Morgunblaðið - 12.05.2006, Blaðsíða 45
MORGUNBLAÐIÐ FÖSTUDAGUR 12. MAÍ 2006 45
MINNINGAR
✝ Rósa Guðjóns-dóttir fæddist á
Hvammstanga 25.
apríl 1933. Hún
lést á Heilbrigðis-
stofnun Hvamms-
tanga 3. maí síðast-
liðinn. Foreldrar
hennar voru Ólöf
Magnúsdóttir, f.
21. júlí 1896, d. 3.
nóvember 1982, og
Guðjón Guðmunds-
son, f. 11. maí
1893, d. 27. júlí
1975. Systkini Rósu
samfeðra eru Jónas, f. 4. nóv-
ember 1916, Þorgrímur Guð-
mundur, f. 18. nóvember 1920,
Ásdís Margrét, f. 11. apríl 1922,
Hólmfríður Þóra, f. 11. apríl
1922, Gunnar, f. 7. ágúst 1925,
og Ólafur, f. 1. júní 1928. Eru
þau öll látin nema Hólmfríður
sem býr í Reykjavík.
Eftirlifandi eiginmaður Rósu
er Magnús Jónsson, f. í Reykja-
vík 6. september 1933. Foreldr-
ar hans voru Ólöf Guðmunds-
dóttir Björnsson og
Jón Jónsson og eru
þau bæði látin.
Dætur Rósu og
Magnúsar eru Ólöf,
f. 22. júní 1953,
maki Svanur Guð-
bjartsson, Jóna
Helga, f. 7. ágúst
1954, maki Hafliði
Elíasson, Ögn
Magna, f. 4. júlí
1956, maki Guð-
mundur Haukur
Sigurðsson, og
Auðbjörg Kristín,
f. 2. desember 1969, maki Jón
Hilmar Karlsson. Barnabörnin
eru níu og barnabarnabörn þrjú.
Rósa ólst upp á Vatnsnesi og
Vesturhópi hjá móður sinni og
hennar fólki. Rósa og Magnús
hófu búskap á Hvammstanga
1952. Þau reistu sér hús á
Garðavegi 8 sem þau fluttu í
1955 og bjuggu í alla tíð síðan.
Útför Rósu verður gerð frá
Hvammstangakirkju í dag og
hefst athöfnin klukkan 14.
Að fylgja ástvinum sínum til hinstu
hvíldar er alltaf erfitt. Í dag mun ég
fylgja ömmu minni til grafar og er ég
fegin að eftir erfið veikindi fékk hún
loks hvíldina. Söknuðurinn er til stað-
ar, en eftir sitja minningarnar.
Amma fékk mig í afmælisgjöf á sín-
um tíma og hefur alla tíð verið einn af
hornsteinunum í lífi mínu. Amma var
stór kona, með ákveðnar skoðanir á
hlutunum og gerði miklar kröfur til
sín, t.d. varðandi prjóna- og sauma-
skap. Stundum einum of miklar að
mér fannst. Hún var ætíð til staðar
fyrir mig, tilbúin til að ræða um allt
sem mér lá á hjarta, sem og spjalla
um lífið og tilveruna. Amma var dug-
leg við bakstur og gerði heimsins
besta mat, svo það er ekki nema von
að ég hafi verið svolítið pattaraleg
sem krakki þegar við mamma bjugg-
um hjá ömmu og afa.
Elsku amma. Ég er afar þakklát
fyrir tíma okkar saman og að Dagur
Smári hafi fengið að kynnast þér.
Hann hefur svolitlar áhyggjur af því
að eiga ekki eftir að fá aftur pönnu-
kökur hjá þér. Ætli ég verði því ekki
að taka fram pönnuna og spaðann
sem þú gafst mér um árið og æfa mig
í bakstri. Það verður skrautlegt!
Elsku afi, þú hefur misst mikið, en
við hin munum hlúa vel að þér.
