Fréttablaðið - 30.09.2008, Blaðsíða 34
18 30. september 2008 ÞRIÐJUDAGUR
timamot@frettabladid.is
ÍTALSKA LEIKKONAN MONICA
BELLUCCI ER FERTUG Í DAG.
„Tíminn eyðileggur allt.“
Monica Bellucci náði heimsat-
hygli með leik sinum í mynd-
unum Malèna, Brotherhood of
the Wolf og Irréversible.
Lagadeild Háskóla Íslands fagnar því
á morgun að liðin eru eitt hundrað ár
frá því að lagakennsla hófst á Íslandi.
Af því tilefni verður öllum lögfræðing-
um landsins, um 1.500 talsins, boðið til
afmælismóttöku á Háskólatorgi, auk
laganema við deildina og annarra vel-
unnara.
„Við það tækifæri verður útgáfu
Lögfræðiorðabókar, í ritstjórn Páls
Sigurðssonar prófessors við lagadeild-
ina, fagnað en hún er sú fyrsta sinn-
ar tegundar,“ segir Björg Thorarensen
deildarforseti lagadeildar Háskóla Ís-
lands. „Í henni er að finna samansafn
hugtaka og lagamáls sem hefur mótast
á síðastliðinni öld. Þar eru hátt í 13.000
uppflettiorð og hefur ritið ótvírætt
notagildi fyrir lögfræðinga. Það er þó
ekki síður gagnlegt fjölmiðlamönn-
um en fréttaflutningur af lögfræðileg-
um málefnum vegur jafnan þungt. Þá
er ritinu ekki síst ætlað að höfða til al-
mennings og stuðla að auknum skiln-
ingi á lögfræðilegri orðræðu.“
Afmælisdagskránni verður svo
haldið áfram og efnt til hátíðarmál-
þings sem ber yfirskriftina Lögfræði
og laganám í aldarspegli. Í tengslum
við það verða flutt erindi og fyrirlestr-
ar langt fram á vor. „Þar verður meðal
annars fjallað um lögfræði og laga-
nám á Íslandi frá sjónarhóli sagnfræði
og heimspeki og tekist á við spurning-
ar um hlutverk lögfræðinnar í nútím-
anum. Ýmsum erlendum fyrirlesurum
verður boðið til landsins. Má þar nefna
Antonin Scalia, dómara við Hæstarétt
Bandaríkjanna, og Rosalyn Higgins,
fyrstu konuna sem var skipuð í starf
dómara við Alþjóðadómstólinn í Haag,
en hún er núverandi forseti dómsins.
Eins fáum við þekkta erlenda fyrirles-
ara sem fjalla um hafrétt og umhverf-
isrétt en lagadeild Háskóla Íslands
hefur viljað marka sér sérstöðu á því
sviði,“ segir Björg.
Að hennar sögn hefur margt breyst
frá því að lagaskólinn tók til starfa
árið 1908 og fram til dagsins í dag, en
skólinn varð að lagadeild við stofn-
un Háskóla Íslands árið 1911. „Stofn-
un lagaskólans var stórt skref í sjálf-
stæðisbaráttu Íslendinga enda mik-
ilvægt að kennsla og rannsóknir í
íslenskum lögum færu fram á Íslandi.
Eins að embættismenn hefðu íslenska
lögfræðimenntun í stað menntunar
frá Kaupmannahafnarháskóla,“ segir
Björg. „Í fyrstu var skólinn dæmi-
gerður embættismannaskóli en eftir
því sem fram liðu stundir var meira
lagt upp úr rannsóknum og alþjóðlegri
samvinnu og í dag starfar hann á mun
breiðari grundvelli.“
Þegar lagaskólinn tók til starfa voru
nemendurnir átta en í dag eru 750 nem-
endur við deildina. „Það felst mikil
hvatning í því að nú á þessu hundr-
aðasta starfsári eru 300 nemendur að
hefja nám við deildina en þeir hafa
aldrei verið fleiri,“ segir Björg og
nefnir ýmsar skýringar á því.
