Morgunblaðið - 28.10.2003, Blaðsíða 4
FRÉTTIR
4 ÞRIÐJUDAGUR 28. OKTÓBER 2003 MORGUNBLAÐIÐ
HALLDÓR Ásgrímsson utanríkis-
ráðherra segist gera sér vonir um að
það skýrist í dag eða á morgun hvort
samkomulag náist í deilu um stækkun
Evrópska efnahagssvæðisins, en
kröfur sem Liechtenstein hefur sett
fram á hendur Tékkum og Slóvökum
hafa komið í veg fyrir að EFTA-ríkin
og Evrópusambandið hafa getað
skrifað undir samninga um stækkun
EES-svæðins.
„Það getur ekki dregist lengur að
finna lausn á þessu máli. Tíminn er í
reynd runninn frá okkur,“ sagði Hall-
dór í samtali við Morgunblaðið í gær.
Halldór sagðist hafa átt samtöl við
utanríkisráðherra Noregs og Liech-
tenstein í gær um
þetta mál. Menn
væru að leita að
lausn en hún væri
ekki enn fundin.
Halldór sagði að
Ítalir, sem nú fara
með formennsku í
Evrópusamband-
inu, og fram-
kvæmdastjórn
ESB væru einnig
að reyna að leysa málið. Hann sagðist
vonast eftir að þessi vinna skilaði ár-
angri og deilan leystist.
Norskir fjölmiðlar hafa talsvert
fjallað um þetta mál og segja að mik-
illar óþolinmæði gæti hjá Íslandi og
Noregi. Ýjað er að þeirri lausn að Ís-
lendingar og Norðmenn skrifi undir
stækkun EES-samningsins og skilji
Liechtenstein eftir. Halldór Ásgríms-
son sagði við Morgunblaðið í gær að
þetta væri engin lausn. EFTA-ríkin
yrðu að ná samkomulagi til að hægt
væri að stækka EES með sama hætti
og ríkin sem mynda Evrópusamband-
ið yrðu einnig að ná samkomulagi um
stækkun.
Halldór mun í dag ræða þessi mál
áfram við Jan Petersen, utanríkisráð-
herra Noregs, á þingi Norðurlanda-
ráðs. Halldór sagðist vonast eftir
lausn í dag eða á morgun.
Utanríkisráðherra um stækkun EES
Getur ekki dregist
lengur að finna lausn
Halldór
Ásgrímsson
KENNARASAMBAND Íslands og Félag fram-
haldsskólakennara sendu Tómasi Inga Olrich
menntamálaráðherra í gær sameiginlega umsögn
um tillögur verkefnisstjórnar ráðherra um stytt-
ingu námstíma til stúdentsprófs. Er ráðherra
hvattur til að falla frá tillögunum en ráðast fremur
í gerð langtímaáætlunar í menntamálum með
tímasettum áföngum. Forráðamenn samtakanna
telja að skoða verði skólakerfið í heild þegar stytt-
ing er til umræðu.
Eiríkur Jónsson, formaður Kennarasambands
Íslands, og Elna Katrín Jónsdóttir, formaður Fé-
lags framhaldsskólakennara, skrifa undir bréf til
ráðherra. Fylgja því tillögur samtakanna um að-
gerðaáætlun í grunnskólum og framhaldsskólum
og um kennaramenntun og fjármál. Eiríkur segir
kennara vilja taka þátt í þessari breytingu en ekki
á þann hátt sem menntamálaráðherra hafi kynnt
og fremur eigi að líta til allra skólastiga en ekki
aðeins huga að styttingu framhaldsskólanáms.
Elna Katrín Jónsdóttir segir félögin ekki hafna
umræðu um hugsanlegar breytingar, ekki sé úti-
lokað að þær geti verið hagkvæmar, en hún telji
aðferðir ráðherra dálítið forpokaðar og gam-
aldags. Þau telja að víðtæk samstaða sé um þessa
afstöðu meðal kennara á öllum skólastigum, leik-
skóla, grunnskóla og framhaldsskóla og undir það
tóku Hanna Hjartardóttir, formaður Skólastjóra-
félags Íslands og Sesselja G. Sigurðardóttir, vara-
formaður Félags grunnskólakennara, sem einnig
voru á fundinum.
