Fréttablaðið - 20.06.2013, Blaðsíða 42
20. júní 2013 FIMMTUDAGUR| MENNING | 30
„Þessi atburður hefur alltaf setið í
mér og mig hefur lengi langað til að
gera leiksýningu um hann,“ segir
Kári Viðarsson, sem ásamt Víkingi
Kristjánssyni semur og setur upp
leiksýninguna 21.07, sem frum-
sýnd verður í Frystiklefanum á Rifi
fimmtudaginn 27. júní.
Verkið fjallar um fræga og undar-
lega uppákomu sem varð fyrir
tæpum tuttugu árum síðan, nánar
tiltekið 5. nóvember 1993. Þá hópað-
ist á sjötta hundrað áhugamanna um
geimverur og fljúgandi furðuhluti
vestur á Snæfellsjökul til að verða
vitni að heimsókn úr geimnum, sem
sjáendur víðs vegar um heiminn
höfðu séð fyrir. Tímasetning lend-
ingarinnar var nákvæm en gestirn-
ir áttu að lenda á slaginu 21.07 um
kvöldið. Íbúar á utanverðu Snæfells-
nesi fóru ekki varhluta af þessum
viðburði, og þeirri athygli sem hann
vakti í innlendum og erlendum fjöl-
miðlum. Þegar á hólminn var komið
létu engar geimverur sjá sig.
Atburðurinn er ljóslifandi í minni
Kára; árið 1993 var hann átta ára
gamall og bjó á Hellissandi, þar sem
dreifibréf var borið í hvert hús og
koma geimveranna var kunngjörð.
„Ég man að þetta hafði djúp áhrif
á mig á sínum tíma,“ rifjar Kári
upp. „Ég var dálítið ímyndunar-
veikt barn og varð sannfærður um
að heimsendir væri yfirvofandi.
Fyrir vikið hef ég alltaf haft það á
bak við eyrað að gera leiksýningu
um þetta mál. Mín sýn var að skoða
þetta frá fleiri vinklum en að þetta
hafi bara verið fyndin uppákoma
heldur gera ólíkum sjónarhornum
skil, þar á meðal mínu persónulega
sjónarhorni.“
Verkið gerist klukkustundina
áður en geimverurnar eiga að lenda.
„Við fáum að kynnast fjölda
persóna og upplifum atburðinn með
þeirra augum,“ segir Kári. „Þarna
fléttast saman sex eða sjö sögur þar
sem sjónarhornið breytist eftir því
hver á í hlut og viðhorf viðkomandi
til þess sem er að gerast.“
Það mæðir mikið á Víkingi og
Kára, því þeir leika öll hlutverkin
en alls koma á bilinu fimmtán til
tuttugu persónur við sögu, sem allar
eiga sér raunverulegar fyrirmyndir
en margra mánaða heimildarvinna
liggur að baki sýningunni.
„Ég tók fullt af viðtölum við fólk
sem kom við sögu, bæði heimamenn
og fólk sem býr í Reykjavík. Ég fór
líka í gegnum gagnasafn RÚV og
við fengum heimamenn til að senda
okkur efni, ýmist sögur, ljósmyndir
eða vídeóupptökur. Sýningin byggir
á þessari vinnu en svo auðvitað
ýkjum við ýmislegt og stækkum til
að búa til núningsfleti og togstreitu
fyrir sýninguna.“
Fimm sýningar eru á dagskrá
í Frystiklefanum en Kári segir
koma til greina að fjölga sýningum
ef aðsókn verður góð.
„Ég geri samt ekki ráð fyrir að
við sýnum þetta verk oftar en sjö
sinnum í sumar.“
En á sýningin eftir að fara á
flakk?
„Nei, ekki séns. Það er stutt á
Rif úr Reykjavík og reynslan hefur
sýnt að fólk er reiðubúið að leggja
land undir fót til að sjá sýningar í
Frystiklefanum. Þessi sýning fer
ekki neitt.“ bergsteinn@frettabladid.is
Geimverurnar lenda á Snæfellsnesi
Geimverulendingin sem aldrei varð á Snæfellsnesi 1993 er til umfj öllunar í leikritinu 21.07, sem frumsýnt verður í Frystiklefanum á Rifi
eft ir viku. Höfundar og leikendur eru þeir Víkingur Kristjánsson og Kári Viðarsson. Ítarleg heimildarvinna liggur að baki verkinu en Kári
segir atburðina hafa haft mikil áhrif á sig, þegar hann var átta ára drengur á Hellissandi og beið eft ir heimsendi.
HORFT TIL
HIMINS Á sjötta
hundrað manns
biðu geimvera
á Snæfellsnesi í
nóvember 1993.
Þær létu ekki sjá
sig.
HVAÐ?
HVENÆR?
HVAR?
FIMMTUDAGUR
20. JÚNÍ 2013
Fræðsla
20.00 Andri Snær Magnason er leið-
sögumaður í fimmtudagskvöldgöngu
á Þingvöllum en titill göngunnar er:
Taktu þetta blað og stingdu því ofaní
sauðarlegg. Andri Snær mun velta upp
ýmsum flötum, spegla þá í sínum eigin
skáldskap og annarra. Kvöldgangan
hefst við fræðslumiðstöðina við Hakið
og eru allir velkomnir.