Elín Jóna.
Elsku amma og langamma. Við
kveðjum þig með sorg í hjarta. Heim-
ili ykkar afa stóð okkur alltaf opið,
drekkhlaðið kærleik og kræsingum
sem þú passaðir upp á að allir fengju
örugglega nóg af. Umhyggja þín fyrir
öðrum var alltaf í fyrirrúmi og við fór-
um ekki varhluta af þeirri góð-
mennsku.
Ég sendi þér kæra kveðju,
nú komin er lífsins nótt.
Þig umvefji blessun og bænir,
ég bið að þú sofir rótt.
Þó svíði sorg mitt hjarta
þá sælt er að vita af því
þú laus ert úr veikinda viðjum,
þín veröld er björt á ný.
Ég þakka þau ár sem ég átti
þá auðnu að hafa þig hér.
Og það er svo margs að minnast,
svo margt sem um hug minn fer.
Þó þú sért horfinn úr heimi,
ég hitti þig ekki um hríð.
Þín minning er ljós sem lifir
og lýsir um ókomna tíð.
(Þórunn Sigurðardóttir.)
Blessuð sé minning þín.
Sunna Rós, Birta Ósk, Bylgja
Rún og Svala Rut.
Lítill, sjóndapur snáði, lafhræddur
og skilinn eftir á ókunnum stað, víðs-
fjarri heimahögunum. Þannig var
ástatt fyrir mér er ég man fyrst eftir
mér á Hvammstanga hjá Rósu og
Magga föðurbróður. Dvölin að þessu
sinni varaði í tvær vikur en fyrir fimm
ára snáða varð þetta heilt ævintýri
þegar yfir lauk og upphaf ævarandi
vináttu og virðingar. Æ síðan í þau 40
ár sem liðin eru hefur fjölskylda mín
notið gestrisni, vináttu og hlýju Rósu
og Magga og hvergi hefur borið
skugga á. Rósa og Maggi eru ætíð
nefnd í sömu andránni enda lífsföru-
nautar frá unga aldri og samstilling
þeirra einstök og aðdáunarverð.
Á hverju ári alla mína æsku, þegar
farið var í sumarfrí fór ég með for-
eldrum mínum, systur og bróður
norður í land og undantekningarlaust
var komið við á Hvammstanga hjá
Rósu og Magga. Móttökurnar ævin-
lega glaðar og gestrisnin í fyrirrúmi.
Okkur systkinunum úr Reykjavík
fannst við vera komin í Paradís á
jörðu á Garðaveginum þar sem kýr og
kindur voru nánast við útidyrnar og
allt í öllu var Rósa, glæsileg á sinn
einstaka hátt.
Svo komu fullorðinsárin með hefð-
bundnu veraldarvafstri stráksins og
sambandið varð minna þar til flust
var með fjölskylduna norður í land.
Nú hófst nýr kapítuli í samskiptunum
og dæturnar kynntust Rósu og henn-
ar hlýja viðmóti. Fastur liður var að
koma við á ferðum okkar suður eða
norður og ævinlega voru rjóma-
pönnukökurnar hennar Rósu á óska-
listanum hjá smáfólkinu.
Rósa var hafsjór af fróðleik og leit-
aði ég oft til hennar með ættfræði-
spurningar og vangaveltur í þeim efn-
um. Rósa var annáluð fyrir gott
verklag innanhúss sem utan. Hennar
hljómfagra rödd og hinn mikli fróð-
leikur sem hún bjó yfir gerði það að
verkum að unun var að ná góðri
stundu við eldhúsborðið á Garðaveg-
inum og ræða þjóðmálin yfir kaffi-
bolla og þiggja meðlæti úr búrinu.