Segja málið ekki þurfa að tefjast
Elna Katrín segir samtökin ekki telja það vera
til hagsbóta að leggja til niðurskurð náms á fram-
haldsskólastigi. Hún segir ákveðnar tillögur lagð-
ar fram varðandi endurskoðun og samræmingu á
námsmarkmiðum 9. og 10. bekkjar grunnskóla og
í framhaldsskóla og að taka þurfi á stærri vanda í
skólakerfinu sem sé fall á samræmdum prófum
10. bekkjar grunnskóla og brottfall nemenda á
fyrstu stigum framhaldsskólanáms. Sú áætlun
þurfi ekki að tefja málið og breytingin geti komið
til framkvæmda 2007, á sama tíma og tillaga ráð-
herra geri ráð fyrir.
Meginniðurstaða samtaka kennara er að í stað
skýrslu og tillögu um einhliða niðurskurð í námi í
framhaldsskóla beri að leggja til grundvallar í
umfjöllun um málið heildarskýrslu um samanburð
á námi milli Íslands og valinna samanburð-
arlanda. Nauðsynlegt sé að setja fram heildstæða
áætlun um hvernig þörfum nemendahópsins frá
unglingastigi grunnskóla og til loka framhalds-
skóla verði best þjónað. „Í því skyni þarf að mati
kennarasamtakanna m.a. að setja fram ákveðnar
tillögur um endurskoðun á innra starfi, gera ráð-
stafanir til að draga úr brottfalli og sérstaka áætl-
un um að fjölga til muna þeim sem standast próf
við lok 10. bekkjar grunnskóla og þeim sem út-
skrifast með lokapróf úr framhaldsskóla,“ segir
einnig í bréfinu til menntamálaráðherra.
Þá minna samtökin á markmið skólastefnu frá
árinu 1998, „Þeirra réttur okkar skylda“ og segja
sárafá markmið hennar hafa komist til fram-
kvæmda, m.a. þau er miði að því að sporna við
brottfalli með markvissum aðgerðum og efla fjöl-
breytni í námi.
Meðal tillagna kennarasamtakanna varðandi
grunnskólann er að endurskoða námsmat í efstu
bekkjunum og að útgönguleiðum verði fjölgað til
að gera nemendum í 9. bekk sem hafa til þess for-
sendur kleift að hefja fyrr nám í framhaldsskóla.
Þá er lagt til að efld verði námsefnisgerð í fag-
greinum efstu bekkja grunnskóla sem taki mið af
meiri tilfærslum til náms milli skólastiga og ald-
urshópa og náms- og starfsráðgjöf verði efld.
Fjölgað verði skilgreindum námsleiðum í fram-
haldsskólum, námsmat endurskoðað og að náms-
efnisgerð verði efld sem taki mið af aukinni sér-
hæfingu í námi og fjölbreyttari námsleiðum.
Samtök kennara ósátt við styttingu framhaldsskólanáms
Skoða ber skólakerfið í heild
Morgunblaðið/Jim Smart
Elna Katrín Jónsdóttir, formaður Félags framhaldsskólakennara, og Eríkur Jónsson, formaður
Kennarasambandsins, kynntu tillögur samtaka kennara sem sendar voru menntamálaráðherra í gær.
BÚIÐ er að kyrrsetja kjöt-
birgðir fyrirtækisins Ferskra
afurða á Hvammstanga. Bún-
aðarbankinn fór fram á kyrr-
setningu og féllst sýslumaður á
Blönduósi á beiðnina. Í gær var
unnið að því að telja kjötbirgðir
fyrirtækisins á Hvammstanga
og Búðardal. Niðurstaða lá hins
vegar ekki fyrir í gærkvöldi.
Héraðsdómur Norðurlands
vestra hafnaði í síðustu viku
beiðni Ferskra afurða um
áframhaldandi greiðslustöðv-
un. Í framhaldi af því fór Bún-
aðarbankinn fram á gjaldþrot
fyrirtækisins.
Afurðir
kyrrsettar
ÁRANGURSLAUSUM sáttafundi í
kjaradeilu Flugvirkjafélags Íslands
og Samtaka atvinnulífsins vegna
Tækniþjónustunnar á Keflavíkur-
flugvelli ehf. lauk í fyrrinótt með því
að Þórir Einarsson ríkissáttasemjari
lagði fram miðlunartillögu. Að til-
mælum hans frestuðu deiluaðilar
boðuðu verkfalli sem átti að hefjast á
miðnætti í gærkvöldi til mánudags-
ins 10. nóvember kl. 24.