Upplestur
17.45 Guðbrandur Siglaugsson, skáld
og tónlistarmaður, les upp úr nýjustu
ljóðabók sinni Þúfnatali í Flóru, Hafnar-
stræti 90 á Akureyri. Aðgangur er
ókeypis og allir eru velkomnir.
Tónlist
12.00 Organistarnir Lenka Mátéová
og Guðný Einarsdóttir leika fjórhent
og fjórfætt á hið stóra Klaisorgel í
Hallgrímskirkju á Alþjóðlegu orgel-
sumri. Sjaldgæft er að organistar leiði
saman hesta sína á þennan máta. Efnis-
skráin er samanstendur af verkum eftir
Mozart, Strauss og Elgar. Aðgangseyrir
er 1.700 kr.
21.00 Svavar Knútur heldur tónleika á
Café Rosenberg. Aðgangseyrir kr. 1.500.
21.00 Eðvarð Lárusson gítarleikari
fagnar 50.ára afmæli sínu á Ob-La-
Dí-Ob-La-Da,Frakkastíg 8. Fjölmargir
listamenn munu mæta og taka lagið
með afmælisbarninu.
Myndlist
16.00 Kínversk-íslenska menningar-
félagið efnir til sýningar á verkum Lu
Hong í Ráðhúsi Reykjavíkur. Sýningin er
haldin í tilefni af 60 ára afmæli félags-
ins. Lu Hong tvinnar saman í verkum
sínum íslenska þjóðarvitund og æva-
fornar hefðir kínverskrar myndlistar.
18.00 Sýningin Spectators verður
opnuð í Artíma gallerí, Skúlagötu 28. Á
sýningunni eru olíumálverk eftir mynd-
listarmennina Stephen Morrison, Þránd
Þórarinsson og Rögnvald Skúla Árnason
dregin saman.
Upplýsingar um viðburði sendist á hvar@
frettabladid.is
VÍKINGUR KRISTJÁNSSON
OG KÁRI VIÐARSSON
Leikritið 21.07 byggir á ítarlegri
heimildarvinnu og persónur
verksins eiga sér raunverulegar
fyrirmyndir.
Bayard Jeunesse, næststærsta
barnabókaforlag Frakklands,
hefur fest kaupin á útgáfuréttinum
á bók Bryndísar Björgvinsdóttur,
Flugan sem stöðvaði stríðið.
Forlagið selur árlega um sex
milljónir eintaka af bókum sínum.
Forlagið hyggst gefa bókina út
snemma árs 2015 og dreifa henni
um hinn frönskumælandi heim.
Flugan sem stöðvaði stríðið er
fyrsta bók Bryndísar og kom út
fyrir tæpum tveimur árum. Sagan
fjallar um þrjár venjulegar hús-
flugur, sem hrinda af stað óvæntri
atburðarás þegar þær flýja að
heiman og binda að lokum enda á
styrjöld.
Bókin hlaut íslensku barnabóka-
verðlaunin 2011 og var tilnefnd til
Fjöruverðlaunanna.
Bryndís Björgvinsdóttir er
þjóðfræðingur að mennt og starfar
meðal annars við rannsóknarstörf
og kennslu.
Flugan til Frakklands
Næststærsta forlag Frakka gefur út bók Bryndísar
BRYNDÍS BJÖRGVINSDÓTTIR Hlaut
Íslensku barnabókaverðlaunin 2011.
Fuglaskoðun á laugardögu m
TÓNLEIKAR, LAUTARFERÐIR OG FUGLASKOÐUN
Í VATNSMÝRINNI Í SUMAR
Fimmtudagar kl 17:00:
Órafmagnaðir tónleikar í gróðurhúsinu. Aðgangur ókeypis.
20. júní After Hours Trio – mjúkir jazz tónar
27. júní Svart kaffi – yljandi jazz
4. júlí Illgresi – hress bluegrass tónlist
11. júlí Ylja – hugljúfur söngur með ljúfum gítar
18. júlí Boogie Trouble – ljóðrænn og íslenskur diskó
25. júlí Fríða Dís Guðmundsdóttir – dásamlegir og draumkenndir tónar
8. ágúst Orfía Örn Eldjárn og Soffía Björg – fagrir tónar
15. ágúst Jazz dúettinn – Singimar kontrabassi og píanó jazz
22. ágúst Brother grass – mjúkir bluegrass tónar
Fuglaverndarfélag Íslands býður upp á ókeypis fuglaskoðanir um
friðlendi Vatnsmýrarinnar á hverjum laugardegi í júní. Göngutúrinn
hefst við andyri Norræna hússins kl. 16:00 og tekur um klukkutíma.
Veitingar seldar í afgreiðslu Norræna hússins og bornar
fram í pikknikk körfum.
Norræna húsið Sturlugata 5 101 Reykjavík S. 5517030 www.norraenahusid.is
MENNING