Morgunblaðið - 31.05.2008, Side 14

14 LAUGARDAGUR 31. MAÍ 2008 MORGUNBLAÐIÐ
ALÞINGI
Samkomulag um þingfrestunnáðist í gær, sagði Ög-mundur Jónasson á morg-unvakt RÚV á fimmtu-
dagsmorgun. Ég var varla komin á
fætur og missti hafragrautinn næst-
um í gólfið. „Í gær!“ hrópaði ég og
þusaði svo með látum um að ég
hefði jú hangið á Alþingi fram til
miðnættis, einmitt í von um að sam-
komulag næðist og ég gæti komið
því í Morgunblaðið áður en það fór í
prentun.
Ögmundur átti sín einskis ills von
þegar ég stökk á hann í þinginu og
og vildi útskýringar á þessu. Jú,
samkomulag hafði náðst milli kl. 1
og 2 um nóttina. „Það heitir ekki
gær, það heitir nótt, útlendingar
myndu meira að segja tala morg-
un,“ tuðaði ég við örþreyttan þing-
flokksformanninn. En samkomulag
hafði náðst og dagskráin gekk því
hraðar en annars hefði mátt búast
við.
Síðustu dagar Alþingis fyrir þing-
frestun eru alltaf dálítið kaótískir. Á
göngunum er aðallega rætt um eitt:
Hvaða mál fara í gegn og hvenær
kemst þingið heim? Enginn veit
neitt en einhvern veginn verður
stemmningin eins og allir séu saman
í þessu, saman í óvissunni.
Í heilan vetur er búið að leggja
fram hundruð mála og þræta um
þau fram og aftur. Deila um þing-
sköp og deila um dagskrá. Svo allt í
einu á síðustu dögunum gerist allt.
Aldrei er meira líf á Alþingi. Ráð-
herrar og þingmenn á vappi, starfs-
fólk á þönum og fjölmiðlafólk að
reyna að átta sig á hvað er eig-
inilega um að vera.
Æst kona og æstur stigi
Hringt er inn til atkvæðagreiðslu
og þingsalurinn fyllist af lífi. Forseti
tilkynnir hvað er verið að greiða at-
kvæði um og svo heyrast mörg
„klikk“ þegar þingmenn ýta á
hnappana. Já eða nei, eða sitja hjá.
Klikk, og orkufrumvarpið, sem
tók um 12 klukkustundir að ræða,
er orðið að lögum. Klikk, og nú geta
trassar fengið háa sekt fyrir að láta
ekki skoða bílinn sinn.
Atkvæðagreiðslum lýkur og
ræðuhöldin taka við að nýju. Ég
skrepp út í háskóla og gleymi mér í
spjalli í Nýja garði. Allt í einu kipp-
ist ég við og man að sjávarútvegs-
ráðherra ætlaði að koma með ein-
hverja yfirlýsingu varðandi
kvótakerfið og álit mannréttinda-
nefndar Sameinuðu þjóðanna. Ég
kveð í flýti (eða kvaddi ég kannski
ekki?), hálfdett út um dyrnar og
hjóla í spani niður á þing. Við dyrn-
ar út í Alþingisgarð gæða nokkrir
þingmenn sér á konfekti (konfekt í
Alþingishúsinu þýðir langir fundir,
þá fáum við súkkulaði). Þó að ég sjái
fjölda þingmanna, sem þýðir að
sjávarútvegsráðherra er varla í
ræðustóli með tímamótayfirlýsing-
ar, er ég enn stressuð og hleyp af
stað upp stigann. En stiginn er jafn-
æstur og ég. Ég stoppa.
Í þingsal stendur Guðbjartur
Hannesson og talar um samninga
milli þeirra sem eiga sumarbústaði
og þeirra sem eiga landið sem bú-
staðirnir eru í. Hann er hinn róleg-
asti meðan jarðskjálftinn ríður yfir
og heldur svo ræðu sinni áfram.
Kjartan Ólafsson situr í forsetastóli.
Á sama tíma hrynja myndir af
veggjum á heimili hans á Suður-
landi. Heilu bókaskáparnir detta um
koll og eldhúsið fyllist af glerbrot-
um.
Sumir hlupu út úr þinghúsinu,
sem er auðvitað hið eina rétta í stöð-
unni, aðrir hlupu bara eitthvert og
enn aðrir stóðu kyrrir, eins og ég.
