Morgunblaðið - 08.12.2003, Blaðsíða 14
ERLENT
14 MÁNUDAGUR 8. DESEMBER 2003 MORGUNBLAÐIÐ
RAUÐARÁRSTÍG 14-16, SÍMI 551 0400 • KRINGLUNNI, SÍMI 568 0400 www.myndlist.is
ÆÐSTI embættismaður Samein-
uðu þjóðanna í Afganistan, Lakhdar
Brahimi, fór í gær fram á að þegar í
stað yrði rannsakað hvers vegna
hernaðaraðgerðum sem Banda-
ríkjamenn stóðu fyrir í Ghazni-hér-
aði á laugardag lyktaði með því að
níu saklaus börn týndu lífi. Brahimi
harmaði atvikið og fordæmdi og
sagði hann að það yki mjög á ótta
íbúa Afganistans og óöryggi al-
mennt en þetta er ekki í fyrsta
skipti sem saklaust fólk deyr í að-
gerðum Bandaríkjahers í landinu.
Aðgerðir Bandaríkjahers á laug-
ardag beindust gegn Mullah Wazir,
fyrrverandi foringja úr röðum talib-
ana. Átti atvikið sér stað um kl.
10.30 á laugardagsmorgun, um kl. 6
að íslenskum tíma, en þá gerðu her-
flugvélar Bandaríkjamanna af gerð-
inni A-10 árás á Wazir þar sem
hann var staddur í Hutala, af-
skekktu þorpi um 130 km suðvestur
af Kabúl.
Að sögn Christophers E. West,
talsmanns Bandaríkjahers, féll
Wazir í árásinni á laugardag en her-
menn fundu hins vegar einnig lík
níu barna þegar þeir komu á stað-
inn.
„Þegar við efndum til árásarinnar
þá vissum við ekki að börn væru í
nágrenninu,“ sagði West.
Bætti hann því við að búið væri að
fyrirskipa rannsókn á atburðinum.
Þá sagðist Zalmay Khalidzad, sendi-
herra Bandaríkjanna í Afganistan,
„afar sorgmæddur“ vegna „hörmu-
legs dauða saklausra borgara“.
Segja Wazir hafa
sloppið lifandi
Íbúar á staðnum mótmæla full-
yrðingum Bandaríkjahers og segja
að Wazir hafi sloppið lifandi úr árás-
inni. Frændi Wazirs hafi hins vegar
týnt lífi. Að sögn fréttamanns BBC í
Afganistan ríkir mikil reiði meðal
íbúa svæðisins, sem árásin átti sér
stað á, en þar munu Talibanar og
aðrir íslamskir harðlínumenn njóta
nokkurs stuðnings.
„Börnin voru bara að leika sér í
boltaleik þegar kúlunum tók að
rigna yfir þau,“ hefur Associated
Press eftir Hamidullah, föður átta
ára gamals drengs, Habibullahs,
sem beið bana í árásinni á laug-
ardag.
Bandaríkjaher segir Wazir hafa
borið ábyrgð á nýlegum morðum á
tveimur erlendum verktökum sem
unnu að vegagerð í Afganistan og
Ali Ahmad Jalali, innanríkisráð-
herra í afgönsku stjórninni, bætti
um betur. „Hann var alræmdur
leiðtogi hryðjuverkasamtaka,“
sagði hann við fréttamenn í Kabúl í
gær.
Níu afgönsk börn biðu bana
í árás Bandaríkjamanna
Aðgerðir Bandaríkjahers beindust
gegn fyrrverandi talibanaleiðtoga
Kabúl, Hutala. AFP, AP.
HART var deilt á fundi ríkis-
stjórnar Ísraels í gær um hug-
myndir sem varaforsætisráðherr-
ann Ehud Olmert, sem einnig er
viðskiptaráðherra, viðraði í blaða-
viðtali á föstudag um að Ísrael
ætti einhliða að loka landnema-
byggðum sínum á Vesturbakkan-
um og Gaza-svæðinu.
Ísraelska útvarpið sagði að á
vikulegum ríkisstjórnarfundi í gær
hefði skorist í odda með Avigdor
Lieberman, ráðherra uppbygging-
armála og leiðtoga harðlínuflokks-
ins Þjóðareining, og Ariel Sharon
forsætisráðherra. Mun Lieberman
hafa farið fram á að Sharon tæki
af öll tvímæli um að ekki væri á
döfinni að hrinda hugmyndum Ol-
merts í framkvæmd.
Sharon hefur sjálfur bryddað
upp á þeim möguleika að Ísrael
grípi til einhliða aðgerða ef ekkert
friðarsamkomulag tækist milli Ísr-
aela og Palestínumanna. Hann
mun hins vegar hafa sagt ríkis-
stjórn sinni í gær að ekkert yrði
aðhafst nema stjórnin hefði sam-
þykkt það fyrst.
Segir marga
á sömu skoðun
Olmert er bandamaður Sharons
og liðsmaður Likud-flokksins og
hann sagði í gær að hann væri viss
um að margir í Likud væru sama
sinnis og hann.
Olmert sagði í viðtali við Yediot
Aharonot á föstudag að há fæð-
ingatíðni meðal Palestínumanna
þýddi að Arabar yrðu brátt mun
fleiri en Ísraelar á tilteknum
svæðum. Ef Ísrael ætti að halda
áfram að vera gyðingaríki, þar
sem þau lýðræðislegu viðmið
væru þó í heiðri höfð að atkvæði
allra kjósenda giltu jafnt, þyrfti
að breyta landamærum þess;
tryggja að eins margir gyðingar
og mögulegt væri tilheyrðu hinu
ísraelska ríki.
