Golf á Íslandi - 01.07.2014, Blaðsíða 84

Þegar þessar tölur eru skoðaðar sjáum við að 64% högga þessa hrings eru slegin með
PW-SW og pútter. Þessi tala getur orðið hærri þegar um högglangan kylfing er að ræða
og einnig ef völlurinn er í styttra lagi eins og gerist víða á Íslandi. Ég er ekki viss um að
margir kylfingar sem æfa reglulega geti sagt við sjálfan sig í hreinskilni að þeir æfi þessar
umræddu kylfur í um 65% af æfingatímanum.
Flestir kylfingar vilja æfa lengri kylfurnar mun meira en þessar 3 mikilvægu kylfur. Þetta
viðhorf hefur lengi verið við lýði hér á landi og er það býsna sorglegt þar sem margir
klúbbar eru með fína aðstöðu til að æfa stutta spilið.
Ein helsta ástæðan fyrir því að íslenskir kylfingar hafa ekki náð lengra á erlendri grundu
er einmitt þessi, þ.e.a.s. við sláum jafn vel ef ekki betur en kylfingar í Evrópu en þeir slátra
okkur á og í kringum flatirnar.
Ég skora á ykkur kylfingar góðir, sama á hvaða getustigi þið eruð, að æfa stutta spilið í um
2/3 af ykkar æfingatíma. Ef þið sláið af mottunum í 30 mínútur þurfið þið að æfa ykkur á
og í kringum flatirnar í 60 mínútur. Ég er sannfærður um að forgjöfin lækkar fljótt ef þú
skiptir æfingatíma þínum á þennan hátt.
Dæmi:
Hér er tölfræði leikmannsins
sem spilar á 77 höggum (+5)
Brautir hittar: 8 af 14 (par 3 telja ekki)
Flatir í réttum höggafjölda: 10
Fjöldi pútta: 33
Vipp og 1 pútt: 3 af 8 (kylfingurinn hittir
ekki 8 flatir í réttum höggafjölda).
Upphafshögg: 18, þar af 4 á par 3 holum
sem slegið er með 4-9 járni.
Brautartré: 6, þar af 4 sem annað högg á
par 5 holum og svo innáhögg á tveimur
löngum par 4 holum.
Járnahögg: 4-9 járn. 4 sinnum á meðal-
löngum par 4 holum.
Wedge högg: 40-100 metrar. 4 sinnum á
stuttum par 4 holum, 4 sinnum sem þriðja
högg á par 5 holunum.
Vipp: 8 sinnum.
Pútt: 33 sinnum.
Skoðum nú hvernig höggin dreifast
um golfpokann.
Driver 14 sinnum eða 18%
Brautartré 6 sinnum eða 8%
4-9 járn 8 sinnum eða 10%
Wedge högg 8 sinnum eða 10,5%
Vipp 8 sinnum eða 10,5%
Pútt 33 sinnum eða 43%
HÖGGA ERU SLEGIN MEÐ
PW-SW OG PÚTTER64%
Golfkveðja
Sigurpáll Sveinsson
PGA golfkennari
Íþróttastjóri GKJ