Í ys og þys nútímaþjóðfélags með
sínum hraða, tækni og tólum þá er
það hinn einfaldi hátíðleiki eldhússins
á Garðavegi 8 og hin hreina sýn á
gæði tilverunnar, sem er svo dýr-
mætt. Við búum við söknuð í hjarta,
eigum góðar minningar, þakklæti fyr-
ir góðar stundir og fölskvalausa vin-
áttu við móður mína í meira en hálfa
öld og okkur systkinin og fjölskyldur
okkar.
Elsku Maggi, Jóna, Lolla, Magna,
Auðbjörg og fjölskyldur, við Gunn-
hildur og dætur okkar sendum ykkur
innilegustu samúðarkveðjur okkar.
Blessuð sé minning Rósu Guðjóns-
dóttur.
Ein agnarsmá stund í almættis nafni,
eitt andartak á ég í mannanna heimi,
en myndirnar þínar í minningasafni,
er munaður kær sem í hjarta ég geymi
(Á. G.)
Ársæll Guðmundsson.
RÓSA
GUÐJÓNSDÓTTIR
FRÉTTIR
Leiðrétt
Ljósmynd af forsetahjónunum, Ólafi
Ragnari Grímssyni og Dorrit Mouss-
aeff, í þjóðgarðinum í Skaftafelli, sem
birtist í blaðinu í gær, var ranglega
merkt Skapta Hallgrímssyni. Morg-
unblaðið fékk myndina senda frá
starfsmönnum þjóðgarðsins.
Póstganga
Íslandspósts
ÁRLEG Póstganga Íslandspósts
verður laugardaginn 13. maí. Ek-
ið verður að Sogni og gengið það-
an meðfram fjallinu ofan Ölf-
usborga til Hveragerðis, þar sem
grillaðar verða pylsur að leið-
arlokum. Gangan tekur ca 2,5
klst. og verður Þór Vigfússon
leiðsögumaður. Komið verður aft-
ur í bæinn kl. 16–17. Allir vel-
komnir.
Póstkort með póstgöngustimpli
ásamt göngubolum verða einnig
ókeypis fyrir göngufólk.
Rútur leggja af stað frá Um-
ferðarmiðstöðinni kl. 9.30 og hafa
viðkomu á dreifingarstöðvunum á
Grensásvegi og í Mjódd. Einnig
fer rúta frá dreifingarstöðinni í
Hafnarfirði kl. 9.30 sem tekur
þátttakendur á dreifingarstöðinni
í Kópavogi. Rútur leggja af stað
frá Póstmiðstöðinni (Jörfa) kl. 10.
80 ára afmæli
Ljósmyndara-
félags Íslands
LJÓSMYNDARAFÉLAG Íslands
fagnar um þessar mundir 80 ára af-
mæli sínu. Af því tilefni verður
haldin fagstefna og afmælishátíð á
Grand hóteli helgina 13.–14. maí
undir heitinu „Augnablik til fram-
tíðar“. Dagskráin verður tvíþætt: Á
laugardeginum verður fagstefna
ætluð fagljósmyndurum, en á
sunnudeginum verður afmælishá-
tíðin opin öllu áhugafólki um ljós-
myndun.
Á fagstefnunni munu ljósmynd-
arar halda fyrirlestra og sýningar á
ljósmyndum sínum, m.a.: Chri-
stopher Morris, fréttaljósmyndari,
Michele Clement, auglýsinga-
ljósmyndari og Pia Sönströd, port-
rettljósmyndari.
Á afmælishátíðinni á sunnudeg-
inum, sem hefst kl. 13, kemur út
bók með yfirlitsmyndum félags-
manna. Forseti Íslands, Ólafur
Ragnar Grímsson, mun hefja af-
mælishátíðina og veita fyrsta ein-
taki bókarinnar viðtöku. Sam-
starfsverkefni Eimskipafélags
Íslands og Ljósmyndarafélagsins
um ljósmyndasamkeppni vegna
dagatals Eimskips verður kynnt.
