Golf á Íslandi - 01.12.2010, Blaðsíða 80

80 GOLF Á ÍSLANDI • www.golf.is
Það þarf ekki að kenna Skotum að búa til golfvelli enda talið að íþróttin sé
upprunnin í landinu. Þó svo Skotland sé þekktast fyrir fræga strandvelli þá
er aragrúi flottra skógarvalla og The Carrick við Loch Lomond fjörðinn við
Glasgow er án efa með þeim glæsilegustu.
G O L F vellir
Við Loch Lomond er samnefndur golfvöllur og hefur
hýst Opna skoska mótið á Evrópumótaröðinni undan-
farin ár. Sá völlur er lokaður almenningi en rétt hjá
honum er The Carrick sem við getum kallað litla
bróður. Hann er nefndur eftir Doug Carrick, kana-
dískum golfvallahönnuði sem teiknaði völlinn og
þykir ekki síðri en sá frægari sem er steinsnar frá. Við
hlið Carrick vallarins er 9 holu völlurinn Wee Demon.
Flottur 9 holu golfvöllur og góð tilbreyting frá þeim
stóra sem er yfirleitt meira bókaður og því tilvalið að
ná auka 9 holum ef menn eru í stuði fyrir meira en 18
holur á dag.
Rétt við Carrick völlinn er fimm stjörnu hótelið The
Cameron house sem er í eigu De Vere hótelkeðjunnar.
Cameron house er gamall herragarður. Stórhýsið var
nýlega allt tekið í gegn og er hið glæsilegasta. Í kring-
um hótelið er einnig um hundrað „lodges“ sem eru
nokkurs konar „sumarhús“. Timburklædd og kósý hús
sem hýsa frá 4 upp í 8 manns. Fimm stjörnu stimpill-
inn á svæðinu stendur fyrir sínu því fjölbreytni í golfi
og gistingu er mikil en það ánægjulega er að verðið
(miðað við þokkalegt gengi íslensku krónunnar um
þessar mundir) er bara skaplegt því gæðin eru mikil.
Á hótelinu eru fjórir veitingastaðir, barir og einn
þeirra heitir að sjálfsögðu Whiskey bar. Hann býður
upp á vel á annað hundrað tegundir af þessum eðal-
drykk Skota. Í 20 mín. fjarlægð er Glengoyne
Whiskey verksmiðjan sem er ein af þeim þekktari.
Í stórri byggingu sem hýsir m.a. golfverslun og klúbb-
hús og veitingastað er stórglæsilegt Spa þar sem
m.a. er hægt að fá allar þær „meðferðir“ sem hugsast
getur auk þess sem hægt er að hvíla sig í heitum potti
á þakinu. Hann er með útsýni yfir 18. flötina og pútt-
flötina. Engin þrípútt þarna uppi!
Golfvöllur sem sameinar margar margar óskir
Carrick völlurinn var opnaður fyrir þremur árum síðan
og þar var strax haldið mót á Evrópumótaröð kvenna
þar sem Ólöf María okkar Jónsdóttir lék. Einnig hefur
PGA bikarinn sem er n.k. Ryder keppni milli golfkenn-
ara í Bretlandi og í Bandaríkjunum, verið haldinn á
Carrick. Völlurinn er par 71 og býður upp á blöndu
af golfbrautum. Fyrri 9 holurnar eru svokallaðar
„lowland“ þar sem fyrstu fjórar holurnar eru með
amerískum svip. Þriðja sem er par 5 og 4. braut, par 4
eru mjög flottar og halda manni við efnið með vatn á
aðra hönd alla leið frá teig upp að flöt. Eftir 4. holu er
komin hin kunnuglega skógarvallatilfinning. Hún nær
hápunkti á 8. brautinni sem er par 5. Frábær braut,
innrömmuð alla leið með hávöxnum eikartrjám og
mörgum glompum á leiðinni.
Þegar komið er í seinni hringinn tekur við allt annað
umhverfi, þá er maður kominn í „highlands“ golf.
Tónninn er gefinn á 10. teig en á flestum teigum á
seinni níu, er stórfenglegt útsýni yfir Loch Lomond
fjörðinn. Holur 13 til 15 eru frábærar. Þrettánda er löng
og mjög erfið par 4 og liggur í hundslöpp til vinstri .14.
braut er skemmtileg par 3 þar sem teigurinn er hátt
uppi en flötin niðri við vatnið. Fimmtánda er par 5 og
liggur meðfram vatninu. Með góðu upphafshöggi er
góður möguleiki á fugli en nokkrar glompur af alls
188 á vellinum, trufla aðkomu að flötinni. Mjög flott
golfbraut.
Við sextándu er möguleiki á að sjá Ferguson, fram-
kvæmdastjóra Man. Utd. knattspyrnuliðsins úti á
svölum en hann á glæsiíbúð í stórhýsinu við 16. braut-
ina sem er par 3. Átjánda er flott par 4 lokahola og þar
eru oft óvæntir áhorfendur sem sitja í heitum potti á
toppi Spa aðstöðunnar.
Það er mikil upplifun að leika Carrick völlinn. Ástandið
er fyrsta flokks á öllu. Flatir hraðar og flottar. Klúbb-
húsið er veglegt og þar er fín golfverslun.
The Wee Demon 9 holu völlurinn er ekki eins stór-
fenglegur en mjög fínn. Hann er í göngufæri frá hót-
elinu og mörg „logde“ húsin eru við hann.
Carrick völlurinn og The Cameron House við Loch Lomond í Glasgow
Klassagolf og gisting
á einstökum stað
Golfkennarinn með
skoska flaggið.
15. og 16. braut séð ofan frá 14. teig.