Olmert vildi ekki ræða frekar
hvaða hluta Vesturbakkans og
Gaza-svæðisins hann teldi að Ísr-
aelar ættu að yfirgefa en bætti því
við að hann teldi að Ísrael „ætti að
byggjast á því að 80% íbúanna séu
gyðingar á meðan 20% séu arab-
ar“. Slíkt myndi fela í sér að Ísrael
lokaði flestum landnemabyggðum
sínum, að sögn kunnugra.
Tshai Hanegbi, ráðherra örygg-
ismála í Ísrael og liðsmaður Likud,
tók illa í hugmyndir Olmerts og
sagði þær „hættulegri fyrir fram-
tíð Ísraelsríkis heldur en Óslóar-
samkomulagið og Genfar-frum-
kvæðið samanlagt“.
Merki um veikleika
Leiðtogi eins af minni flokkun-
um, sem aðild eiga að samsteypu-
stjórn Sharons, hótaði hins vegar
að draga flokk sinn út úr rík-
isstjórninni ef gerð yrði tilraun til
að hrinda hugmyndum Olmerts í
framkvæmd. „Eftir þriggja ára
hryðjuverkaöldu sem kostað hefur
900 manns lífið myndi einhliða
brotthvarf frá Júdeu og Samaríu
[Vesturbakkanum] þýða undan-
hald gagnvart hryðjuverkamönn-
unum,“ sagði Effi Eitam, ráðherra
húsnæðis og formaður NRP-
flokksins.
„Þetta er merki um veikleika og
sendir þau skilaboð til Palestínu-
manna að með aðeins fleiri hryðju-
verkum muni þeir fá sitt sjálf-
stæða ríki, án þess að þeir þurfi að
skrifa undir neitt samkomulag eða
lofa neinum umbótum,“ sagði
Eifram ennfremur.
Harðlínumenn í ísraelsku
ríkisstjórninni ævareiðir
Ehud Olmert
varaforsætisráð-
herra viðrar hug-
myndir um lokun
landnemabyggða
Jerúsalem. AP, AFP.
UM fimm hundruð Palestínumenn
tóku þátt í mótmælum í borginni
Rafah á Gaza-svæðinu í gær en
mótmælin beindust gegn Genfar-
frumkvæðinu, óformlegu frið-
arsamkomulagi sem kynnt var í síð-
ustu viku. Meðal þeirra sem mót-
mæltu var drengurinn á myndinni
en hann heldur á leikfangabyssu.
Við hlið hans stendur herskár Pal-
estínumaður úr röðum Al Aqsa-
píslarvottasveitanna.
AP
Mótmæltu Genfar-frumkvæðinu
ÞAÐ eru ekki nema rétt helmings-
líkur á að sátt náist um stjórn-
arskrárdrög Evrópusambandsins á
fundi leiðtoga ESB-ríkjanna í Bruss-
el nk. föstudag. Þetta er mat Silvios
Berlusconis, forsætisráðherra Ítalíu,
en Ítalir sitja nú í forsæti ESB.
Berlusconi átti fund með Gerhard
Schröder, kanslara Þýskalands, í
Berlín í gær. Sagði Berlusconi við
fréttamenn eftir fundinn að hann
væri „55% bjartsýnn“ á að sam-
komulag myndi takast á fundinum
nk. föstudag. Er fundurinn í Brussel
mikilvægur enda styttist nú óðum í
sögulega stækkun ESB.
Helmings-
líkur á sátt
Reuters
STUÐNINGUR við Jean-Pierre Raf-
farin, forsætisráðherra Frakklands,
hefur aldrei verið minni ef marka má
niðurstöður skoð-
anakönnunar sem
birtar voru í gær.
Aðeins um 29%
franskra kjósenda
segjast nú styðja
Raffarin, sem er
forsætisráðherra í
hægri stjórn sem
tók við völdum í
júní á síðasta ári.
69% aðspurðra
eru hins vegar óánægðir með störf
forsætisráðherrans, að því er fram
kom í könnun blaðsins Le Figaro.
Mjög hratt hefur dregið úr fylgi við
Raffarin. Virðist sem honum hafi eng-
an veginn tekist að hrífa almenning í
Frakklandi með sér. Þá jók það ekki
traust fólks á forsætisráðherranum
hvernig ríkisstjórn hans brást við
hitabylgjunni í ágúst sem talin er hafa
kostað næstum 15.000 manns lífið.
Einn forvera Raffarins, Alain
Juppe, mældist með um 20% fylgi í
könnunum snemma árs 1997. Varð
það til þess að Jacques Chirac Frakk-
landsforseti boðaði kosningar en í
þeim komust vinstrimenn til valda.
Fylgið
hrynur af
Raffarin
París. AFP.
Jean-Pierre
Raffarin
AFRÍKURÍKINU Zimbabwe verð-
ur ekki hleypt aftur inn í breska
samveldið að svo stöddu. Þetta var
ákveðið á leiðtogafundi samveldisins
í Abuja í Nígeríu í gær en hart hefur
verið deilt um þetta mál undanfarna
daga og hafa menn óttast að til klofn-
ings gæti komið milli vestrænna að-
ildarríkja samveldisins og þróunar-
ríkjanna, sem eitt sinn voru
nýlendur Bretaveldis. Zimbabwe var
vikið úr samveldinu á síðasta ári eftir
kosningar sem taldar voru hafa verið
gallaðar í meira lagi.
Zimbabwe
áfram úti
Abuja. AFP.
♦ ♦ ♦