„Það er mikill áhugi á lögfræði í
samfélaginu og fólk veit að þetta er
háskólanám sem nýtist vel. Þá fórum
við í öfluga kynningu á náminu í vor
sem hefur skilað sínu. Eins er því hald-
ið fram að margir vilji nýta tímann nú
á meðan samdráttur er í efnahagslíf-
inu og næla sér í háskólagráðu sem
nýtist í framtíðinni.“
Björg segir aðsóknina sérstaklega
ánægjulega í ljósi aukinnar samkeppni
en frá árinu 2002 hefur lagadeild-
in verið í samkeppni við þrjár aðrar
lagadeildir: við Háskólann í Reykja-
vík, Háskólann á Bifröst og Háskól-
ann á Akureyri. „Við bjuggumst við
því að nemendafjöldinn myndi ef til
vill dreifast meira en í stað þess hefur
áhuginn aukist og ljóst að lagadeild-
in heldur umtalsverðu forskoti,“ segir
Björg glöð í bragði.
Hún segir lögfræðina góðan grunn
fyrir hinar ýmsu greinar og að marg-
ir ráðamenn þjóðarinnar og forvígis-
menn stjórnmálaflokka hafi útskrifast
frá lagadeild. „Eins nýtist námið víða í
atvinnulífinu en lögfræðin kemur við
nánast öll svið daglegs lífs hvort sem
það er í starfi eða einkalífi.“
vera@frettabladid.is
LAGADEILD HÁSKÓLA ÍSLANDS: FAGNAR ALDARAFMÆLI
Nýnemar aldrei fleiri
MIKIL HVATNING Björg Thorarensen segir Lögfræðiorðabók, í ritstjórn Páls Sigurðssonar
prófessors við lagadeild Háskóla Íslands, hafa mikið notagildi fyrir lögfræðinga og fjölmiðlafólk.
FRÉTTABLAÐIÐ/GVA
MERKISATBURÐIR
1148 Bærinn í Hítardal í Mýra-
sýslu brennur til kaldra
kola. Þar farast meira en
70 manns, þar á meðal
biskupinn í Skálholti,
Magnús Einarsson.
1966 Botsvana fær sjálfstæði
frá Bretlandi.
1994 Brú, 302 metrar að lengd,
er tekin í notkun yfir
Kúðafljót. Við það stytt-
ist hringvegurinn um átta
kílómetra.
1996 Eldgos hefst undir Vatna-
jökli 30. september og
stendur til 13. október.
2005 Umdeildar skopteikning-
ar af Múhameð spámanni
birtast í danska dagblað-
inu Jyllandsposten.
2006 Bandaríkjaher yfirgef-
ur formlega herstöðina á
Keflavíkurflugvelli.
Sjónvarpið hóf útsending-
ar þennan dag árið
1966. Sjónvarpið er
deild innan Ríkisút-
varpsins, RÚV, sem
einnig rekur þrjár út-
varpsstöðvar.
Í fyrstu var sjón-
varpað tvisvar sinnum
í viku, á miðvikudög-
um og föstudögum.
Útsendingum fjölg-
aði þó jafnt og þétt
og lengi vel var sjón-
varpað alla daga nema
fimmtudaga. Sjónvarp-
ið fór í sumarfrí í júlí ár
hvert, allt til ársins 1983 og þá lágu útsending-
ar niðri. Það var svo í október árið 1987 sem byrj-
að var að sjónvarpa alla
daga vikunnar.
Áður en Ríkis-
útvarpið var stofn-
að hafði Kana-
sjónvarpið svo-
nefnda verið með
útsendingar en
bandaríski herinn
á Miðnesheiði hélt
þeim úti.
Fréttaþjónusta
Ríkissjónvarps-
ins efldist til muna
þegar erlendar
fréttir fóru að ber-
ast til landsins í sept-
ember árið 1981 í gegnum jarðstöðina Skyggni í
Mosfellsbæ.
