Fréttablaðið - 24.10.2013, Qupperneq 58

24. október 2013 FIMMTUDAGUR| MENNING LÍFSSTÍLL | 46
Dansbardagi fer fram í íþrótta-
húsi Seljaskóla á laugardag klukk-
an 16. Dansskóli Brynju Péturs
stendur fyrir viðburðinum og er
bandaríski dansarinn og dans-
höfundurinn Emilio Austin Jr,
öðru nafni Buddha Stretch, kom-
inn hingað til lands til að dæma í
keppninni.
Austin var fjórtán ára þegar
hann hóf að æfa dans og byrjaði
feril sinn sem „b-boy“, eða breik-
dansari. Hann segist þó ekki hafa
verið sérlega fær í breik-dansin-
um og því skipti hann fljótlega
yfir í „popping“, sem er dansteg-
und náskyld hipphopp-dansi.
„Ég reif alltaf fötin mín í
breik-dansi, sem var sönnun þess
hversu lélegur ég var, almennileg-
ur breik-dansari rífur ekki göt á
fötin sín,“ segir hann og hlær.
Hipphopp-menningin var að
ryðja sér rúms á þessum tíma
og tók Austin fullan þátt í mótun
þess. „Dansgengi spruttu upp
víða og í mörgum tilfellum urðu
þau þín önnur fjölskylda, jafnvel
þín eina. Það er kannski hægt að
líkja dansgengi við fótboltalið;
allir kunna að spila fótbolta en
þó hefur hver og einn sitt hlut-
verk innan liðsins. Allir í dans-
gengi geta dansað, en svo ertu
með poppara eða breikara.“
Austin á langan feril að baki
sem danshöfundur og hefur meðal
annars unnið náið með tónlistar-
fólki á borð við Busta Rhymes,
Mariah Carey, Will Smith, Salt‘n
Pepa, Whitney Houston, Public
Enemy, Run DMC og Michael Jack-
son. Spurður út í Michael Jackson
segir Austin: „Hann var í einu
orði sagt magnaður! Og alveg sér-
staklega lærdómsfús, hann vildi
vita allt um hipphopp og uppruna
þess og spurði þúsund spurninga.
Ég var 23 ára þegar þetta var og
það var skrítið að standa frammi
fyrir Jackson og svara spurning-
um hans,“ rifjar hann upp.
Þetta er í fyrsta sinn sem
Austin sækir Ísland heim.
Aðspurður segist hann helst leita
eftir fimm atriðum í fari dansara.
„Takti, tækni, færni, hversu skap-
andi dansara eru og karakter – hið
síðastnefnda er það mikilvæg-
asta að mínu mati,“ segir hann að
lokum. sara@frettabladid.is
Frægur dansari
dæmir í dansbardaga
Danshöfundurinn Emilio Austin Jr. dæmir í dansbardaga sem fram fer á laugar-
dag. Hann hefur meðal annars unnið með Michael Jackson og Will Smith.
DANSARAR Emilio Austin Jr. ásamt Brynju Pétursdóttur, hún skipuleggur dans-
bardaga sem fram fer á laugardag. FRÉTTABLAÐIÐ/PJETUR
Smáforritið PIN-Ísland hjálpar
fólki að geyma öll PIN-númer-
in sem það þarf á að halda með
hjálp litaspjalds.
Appið er komið út fyrir
notendur iPhone í íslensku
app-búðinni og fyrir not-
endur Android-snjall-
síma. Það er væntanlegt
á næstu dögum fyrir þá
Íslendinga sem eru að
nota bandarísku eða
bresku app-búðina.
„Þetta er frekar
létt og lítið app en
samt mjög notendavænt.
Það eru fleiri og fleiri stað-
ir að gera kröfu um að fólk setji
inn PIN-númerin sín og þess vegna
er þetta mjög hentugt,“ segir vef-
hönnuðurinn Helgi Pjetur
Jóhannesson, einn af eig-
endum Stokks.
Appið býr til
litaspjald þar sem
þú felur PIN-núm-
erið þitt þannig að
það er ekki aðgengi-
legt neinum nema þér.
Hægt er að búa til eins
mörg spjöld og þú þarft.
Ómögulegt er að giska á
röðina ef maður þekkir ekki
liti og staðsetningu.
„Þetta er 100% öruggt. Appið
er aldrei nettengt. Meira að
segja síminn veit ekki hvert PIN-
númerið er,“ segir Helgi. -fb
PIN falið í litaspjaldi
Appið PIN-Ísland hjálpar fólki að muna PIN-númer.
Algeng spurning í kynfræðslu hjá
mér snýr að fyrsta skiptinu. Þá er
átt við samfarir, ekki munnmök
eða fróun, það hefur oftar en ekki
átt sér stað án spurninga. Algengt
er að velta fyrir sér hver sé rétti
aldurinn til að stunda kynlíf. Í því
samhengi furða ég mig oft á orð-
skrípinu „lögríða“. Það er ekki
eins og þú fáir sent heim bréf á
fimmtán ára afmælinu þínu um að
nú sé búið að skipa handa þér ból-
félaga og þér sé gert að mæta á til-
tekinn stað á tilteknum tíma. Það
gerist ekki við einhvern ákveð-
inn aldur. Maður á bara afmæli
og fær kannski köku. Krakkar
festast samt oft í því hugarfari
að þetta sé eins konar viðmið, nú
loksins hafi þau eitthvað haldbært
um hvenær sé „rétti“ tíminn til að
sofa hjá.
