Fréttablaðið - 15.04.2006, Blaðsíða 24
15. apríl 2006 LAUGARDAGUR24
Kaffihúsið opnuðu þeir Friðrik Weisshappel, Ingvi Steinar Ólafsson, Brynj-
ólfur Garðarsson og Þórir Bergs-
son fyrir tæpum tveimur árum á
Norðurbrú í Kaupmannahöfn.
„Hugmyndin var alltaf að opna
fleiri staði“, segir Brynjólfur.
„Við höfum skoðað helling af hús-
næðum en ekkert þeirra hefur
hentað fyrr en nú“. Segjast þeir
hafa verið byrjaðir að leita að
heppilegu húsnæði fyrir næsta
stað stuttu eftir að þeir opnuðu
kaffihúsið í Elmegade í ágúst
2004. „Við höfum aldrei efast um
að hugmyndin virkaði“, bætir
Brynjólfur við.
Þeir félagar segja síðustu tvö
ár hafa einkennst af mikilli vinnu
og erfitt hafi verið að missa Þóri
sem vegna einstaks barnaláns
ákvað að snúa heim eins og Frið-
rik orðar það. „Við erum hér
öllum stundum og það er að skila
sér enda er staðurinn þétt setinn
alla daga og hefur fengið mikla
og jákvæða athygli, bæði frá inn-
lendum og erlendum fjölmiðl-
um“, segir Ingvi Steinar. „Okkur
var til dæmis þakkað það að hafa
sett nýjan snúning á kaffihúsa-
menningu Kaupmannahafnar í
Time tímaritinu. Við vorum rosa
stoltir af því“, bætir Friðrik við.
Einnig er þekkt þegar forsætis-
ráðherra Dana, Anders Fogh
Rasmussen, lofaði kaffihúsið í
ræðu.
Danskir bankar vantrúaðir
En þótt Laundromat hafi gengið
vel segir Friðrik að í upphafi hafi
gengið illa að sannfæra danska
banka um að veita þeim lán fyrir
því sem upp á vantaði. „Við fórum
á milli banka hér úti og kynntum
þeim hugmyndina en enginn var
til í að aðstoða okkur. Þrátt fyrir
að við værum með töluvert fé milli
handanna og með samtals sjötíu
og fjögurra ára reynslu í þessum
geira“. Hann segir að þeir hafi þá
leitað til Glitnis, þá Íslandsbanka
og þar var viðhorfið allt annað og
segjast þeir hafa átt frábært sam-
starf við bankann.
Nýi staðurinn mun einfaldlega
heita The Laundromat Café en
verður þó ekki nákvæmlega eins
enda segist Friðrik ekki nenna að
endurtaka sig. Nýi staðurinn mun
hafa sín séreinkenni, til dæmis
verði rauða litnum sem einkenni
núverandi stað skipt út fyrir
græna tóna. „Svo verðið þið bara
að koma og sjá“, segir hann bros-
andi og Brynjólfur bætir við að
nýr matseðill og drykkjalisti líti
dagsins ljós.
Soho Kaupmannahafnar
Í dönskum fjölmiðlum er Norð-
urbrú stundum nefnd Soho Kaup-
mannahafnar. Heiðurinn að
þessu á Friðrik sem segist hafa
notað þessa líkingu í viðtölum
við erlenda blaðamenn til að lýsa
stemmningunni í hverfinu. Enda
sé að finna í nágrenni við staðinn
fjölda óhefðbundinna verslana,
öflugt listalíf og fjölbreyttara
mannlíf en annars staðar í borg-
inni. Ingvi Steinar segir þá félaga
hafa verið heppna með staðsetn-
inguna á fyrsta staðnum því
hverfið iði af lífi og allir þekki
alla. Þeir hafi líka lagt sitt að
mörkum til að virkja hverfið. Til
dæmis gefst ungum hönnuðum
færi á að sýna verk sín inni á
staðnum. Er ásóknin það mikil í
plássið að ekki komast fleiri að á
þessu ári.
„Eitt að því sem stendur upp
úr síðustu tvö ár er að upplifa
þann áhuga sem Íslendingar hafa
sýnt staðnum“, segir Friðrik og
félagar hans taka undir. „Því þó
að megnið af okkar viðskiptavin-
um séu Danir á öllum aldri, þá er
það alltaf ánægjulegt þegar land-
ar okkar gefa sér tíma til að
heimsækja okkur og kíkja í
kaffi“.
„Við höfum frá fyrsta degi
lagt ofurkapp á að hér fái fólk
besta kaffið, matinn og þjónust-
una“, segir Ingvi Steinar. Það
virðist hafa gengið vel því
umfjallanir fjölmiðla hafa verið
lofsamlegar. Um daginn fékk
Laundromat fjórar stjörnur af
fimm í kaffihúsagagnrýni Polit-
iken. Kom fram í dómi blaðsins
að það væri dæmi um hversu
gott eldhús staðarins væri að
fiskisúpan væri ekki fáanleg á
mánudögum enda engan ferskan
fisk að fá þá.
