Morgunblaðið - 31.03.2002, Blaðsíða 4
FRÉTTIR
4 SUNNUDAGUR 31. MARS 2002 MORGUNBLAÐIÐ
LESTUR Passíusálma Hallgríms
Péturssonar er orðinn hefð víða í
kirkjum landsins. Hér í Hveragerði
hófst lestur þeirra að frumkvæði
leikfélagsins árið 1996. Það er því í
sjötta sinn í ár sem þeir eru lesnir
hér í kirkjunni. Af þeim sex skipt-
um sem lesið hefur verið hefur
Stefán Sigurðsson aldursforseti
hér, 101 árs, lesið fimm sinnum, og
auk þess í útvarpinu. Fyrir tveimur
árum gat hann ekki tekið þátt í
lestrinum, því þá brá hann sér til
Ameríku að heimsækja dótturdótt-
ur sína, sem þar býr. Í ár hóf Stefán
lesturinn. Að þessum lestri hafa
margir komið en þó er alltaf fastur
kjarni og þá oft félagar úr Leik-
félagi Hveragerðis. Alls tóku tíu
lesarar þátt í lestrinum í ár, bæði
börn og fullorðnir. Rúm níutíu ár
skildu að elsta og yngsta lesarann,
Stefán 101 árs og Huldu Jónsdóttur
á ellefta ári.
Morgunblaðið/Margret Ísaksdóttir.
Lestur passíusálmanna sem
fram fór í kirkjunni föstudaginn
langa. Elsti lesarinn var Stefán
Sigurðsson 101 árs .
Aldursmun-
ur rúm 90 ár
Hveragerði. Morgunblaðið.
TVEIR menn sluppu með ótrúlegum
hætti þegar jeppi þeirra féll niður
30–40 metra eftir að hann hafði lent
ofan í geil við Þursaborgir á Lang-
jökli. Var í fyrstu talið að þeir væru
alvarlega slasaðir en svo reyndist
ekki vera.
Bíll mannanna var fremstur af
fimm jeppum sem voru á leið frá
Borgarfirði til Hveravalla þegar at-
vikið átti sér stað. Vilhjálmur Sig-
urpálsson, sem var í öðrum bíl segir
þá hafa komið að Þursaborgum að
sunnanverðu en þétt þoka hefði legið
yfir jöklinum. „Yfirleitt höfum við
ekið meðfram Péturshorninu en þar
sem það var mjög blint ákváðum við
að aka yfir á slóð, sem við áttum á
GPS-tækjunum okkar, norðan meg-
in fram hjá Þursaborgum og yfir á
Hveravelli. En þegar við vorum á
leiðinni á slóðina keyrði hann of ná-
lægt brúninni, endastakkst fram af
og lenti á hvolfi.“
Annar stóð fljótlega upp
Vilhjálmur segir að þeim félögum
hafi að vonum brugðið mikið við
þetta. „Fyrstu viðbrögðin voru að
hringja í neyðarlínuna. Síðan ókum
við vestur með brúninni og þegar
maður var kominn norðan við Þursa-
borgirnar var hægt að komast ak-
andi niður með geilinni. Skilyrðin
voru þannig að það þurftu menn að
ganga á undan en svo stoppuðum við
þegar það voru svona 150 metrar í
strákana því þá missti ég sambandið
á símanum mínum. Þannig að ég fór
til baka en strákarnir fóru að fé-
lögum okkar sem voru þarna tveir í
bílnum.“
Það var fyrst þegar félagar mann-
anna tveggja komu að bílnum að þeir
vissu hvernig ástatt var um þá. „Það
er ekki hægt að lýsa því hvað okkur
létti mikið við það að komast að því
að þeir voru ekki slasaðri en raun
bar vitni,“ segir Vilhjálmur. „Mér
skilst að þeir, sem gengu að bílnum,
hafi komist að járnkarli sem var í
honum og spennt með honum upp
hurðirnar og getað þannig komið
þeim út. Annar þeirra stóð nú fljót-
lega upp og rölti um en hinn félagi
okkar var meira meiddur, sleit ein-
hverjar sinar í öxlinni og rifbeins-
brotnaði. En mér skilst að húmorinn
hefði verið kominn í lag í nótt þegar
þeir voru komnir á sjúkrahúsið.
Þannig að þetta fór nú betur en á
horfðist.“
Vilhjálmur segir að bera hafi þurft
þann sem var meira slasaður yfir í
annan bíl. „Það kom þarna fólk á
þremur bílum. Einn mannanna er í
björgunarsveit og þeir aðstoðuðu
okkur við að útbúa börur fyrir hann
og koma honum í bílinn.“
Hittust á miðjum jökli
Atburðurinn átti sér stað um
klukkan 17 á föstudag og voru björg-
unarsveitir og þyrla Landhelgis-
gæslunnar þá þegar kölluð út. Vegna
slæmra skilyrða á jöklinum gat þyrl-
an ekki lent við slysstaðinn en hélt til
Húsafells og var þar til taks. Var þá
ákveðið að ferðafélagar mannanna
tveggja myndu aka með þá til móts
við björgunarsveitarfólk og lækna
sem voru á leið í bílum upp á jökul.
Mjög þungfært var þá orðið enda
skafrenningur og töluvert rok og
skyggni einungis um 30–40 metrar.
Um klukkan 21.30 hittust björg-
unarsveitarmenn og þeir félagar á
miðjum Langjökli þar sem mennirn-
ir tveir voru skoðaðir stuttlega og
hugað að áverkum þeirra. Í fram-
haldinu var farið niður af jöklinum
og komið niður við Húsafell um mið-
nætti og þaðan voru mennirnir flutt-
ir með þyrlu Landhelgisgæslunnar
til Reykjavíkur á Landspítala – há-
skólasjúkrahús í Fossvogi. Sam-
kvæmt upplýsingum þaðan er líðan
mannanna þokkaleg og liggja þeir á
almennri deild.