Aðrir velta fyrir sér hvað sé
eðlilegt og hvort það sé einhver
heilög tala í þeim efnum. Ég
brosi gjarnan út í annað við þess-
ar umræður því undantekningar-
laust er ég spurð um mína tölu.
Þau halda gjarnan niðri í sér and-
anum þegar ég geri mig líklega
til að svara, þó spennan breytist
reyndar fljótt í svekkelsi þegar
ég svara „ég bara hef ekkert spáð
í það enda held ég að flestir yfir
tvítugu séu hættir að telja“. Það
er nefnilega heldur ekki hægt að
setja sér viðmið út frá einhvers
konar tölu, þó ég þekki konu sem
reiknaði út að tíu bólfélagar væri
töfratalan og því eru hennar
rekkjunautar allir númer níu. Ein
rannsókn hélt því fram að fleiri
en tuttugu og tveir bólfélagar
væri óásættanlegt. Ég segi bara,
hættið að telja, þetta skiptir engu
máli því talan segir ekkert til um
bólfimi.
Spurningar stelpnanna snúa
oft að ótta. Þær eru hræddar við
sársauka, líkamlegan og tilfinn-
ingalegan. Þetta eru mjög skilj-
anlegar vangaveltur þegar búið
er að hræða þær með heilaga
meyjarhaftinu sem þarf að rjúfa
og svo skvettist blóð upp um alla
veggi því þær voru hreinar. Það
er annað í þessum málum, ég þoli
ekki orðalagið hrein og óhrein því
það virðist bara eiga við stúlkur.
Sjálf fer ég ansi reglulega í bað en
sef líka hjá, hvort er ég þá?
Og að lokum spyrja þau í kór:
„En hvernig veit ég hvenær ég er
tilbúin?“ Og þá er komið að mér að
andvarpa ögn. Ég hef sett saman
ákveðin skilyrði sem ég myndi
gjarnan vilja að þau uppfylltu
fyrst, eins og kynlíf með sjálfum
sér, svo einhverjum öðrum. Þetta
vefst fyrir mörgum dömum en
ekki fyrir drengjunum. Ég reyni
að hræra tilfinningum inn í þetta
og set svo samræður sem algert
skilyrði. Ef þú getur ekki talað við
bólfélaga þinn um kynlíf og sagt
hvað þér þykir gott og spurt hvað
honum/henni þykir gott, þá ertu
ekki tilbúinn til að stunda kynlíf.
Þetta seinasta skilyrði mega for-
eldrarnir gjarnan lesa aftur og
taka til sín.
Samskipti lykillinn að kynlífi
UNGT PAR Táningar eiga fyrst að stunda kynlíf með sjálfum sér, svo með öðrum,
segir Sigga Dögg. NORDICPHOTOS/GETTY
Á þessum tíma árs fara kvef- og flensu-
pestir gjarnan á flakk. Hér má finna
fimm einföld ráð til að styrkja ónæmis-
kerfið og koma í veg fyrir veikindi.
■ Svefn. Góður og reglulegur svefn
styrkir ónæmiskerfið.
■ Vatn. Því meira sem fólk
drekkur af vatni því
hraðar losar líkaminn sig við
eiturefni. Það er sérstaklega
mikilvægt að drekka mikið á
meðan á veikindum stendur.
Heitt vatn með sítrónu er sér-
staklega gott fyrir heilsuna á
köldum vetrardögum.
■ Grænt er vænt. Grænir
drykkir eru fullir af víta-
mínum og því góðir fyrir
heilsuna. Gott er að blanda saman
ananas, banana, kókosmjólk og græn-
káli. Drykkurinn er bæði meinhollur
og orkugefandi.
■ Sviti. Það að svitna losar líkamann
við ýmis eiturefni. Því er mikil-
vægt að hreyfa sig reglulega,
sé fólk þegar orðið veikt
getur verið gott að anda að
sér gufum einfaldlega með
því að sjóða vatn í potti.
■ Óreganó-olía. Kjarnaolía úr
óreganói inniheldur efni sem
geta hamlað vexti sveppagróðurs,
vírusa, baktería og annarra örvera.
Góð ráð gegn fl ensu
Góður svefn og grænir drykkir gegn veikindum.
GRÆNT OG GOTT Grænir drykkir
eru góðir fyrir ónæmiskerfið.
NORDICPHOTOS/GETTY
KYNLÍF TAKTU ÞÁTT!
Sendu Siggu Dögg póst og
segðu henni frá vandamáli
úr bólinu. Lausnin gæti
birst í Fréttablaðinu.
kynlif@frettabladid.is
➜ 50 manns hafa skráð sig í
keppnina. Keppt verður bæði í
einstaklingsflokki og
hópaflokki.