Kristján Kristinsson, formaður
samninganefndar flugvirkja, sagðist
í samtali við Morgunblaðið ekki geta
upplýst um efni miðlunartillögunn-
ar. Hann sagðist vera sáttur við inni-
hald hennar og myndi leggja til við
félaga sína að samþykkja hana þeg-
ar hún yrði kynnt. Var Kristján
bjartsýnn á að tillagan yrði sam-
þykkt í atkvæðagreiðslu. „Ég hef frá
upphafi sagt að ég væri bjartsýnn á
að þessi deila leystist,“ sagði Krist-
ján.
Að sögn Þóris Einarssonar ríkis-
sáttasemjara hafði staðan í kjara-
deilunni verið mjög erfið um skeið
og stíf fundahöld verið alla helgina.
Vonaðist hann til að miðlunartillag-
an yrði til að leysa deiluna.
Póstatkvæðagreiðsla um
tillögu sáttasemjara
Atkvæði um miðlunartillöguna
verða greidd með leynilegri al-
mennri póstatkvæðagreiðslu sem á
að vera lokið kl. 17 fimmtudaginn 6.
nóvember. Verða atkvæði þá talin á
skrifstofu ríkissáttasemjara. 128
flugvirkjar eru á kjörskrá í atkvæða-
greiðslunni.
Formaður samninga-
nefndar flugvirkja um
miðlunartillöguna
Bjartsýnn
á að tillag-
an verði
samþykkt
HÉRAÐSDÓMUR Suðurlands hef-
ur dæmt karlmann í tveggja ára
fangelsi fyrir kynferðisbrot gegn
þremur stúlkum í fyrra, og allt aftur
til ársins 1997 gegn einni þeirra sem
er dótturdóttur ákærða. Stúlkurnar
voru á aldrinum 7 til 13 ára þegar
brotin áttu sér stað.
Brot ákærða gegn dótturdóttur
hans voru að mati dómsins alvarleg
og beindust gegn veigamiklum hags-
munum. Með þeim braut ákærði
freklega gegn friðhelgi stúlkunnar
allt frá barnsaldri. Þá voru flest
brotin framin inni á heimili stúlkunn-
ar eða á heimili ákærða þegar stúlk-
an dvaldi í skjóli hans. Með því brást
hann trausti hennar og móður henn-
ar. Ákærði átti sér engar málsbætur
og var hæfileg refsing ákveðin tvö ár
óskilorðsbundið.
Ákærði neitaði sakargiftum að því
er varðaði tvær stúlknanna en neit-
aði ekki sök afdráttarlaust hvað
dótturdóttur sína varðaði.
Auk fangelsisrefsingarinnar var
ákærði dæmdur til að greiða stúlk-
unum 950 þúsund krónur í skaða-
bætur, þar af dótturdóttur sinni 600
þúsund krónur.
Málið var dæmt af Ragnheiði
Thorlacius settum héraðsdómara og
dómsformanni, Ingveldi Einarsdótt-
ur settum dómstjóra og Valtý Sig-
urðssyni héraðsdómara. Verjandi
ákærða var Sigurður Sveinsson hdl.
Málið sótti Ragnheiður Harðardótt-
ir, saksóknari hjá ríkissaksóknara.
2 ára fangelsi fyrir
kynferðisbrot gegn
þremur stúlkum
JEPPABIFREIÐ með hestakerru
sem var á ferðinni í fyrrakvöld við
bæinn Beinakeldu í Austur-Húna-
vatnssýslu, fékk á sig sviptivind með
þeim afleiðingum að kerran fauk á
hliðina og folald sem í henni var
drapst.
Litlar skemmdir urðu á bílnum en
kerran er illa farin. Samkvæmt upp-
lýsingum lögreglunnar á Blönduósi
var vitlaust veður í fyrrakvöld nán-
ast um leið og komið var upp úr
Blönduósbæ á leið vestur.
Þá gaf vegkantur sig undan flutn-
ingabíl í Norðurárdal í Borgarfirði í
fyrrakvöld með þeim afleiðingum að
slinkur kom á bílinn og tengivagn
valt. Verið var að flytja liðlega fimm
þúsund kjúklinga í sláturhús og fór
hluti búranna út af vagni og bíl og
drápust nokkrir kjúklingar.
Folald
drapst þegar
kerra fauk