Tók á móti endurskoðandanum á
nærbuxunum
Eins og heiti staðarins gefur til
kynna eru þvottavélarnar ein-
kennismerki staðarins. Segjast
þeir eiginlega undrandi á að eng-
inn annar hafi kveikt á hugmynd-
inni að bjóða fólki upp á á mat og
með því á meðan það þvær þvott-
inn. En vissulega er það þó ekki
þannig að allir gestir staðarins
mæti með þvottakörfuna með sér.
Friðrik segir það hafa gengið
nokkuð hægt í upphafi að fá fólk
til að þvo inni á staðnum en það
hafi breyst.
„Það vill enginn mæta fyrstur í
partí og þetta er soldið svipað því
fólk er feimið í byrjun. En eitt
föstudagskvöldið roguðust í gegn-
um staðinn tvær ákaflega fallegar
ungar stúlkur á pinnahælum með
þungan Ikea poka troðinn af
þvotti. Vöktu þær töluverða
athygli gesta. Ég minnist þessa
augnabliks sem ákveðins vendi-
punkts enda hefur verið nóg að
gera í vaskeríinu síðan þá. Núna
er enginn feiminn við að þvo þótt
staðurinn sé fullur af fólki“.
Ingvi Steinar bætir við að það
sé mikill kostur að hafa þurrkara á
svæðinu. Hann rifjar upp að einn
morguninn hafi hann tekið á móti
endurskoðandanum og grænmetis-
salanum á nærbuxunum enda hafi
hann ákveðið að skella buxunum í
þurrkarann þegar hann mætti á
morgunvaktina rennblautur eftir
hjólatúrinn í vinnuna.
498 staðir í viðbót!
Munurinn á íslenskum og dönsk-
um kaffihúsagestum er ekki svo
stór að sögn þeirra félaga. Þó er
það þannig að Danir eru óvanir
borðþjónustu á kaffihúsum og
ekki óalgengt að fólk taki sjálft
af borðum og komi með á barinn.
Friðrik telur að Danir eyði meiri
tíma og peningum á kaffihúsum
en fólk heima á Íslandi. „Fólk
hittist frekar úti á kaffihúsi en
heima hjá sér. Enda búa margir
ansi smátt og nenna því ekki að
taka á móti fólki heima“.
Nú þegar staðirnir verða brátt
tveir eru ekki úr vegi að spyrja
hvort von sé á fleiri stöðum í
Kaupmannahöfn eða annars stað-
ar. Brynjólfur verður fyrstur
fyrir svörum og segir hlæjandi að
stefnan sé sett á 498 staði í viðbót!
Ingvi Steinar bætir við, alvarlegri
á svip, að sú mikla athygli og góða
umfjöllun sem staðurinn hafi
fengið frá erlendum fjölmiðlum
sé ákveðin vísbending um að
Laundromat gæti gengið hvar
sem er. Hann segir þá margoft
hafa verið spurða hvenær Laun-
dromat opni heima. Friðrik grípur
fram í og segir að staður númer
fimm hundruð verði opnaður í
Reykjavík. Þeir skellihlæja og
greinilega kátir með gang mála.
Ef áætlanir þeirra Laundromat-
félaga ganga eftir verða það fleiri
en Kaupmannahafnarbúar sem
taka þvottinn með sér í næstu
kaffihúsaferð. Forvitnir geta kíkt
á heimasíðu Laundromat og
fengið sýnishorn af staðnum.
Fyrst tökum við Kaupmannahöfn
Hvað sem líður kaupum Íslendinga á dönskum
stórfyrirtækjum hefur sennilega kaffihúsið The
Laundromat Café borið hróður íslenskra athafna-
manna í Danmörku víðast. Innan skamms opna
eigendurnir annan stað, nú á Austurbrú. Kristján
Sigurjónsson tók athafnaskáldin tali á kaffihúsi í
nágrenni við nýja staðinn.
Við erum hér öllum
stundum og það er að
skila sér…
Það kemur reglulega
fyrir að gestirnir óski
manni til hamingju með
kaupin á hinu og þessu
fyrirtækinu.“
BRYNJÓLFUR GUÐMUNDSSON
„Okkur finnst þetta líka bara svo
skemmtilegt.“
INGVI STEINAR ÓLAFSSON
Fyrsta kaffihúsið var í hverfi sem iðaði
af lífi og allir þekktu alla.
FRIÐRIK WEISSHAPPEL
„Ókostur að kærastan sendir mig
með þvottinn í vinnuna.“
FRIÐRIK, INGVAR OG BRYNJÓLFUR Laundromat fékk
fjórar stjörnur af fimm í kaffihúsagagnrýni Politik-
en. Kom fram í dómi blaðsins að það væri dæmi
um hversu gott eldhús staðarins væri að fiskisúpan
væri ekki fáanleg á mánudögum enda engan fersk-
an fisk að fá þá. FRÉTTABLAÐIÐ/KRISTJÁN SIGURJÓNSSON