ÞETTA GERÐIST: 3 0. SEPTEMBER ÁRIÐ 1966
Sjónvarpið hóf útsendingar
„Ég hallast að því að þær áhyggjur
sem menn höfðu þegar lagst
var í hleranir hafi kannski verið
ástæðulausar þegar fram í sækir,“
segir Guðni Th. Jóhannesson
sagnfræðingur. Hann heldur erindi í
fundaröð Sagnfræðingafélags Íslands
í dag um ástæður hlerana í kalda
stríðinu.
Guðni mun í erindi sínu rýna í
ástæður þess að óskað var eftir og
gefið leyfi fyrir hlerunum. „Ég ætla
að reyna að færa umræðuna aðeins
áfram. Menn hafa ýmist talið hleranir
nauðsynlegar vegna mótmæla flokks
sem hafði byltingu á stefnuskrá
eða óþarfar og ólöglegar og innrás í
einkalíf. Ég ætla að skoða hvert tilfelli
fyrir sig og hvort ástæða hafi verið
fyrir þeim ótta sem kallaði á hleranir
eða ekki.“
Guðni segir oft erfitt að sjá
samhengið á milli ótta við óspektir og
hlerana hjá ákveðnum einstaklingum.
„Það er óljóst af hverju sumir voru
hleraðir. Í eitt skiptið virðist alnafni
manns hafa verið hleraður fyrir
misgáning og af einhverjum ástæðum
var góður og gegn sjálfstæðismaður
hleraður. Þá skilur maður ekki, fyrst
leyfðar voru hleranir á annað borð, af
hverju var ekki beðið um hleranir við
önnur sambærileg tilefni.“
Guðni heldur erindi sitt í
Þjóðminjasafni Íslands klukkan 12.05
í dag.
Hleranirnar í raun óþarfar
ÁSTÆÐULAUS ÓTTI Guðni telur að stundum
hafi ótti sem kallaði á hleranir verið
ástæðuaus. FRÉTTABLAÐIÐ/ARNÞÓR
Starfsmenntunarsjóður
Bandalags kvenna í Reykja-
vík verður með markaðs-
sölu að Hallveigarstöð-
um, Túngötu 14, klukkan 13
næstkomandi laugardag.
Ágóði af markaðnum fer til
að styrkja ungar konur til
framhaldsnáms.
Fjáröflunarnefndin
tekur við alls konar
varningi og kompudóti
á Hallveigarstöðum
frá klukkan 18 til 22
næstkomandi föstudag.
Þeim sem vilja styrkja
gott málefni og taka til í
geymslunum hjá sér er
velkomið að koma með dót
að Hallveigarstöðum.
Ungar konur styrktar
Tekið verður við varningi á Hall-
veigarstöðum á föstudaginn.
Okkar ástkæra,
Gunnlaug F. Olsen
Kirkjuvegi 14, Keflavík,
lést á Heilbrigðisstofnun Suðurnesja fimmtudaginn
25. september. Hún verður jarðsungin frá Keflavíkur-
kirkju fimmtudaginn 2. október kl. 14.00.
Jón Kr. Olsen
Júlía S. Olsen
Helga R. Taylor Jessie W. Taylor
Henry Olsen
Rut Olsen Ingólfur Halldórsson
Gunnlaug Olsen Hólmar Gunnlaugsson
Jóna Kr. Olsen
Helgi Olsen
Kristján Helgi, Emelía Rut,
Ásthildur Eva
og aðrir afkomendur.
Steinsmiðja
• Viðarhöfða 1
• 110 Reykjavík
• 566 7878
• Netfang: rein@rein.is
• Vönduð vinna
REIN
Legsteinar
í miklu úrvali
Ástkær systir mín og frænka,
Hrund Tryggvadóttir
frá Miðgerði,
andaðist miðvikudaginn 24. september 2008 á
Dvalarheimilinu Hlíð. Útförin mun fara fram í kyrrþey.
Fyrir hönd aðstandenda.
Björg Sigríður Tryggvadóttir
Heiða Guðrún Vigfúsdóttir
Hafdís Guðfinna Vigfúsdóttir.