Haldin verður myndasýning frá
Hasselblad, en þar koma 20 íslensk-
ir ljósmyndarar við sögu og verður
sýning á breiðtjaldi sem er 8x3
metrar. Christopher Morris segir
frá og sýnir sínar myndir svo og
Michele Clement. Þá kynnir Iðn-
skólinn í Reykjavík nám í ljós-
myndun og sölu- og þjónustuaðilar,
s.s. Apple, Canon og Beco, kynna
myndavélar og tengdan búnað.
Nánari upplýsingar um dagskrá
afmælishátíðarinnar má nálgast á
vef Samtaka iðnaðarins,www.si.is.
ÁRLEGUR stafgöngudagur ÍSÍ
verður á morgun, laugardaginn
13. maí.
Á stafgöngudeginum taka þjálf-
arar á móti göngufólki á 14 stöð-
um á landinu og kenna rétta notk-
un stafanna og síðan verður
gengið í u.þ.b. 45 mínútur. Allir
þátttakendur fá að gjöf skrefmæla
frá Kelloggs.
Kennslan fer fram á eftirtöldum
stöðum:
Stafgöngudagur ÍSÍ
Reykjavík Skautahöllin kl. 13 og 14
Akranes skógræktin kl. 10
Borgarnes sparisjóðspl. kl. 10.30
Reykhólar skólinn kl. 11
Akureyri Kjarnaskógur kl. 14
Stórutjsk. Vaglaskógur kl. 14
Þórshöfn Íþróttahúsið kl. 13
Egilsstaðir Vilhjálmsvöllur kl. 10
Neskaupst. flugvallarsk. kl. 10
Laugarvatn Íþróttamiðst. kl. 15.15
Selfoss Íþróttavöll. kl. 14
Garðabær Vífilsstaðavatn kl. 10
Garðabær Ásgarður kl. 11
Kópavogur Fífan kl. 12
Vorhátíð í
Hvassaleitisskóla
ÞRAUTABRAUT fyrir fjarstýrða
bíla, grillaðar pylsur og veltibíll eru
meðal uppákoma á Vorhátíð
Hvassaleitisskóla sem fram fer í
dag. Hátíðin hefst kl. 17 á lóð skól-
ans og stendur fram til klukkan 19.
Það er Foreldra- og kennara-
félag skólans sem stendur fyrir há-
tíðinni, en auk fyrrgreindra atriða
verða leikjastöðvar, skemmtiatriði
yngri nemenda, kökubasar, hjóla-
braut og myndsýning eldri nem-
enda á dagskrá svo eitthvað sé
nefnt. Aðstandendur barna í skól-
anum og aðrir hverfisbúar eru
hjartanlega velkomnir.
Svæðismót
votta Jehóva
TVEGGJA daga svæðismót votta
Jehóva verður haldið í Íþróttahús-
inu Digranesi í Kópavogi helgina
13. og 14. maí. Mótshaldið er árleg-
ur viðburður og koma meðlimir
safnaðarins af öllu landinu. Stef
mótsins að þessu sinni byggist á
orðum Páls postula í Kólossubréf-
inu 3:10: „Íklæðumst hinum nýja
manni“.
Árdegis á laugardag verður
skírnarathöfn og Boðunarskólinn
verður einnig á dagskrá laugardag-
inn fyrir hádegi. Á mótinu verða
nokkrir nemendur skólans með
stuttar ræður og sviðsett samtöl um
biblíuleg efni.
Norskur umsjónarmaður safn-
aðarins, Roger Paterson, verður
aðalræðumaður á svæðismótinu. Á
sunnudaginn 14. maí kl. 13.30 mun
hann flytja aðalræðu mótsins sem
nefnist Sigrar þú hinn vonda?
Mótshaldið er öllum opið og eru
allir sem hafa áhuga á biblíu-
fræðslu velkomnir. Dagskrá móts-
ins hefst báða dagana kl. 9.40.