Þeir þingmenn sem eiga heimili á
Suðurlandi drifu sig heim strax eftir
jarðskjálftann. Þingfundur hélt
áfram og tímamótayfirlýsingar sjáv-
arútvegsráðherra voru víst á dag-
skrá kl. 4, en ekki hálffjögur eins og
ég hafði óttast. Kvótakerfið verður
endurskoðað, sagði ráðherrann, en
Grétar Mar Jónsson var hinn ósátt-
asti og blandaði samana tveimur
þekktustu ummælum seinni tíma
stjórnmálasögunnar, þegar hann
sakaði menn um skítlegt eðli og
kallaði þá druslur í leiðinni.
Allir í beinni
Líklega voru það frekar lætin í
jörðinni en lætin í Grétari sem ollu
því að stemmningin í Alþingishúsinu
var breytt. Í mötuneytinu vék Al-
þingisrásin fyrir beinni útsendingu
Ríkissjónvarpsins og allir töluðu um
hvar þeir voru þegar skjálftinn reið
yfir og í leiðinni hvar þeir voru þeg-
ar jörðin skalf síðast svona mikið.
Dómsmálaráðherra, sem annars
svarar helst ekki spurningum fjöl-
miðla öðruvísi en í tölvupósti, var
ítrekað í beinni útsendingu, eins og
reyndar fjöldi fólks, enda komst
ekkert annað að en jarðskjálftinn.
Líklega gerðist fátt í heiminum í
gær.
Merk yfirlýsing sjávarútvegsráð-
herrans komst ekki að í fréttum
sjónvarps og atvinnubílstjórarnir
sem komu með líkkistur á Aust-
urvöll fengu enga athygli.
Eftir kvöldverðarhlé voru aftur
atkvæðagreiðslur. Klikk, klikk,
klikk, hljómaði um salinn og Ísland
á nú ný lög um öll skólastigin. Þing-
menn voru sumir orðnir þreyttir en
sáu fram á að greiða atkvæði inn í
nóttina.
Í mötuneytinu sátu ráðherrabíl-
stjórarnir, ekki með neinar líkkist-
ur, þó þeir séu atvinnubílstjórar.
Nóg af konfekti á borðum og hvort
sem það var vegna sykursins, þreyt-
unnar eða léttisins yfir að náttúran
hafði ekki leikið okkur verr, þá var
aðeins meiri gálgahúmor í fólki en
venjulega.
Ljósmyndari Morgunblaðsins
mætti á staðinn á ellefta tímanum.
Við höfðum vonast til að ná klass-
ískri mynd af því þegar svarnir and-
stæðingar fallast í faðma og kyssast
í bak og fyrir eftir þingfrestun. En í
staðinn fékkst bara mynd af þreytt-
um þingmönnum, enn að tala.
Mogginn fór í prentun. Ég fór
heim að sofa. Ráðherrabílstjórarnir
biðu enn. Í þingsal heyrðist aftur
„klikk klikk“ og nú mega einhleypar
konur fara í tæknifrjógvun.
Klikkandi þingmenn, skjálfti og nóttin sem var í gær
ÞINGBRÉF
Halla Gunnarsdóttir
FUNDUM Alþingis var frestað í fyrrinótt eftir langa og
stranga viku. Á þessum allra síðustu dögum voru 49 frumvörp
samþykkt sem lög og í það heila hafa 112 lög verið samþykkt í
vetur. Þau mál sem ekki voru samþykkt bíða haustsins en með
nýjum þingsköpum eru áætlaðir nokkrir þingfundadagar í
september áður en þingi er slitið. Nýtt þing kemur svo saman
í október og þá þarf að leggja málin fyrir að nýju.
Stjórnarandstaðan hefur sjaldan eins mikil völd eins og á
síðustu þingdögum. Þá fær hún sæti við samningaborðið til að
ræða hvaða mál fara í gegnum þingið að þessu sinni og hvaða
mál þurfa að bíða. Í samningaviðræðum þessa vors var það
helst svonefnt sjúkratryggingafrumvarp heilbrigðisráðherra
sem deilt var um. Embætti forstjóra áætlaðrar Sjúkratrygg-
ingastofnunar hafði þegar verið auglýst en stjórnarandstaðan
var mjög ósátt við hversu seint frumvarpið kom fram.
Þróunarsamvinna og skipulagslög bíða til hausts
Niðurstaðan varð að frumvarpið verður látið bíða til hausts
og stofnunin tekur því ekki til starfa 1. september eins og ráð-
gert var. Vinstri græn og Framsókn urðu hins vegar að sætta
sig við að framhaldsskólafrumvarp menntamálaráðherra yrði
að lögum en flokkarnir hafa mótmælt því harðlega. Önnur mál
sem bíða til hausts eru m.a. þróunarsamvinnufrumvarp utan-
ríkisráðherra, skipulagsfrumvarp umhverfisráðherra og
frumvarp dómsmálaráðherra til almennra hegningarlaga.
