálfum á Geðdeginum
í framtíðinni!
Yfirskriftin á Geðdeginum í ár var „Í TAKT VIÐ TÍMANN –
Þróun-nýsköpun-vísindi“ og fór hann fram á Hótel Natura. Á
ráðstefnunni var m.a. farið yfir stöðu jafningja í geðþjónustu
Landspítala sem er mjög ánægjuleg framþróun þar sem
einstaklingur sem hefur verið skjólstæðingur geðþjónustunnar
er nú starfsmaður. Jafningi miðlar sinni reynslu og veitir
stuðning til skjólstæðinga sem eru nú í þjónustu Landspítal-
ans á sumum deildum. Hér er einnig verið að ýta undir skjól-
stæðingsmiðaða nálgun þar sem jafninginn er með í þróun á
að gera geðþjónustuna notendavænni með því að nýta sína
reynslu og samtöl sín við núverandi skjólstæðinga. Jafninginn
hefur auk þess aðstoðað starfsmenn að aðlaga fræðslu/nám-
skeið að þörfum skjólstæðinga. Stefnan er að ráða fleiri jafn-
ingja í framtíðinni og í fleiri stöðugildi en hingað til hefur einn
jafningi verið í hlutastarfi.
Andrea Björt Ólafsdóttir
iðjuþjálfi á meðferðargeðdeild
í Laugarási 
Einnig var farið yfir IPS (e. individual placement and supp-
ort) í geðþjónustu sem er einstaklingsmiðaður stuðningur
við starfsleit. Eins og iðjuþjálfar vita þá getur það að vera
starfsmaður verið mikilvægt hlutverk fyrir einstaklinga.
Nú er IPS-starfsmaður, þ.e. atvinnutengill, í geðþjónustu
Landspítalans en meðferðargeðdeild í Laugarási hefur auk
þess verið með IPS-verkefni í gangi síðastliðin ár í samstarfi
við VIRK. Í Laugarásnum nýta iðjuþjálfar sér m.a. matstækið
Mat á starfhlutverki (WRI) þegar það er viðeigandi, þar sem
skjólstæðingar, atvinnutenglar hjá VIRK og/eða atvinnutengill
Landspítalans njóta góðs af við atvinnuleit. Iðjuþjálfar geta því
spilað mikilvægt hlutverk í að fólk með geðrænar áskoranir
stundi vinnu eða nám.
Auk þess er vert að nefna að Ragna Kristín Guðbrandsdóttir
læknanemi gerði rannsókn á samfélagslegri virkni ungs fólks
eftir snemmíhlutun í geðrofi á meðferðargeðdeild í Laugarási
sem varpaði m.a. ljósi á mikilvægi náms og vinnu í endurhæf-
ingu ungs fólks. Hægt er að sjá kynningu á rannsókn hennar
inn á Facebook-síðu Laugaráss. 
Kynning:
Geðdagurinn
HRAFNISTA