Veiðimaðurinn - 2024, Side 13

Að auki eru herbergi fyrir starfsmenn í
veiðihúsinu og fyrir leiðsögumenn.
Sérinngangur í nýju álmuna
Nýja álman er byggð til norðurs í framhaldi
af viðbyggingu sem reist var fyrir nokkrum
árum og er nýtt af leiðsögumönnum.
„Það verður hægt að ganga í gegnum
gædahúsið en að öllu jöfnu munu menn
fara út og ganga um sérinngang af því
að maður vill ekki beina fólki í gegnum
eldhúsið,“ segir Ingimundur um aðgengi
veiðimanna að nýju álmunni. Fleira er að
gerast í húsnæðismálunum í Langárbyrgi,
því herbergi veiðimanna í gömlu álmunni
fá andlitslyftingu fyrir sumarið.
Opna lokaða skápa
„Gömlu svefnherbergin eru orðin svolítið
gamaldags,“ segir Ingimundur, sem sjálfur
var í Langá snemma í vor og tók eitt her-
bergið í gegn til prufu. „Ég málaði það og
endurmubleraði til að sjá hvernig það kæmi
út,“ segir hann.
Meðal þess sem var gert var að skipta
út lokuðum skáp fyrir stálgrind. „Menn
hengja þá upp í opinn skáp og gleyma
því engu inni í skápum þegar veiðinni er
lokið,“ segir Ingimundur. Þetta hafi verið
dálítið vandamál. „Það eru alltaf einhverjir
sem kíkja ekki inn í skápana þegar þeir
fara.“
Ingimundur Bergsson segir óhætt að hlakka til spennandi veiðisumars í Langá í sumar. Mynd/Golli
Veiðimaðurinn 13