Ný þingsköp tóku gildi um síðustu áramót og Sturla Böðv-
arsson, forseti Alþingis, er ánægður með árangurinn. Kvöld-
fundum hafi fækkað mjög frá því sem áður var og næturfundir
eru orðnir fáheyrðir. „Bragurinn er miklu betri og ljóst að það
var rík ástæða til að gera þessar breytingar, enda algerlega
glórulaust að halda úti næturfundum,“ segir Sturla og vekur
einnig athygli á betra aðgengi þingmanna að ráðherrum eftir
að óundirbúnar fyrirspurnir voru settar á dagskrá tvisvar í
viku, í stað þess að vera á tveggja vikna fresti eins og áður.
Frá áramótum hafi ráðherrar svarað 155 óundirbúnum fyr-
irspurnum og 300 áður framlögðum fyrirspurnum.
Þingnefndir vinni ekki á ofurhraða
Sturla segir fyrirferðarmestu málin á þessu þingi hafa verið
skólafrumvörp menntamálaráðherra, breytingar á þingsköp-
um og svo auðvitað fjárlögin, sem alltaf taka mikinn tíma í
umræðu. En Sturla er hvergi hættur í að bæta skipulagningu
þingsins og segir markmiðið nú vera að ráðherrar og þing-
menn skili þingmálum inn fyrir 1. apríl, eins og þeir eiga raun-
ar að gera en oft er veitt undantekning á. „Það er ekki gerlegt
að þingnefndir vinni á þessum ofurhraða og það er takmörk-
um háð hvað hægt er að leggja mikið á okkar öfluga starfsfólk
og auðvitað þingmennina sjálfa. Vissulega geta komið upp mál
sem kalla á neyðaraðgerðir en öll venjuleg mál á að vera hægt
að afgreiða innan tímamarka,“ segir Sturla.
Við þingfrestun greindi Sturla frá því að þegar sé hafin
undirbúningsvinna við að opna suma fundi þingnefnda fyrir
fjölmiðla og hagsmunaaðila. „Ég tel að með því að fjölmiðlar
hafi aðgang að nefndarfundum megi upplýsa betur hvað ger-
ist inni í nefndum. Þjóðin á heimtingu á því,“ segir Sturla og
tekur sem dæmi að þegar fjallað er um skipulagsmál eða þeg-
ar ráðherrar koma fyrir nefndir að hausti væri kjörið að hafa
fundina opna.
112 lög að mestu í björtu
Fundir þingnefnda opnaðir
fjölmiðlum og hagmunaaðilum
Eftir Höllu Gunnarsdóttur
halla@mbl.is
» Frá og með 27. júní hafa prestar og aðrir trúarleiðtogarheimild til að staðfesta samvist samkynhneigðra.
» Fólk sem er að kaupa sína fyrstu íbúð þarf ekki aðgreiða stimpilgjöld eftir 1. júlí.
» Bifreiðaeigendur sem trassa að fara með bílinn í skoðungætu viljað bæta sig, því að frá og með næstu mán-
aðarmótum geta þeir átt von á sektum, allt að 30 þúsund kr.
» Sumarbústaðaeigendur ættu að kynna sér ný lög um frí-stundabyggð en þau taka til allra samninga um leigu á
landi sem gilda lengur en í 20 ár.
» Erlendir sérfræðingar og erlent íþróttafólk geta núfengið tímabundið atvinnuleyfi hér á landi.
» Frítekjumark örorkulífeyrisþega er nú 100 þúsund kr.á mánuði.
» Viðmiðunartímabil vegna fæðingarorlofsgreiðslna hef-ur verið stytt og fært nær töku fæðingarorlofs.
» Stofnað verður opinbert hlutafélag um rekstur Kefla-víkurflugvallar.
» Einhleypar konur í barneignarhugleiðingum þurfa ekkiað vera örvæntingarfullar í makaleit enda geta þær nú
farið í tæknifrjógvun.
» Póstverslun með lyf verður heimil frá og með 1. októ-ber.
» Eldri borgarar sem ekki eiga rétt á eftirlaunagreiðslumúr lífeyrissjóði eiga nú möguleika á sérstakri eftirlauna-
uppbót, að fjárhæð 25 þúsund krónum.
Hvað breyttist?