Litli Bergþór - 01.05.1994, Blaðsíða 24

Þjónustuíbúðir í Laugarási
Frá verkefnisstjóra Kristjönu Kjartansdóttur.
Markmið með verkefninu.
Uppsveitahrepparnir 6, sem stóðu að Límtré og
Yleiningu, hafa nú haldið áfram með
þróunarverkefni og eitt af þeim verkefnum sem
unnið hefur verið að, er svokallað
„Eftirlaunþegaþorp“ eða „Sambyggð eldri borgara".
Markmið með verkefninu er að auka valkosti fyrir
eldri borgara í húsnæðismálum, með því að byggja
þægilegar íbúðir fyrir eldri borgara á viðráðanlegu
verði.
Heimamenn uppsveitahreppanna 6 hafa flestir
einungis haft um þrjá valkosti að ræða:
- að sitja í of stórum / dýrum fasteignum, sem
eru óhentugar eldra fólki.
- að leigja húsnæði.
- að vistast á elli-eða hjúkrunarheimili.
Einnig er hópur fólks sem kýs að eyða
ævikvöldinu fjarri skarkala borgarinnar, þ.e. t.d.
sumarbústaðaeigendur, brottfluttir heimamenn, og
fleiri.
Þessari sambyggð er ætlað að fjölga lögskráðum
íbúum svæðisins og auka þannig fjármagnsstreymi
inn í sveitarfélagið, og síðast en ekki síst að skapa
störf fyrir heimamenn, bæði við byggingu og síðar
við þjónustu við íbúana.
Hvers vegna Laugarás?
Þegar sambyggðir eldri borgara eru skipulagðar
eru það einkum þrír þættir sem verða að vera til
staðar; öryggi, matur og félagsskapur/samvera.
Upphaflega komu 4 staðir til greina fyrir
sambyggðina, það voru Laugarás, Laugarvatn,
Brautarholt og Borg í Grímsnesi, en Laugarás varð
fyrir valinu, fyrst og fremst vegna þess öryggis sem
heilsugæslan skapar. Á landsbyggðinni er nær
undantekningarlaust að sambyggðir eldri borgara
eru byggðar í nágrenni við heilsugæslustöðvar.
Laugarás hefur þó ýmsa fleiri kosti. þar má nefna
að Laugarás er miðsvæðis í héraðinu, umhverfið er
snjólétt, lóðin er á skjólgóðum og kyrrlátum stað,
nálægð við Skálholt og fyrirhuguð bygging
hjúkrunarheimilis.
Eignarform.
Við eignarformið hefur verið horft til
Sunnuhlíðarsamtakanna sem fóru nýja og áður
óþekkta leið. Þar var markmiðið að gera fólki kleift
að nýta eignir sínar, þannig að það gæti, ef það
vildi, notið þeirrar aðstöðu sem fæst í vernduðum
þjónustuíbúðum án þess að þurfa að standa í flóknu
fjármálavafstri og taka á sig skuldbindingar og án
þess að þurfa að borga húsaleigu.
Litli - Bergþór 24