Um 80 menn frá björgunarsveit-
unum í Borgarfirði, Akranesi, Ár-
nessýslu og af höfuðborgarsvæðinu
tóku þátt í aðgerðum auk fólks frá
Landhelgisgæslunni og sjúkraflutn-
ingsmanna frá Slökkviliði höfuð-
borgarsvæðisins.
Ferðafélagi tveggja manna sem sluppu lítið meiddir er jeppi þeirra hrapaði
„Ekki hægt að lýsa því
hvað okkur létti mikið“
Morgunblaðið/Sverrir
Þyrlumenn Landhelgisgæslunnar réðu ráðum sínum áður en lagt var af
stað upp að Langjökli. Vegna slæmra aðstæðna gat þyrlan ekki athafn-
að sig á jöklinum og beið í Húsafelli meðan verið var að ferja mennina.
UMFANGSMIKIL leit að vélsleða-
manni sem saknað var við Veiðivötn
stóð yfir frá föstudagskvöldi og allt
þar til björgunarsveitir Slysavarna-
félagsins Landsbjargar fundu mann-
inn upp úr kl. 7 í gærmorgun. Var
maðurinn við góða heilsu eftir næt-
urvistina en hann fannst skammt frá
vélsleða sínum sem var bensínslaus.
Um 80 björgunarsveitarmenn á 20
vélsleðum, fimm öflugum jeppum og
fimm snjóbílum voru við leit alla
nóttina að manninum sem hafði orðið
viðskila við félaga sína um þrjúleytið
á föstudag við Tungnaá.
Maðurinn var þar á ferð ásamt
tveimur félögum sínum frá Land-
mannalaugum áleiðis að Veiðivötn-
um. Þegar þeir komu að Tungnaá fór
vélsleðamaðurinn yfir snjóbrú, sem
brast og féll niður þegar hann var
kominn yfir.
Gat maðurinn komið skilaboðum
til félaga sinna hinum megin við ána
að sleði hans væri orðinn bensínlaus
og sjálfur ætlaði hann að ganga nið-
ur í Veiðivötn. Félagar hans fóru
hins vegar að Sigöldu og síðan í
Veiðivötn. Þegar þangað var komið
kom í ljós að maðurinn var ekki kom-
inn og sást ekkert til ferða hans.
Var lögreglu á Hvolsvelli þegar
gert viðvart og óskaði hún strax eftir
að leit yrði gerð að manninum kl.
19.30 á föstudagskvöldið. Björgunar-
sveitum sem voru við aðgerðir á
Langjökli og í nágrenni hans var
þegar snúið til leitar við Veiðivötn,
ásamt því að björgunarsveitir frá
Hellu, Hvolsvelli, Landeyjum og Ár-
nessýslu voru kallaðar út. Einnig
voru sendar björgunarsveitir frá
höfuðborgarsvæðinu til leitar að
manninum.
Lítið skyggni og hvöss él
Aðstæður til leitar voru mjög erf-
iðar, lítið skyggni og gekk á með
hvössum éljum. ,,Leitaraðstæður
voru mjög erfiðar bæði vegna mikils
krapa og skyggni var nánast ekki
neitt mestalla nóttina,“ sagði Jón
Hermannsson, vettvangsstjóri
björgunarsveitarmanna, í samtali
við Morgunblaðið í gær. ,,Það lagað-
ist aðeins í birtingu [í gærmorgun]
og gátum við þá dreift leitinni um
svæðið og fundum manninn fljótlega
við sleðann. Ástand mannsins var
gott. Hann var vel búinn og hafði
gert rétt í að grafa sér snjóbyrgi þar
sem hann hafðist við,“ sagði Jón.
Í birtingu í gærmorgun hafði stað-
ið til að bæta mjög mikið við leitina
áður en maðurinn fannst, og voru um
100 björgunarsveitarmenn til viðbót-
ar í viðbragðsstöðu.
Vélsleðamaður fannst heill á húfi eftir tólf tíma leit
80 björgunarsveitarmenn
leituðu mannsins alla nóttina
MAÐUR slasaðist er hann ók á vél-
sleða fram af snjóhengju í Leppint-
ungu sunnan Kerlingarfjalla að
morgni föstudags.
Þrjátíu björgunarsveitarmenn
Slysavarnafélagsins Landsbjargar
fóru á vélsleðum og jeppum mann-
inum til aðstoðar.
Hlaut mikla áverka
á brjóstkassa
Var þyrla Landhelgisgæslunnar,
TF-LÍF, kölluð út og kom hún með
hinn slasaða til Reykjavíkur um
klukkan hálftvö á föstudag.
Samkvæmt upplýsingum sem
fengust á slysadeild kom í ljós að
maðurinn er með mikla áverka á
brjóstkassa og mun hann verða á
sjúkrahúsinu í nokkra daga. Hann
slapp hins vegar við meiðsl á höfði og
hálsi.
Maðurinn þurfti sjálfur að ganga
frá slysstaðnum og í þyrluna og var
það talsvert þrekvirki að sögn lækn-
is.
Morgunblaðið/Júlíus
Þyrla Landhelgisgæslunnar kom með vélsleðamanninn sem slasaðist
við Kerlingarfjöll til Reykjavíkur skömmu eftir hádegi á föstudag.
TF-LÍF sótti slasaðan mann
Ók á vélsleða
fram af hengju