Tölvumál - 01.11.2011, Page 9
T Ö LV U M Á L | 9
Síðastliðin 10 ár hefur Sjá viðmótsprófanir ehf. unnið að því með
viðskiptavinum sínum, fyrirtækjum og stofnunum, að þróa og framkvæma
prófanir, unnið með rýnihópa og hugmyndavinnu í því skyni að bæta,
skipuleggja og hanna betri vefi. Vefurinn hefur breyst mikið á aðeins þessum
tíu árum og það verður sífellt mikilvægara fyrir fyrirtæki og stofnanir að geta
svarað hinni einföldu spurningu: Hvað vill notandinn geta gert á vefnum?
Leiðakerfi vefsins
Vefir eru leiðakerfi líkt og umferðargötur. Í gegnum þá sækja notendur sér
upplýsingar og þjónustu. Hægt er að auka líkur á að notendur heimsæki
vefinn með markaðssetningu og kynningu. Hins vegar er algjörlega
nauðsynlegt að hafa gengið úr skugga um að notendur sem koma á vefinn
skilji hvernig á að nota hann. Hér getur góð hönnun og notendavænt
skipulag skipt öllu máli. Ólíkir vefir kalla á ólíka meðhöndlun efnis og hver
vefur er sérstakur að því leyti. Hins vegar er það svo að flestir vefir miðast
við einhverskonar upplýsingagjöf. Upplýsingagjöfina þarf að greina. Hver
er tilgangur upplýsinganna? Er verið að upplýsa um hvernig viðkomandi
þarf að standa að einhverju nú sem hann leysir á vefnum með því að
fara í gegnum ákveðið ferli eða er verið að halda úti upplýsingasafni sem
notendur geta leitað í hverju sinni?
Greiningarvinna sem skilar hagnaði
Mikilvægt er að hugsa um hvað verður mest notað eða algengustu
aðgerðirnar á vefnum. Þá langar okkur að kynna til sögunnar Gerry
McGovern sem er vel þekktur í veffræðunum. Gerry heldur úti bloggi
á vefnum www.giraffeforum.com og hefur kynnt til sögunnar ákveðna
kenningu. Hann heldur því fram að fimm prósent af efni hvers vefjar skili
a.m.k. 25 prósent af hagnaði eða verðmæti þess vefjar. Því liggi helstu
viðskiptaferlarnir innan þessara fimm prósenta, eða „The long neck“ eins
og hann kallar það. Hins vegar fylgir sá böggull skammrifi að þeir sem
vinna með vefina hafi ekki hugmynd um hvaða efni eða ferli falla undir
þessi fimm prósent og geti því ekki vinsað úr það efni sem virðist ekki hafa
mikla skírskotun til notenda, þannig að hægt sé að einbeita sér að því efni
og ferlum sem hins vegar gera það til að auka gæði vefjanna. Þetta hefur
Sjá þótt ágætis innlegg í umræðuna um vefmálin. Til þess að geta nýtt
hönnun og skipulag til að draga helstu ferla eða leiðir fram er nauðsynlegt
að vera búinn að velta fyrir sér og gera kannanir á því hvaða ferlar séu
mikilvægastir. Hér getur að sjálfsögðu orðið eitthvað misræmi milli notenda
og stjórnenda vefjarins en til þess að taka ákvarðanir um hvernig vefur
fyrirtækis eða stofnunnar skal vera er nauðsynlegt að fara í greiningarvinnu
og draga þessa vitneskju fram.
Notendur þurfa leiðarvísa
Að vissu leyti hefur orðið til ákveðinn vísir að slíkum vinnubrögðum í
gegnum tíðina. Nú er mörgum vefjum gjarnan skipt eftir markhópum s.s.
einstaklingar gegn fyrirtækjum, annars staðar hefur markhópum vefjanna
verið raðað upp og reynt að koma til móts við hvern hóp með því. Enn eimir
hins vegar mjög eftir af því að vefir eru eins og risasúpermarkaðir þar sem
hægt er að villast svo mínútum skiptir til að finna upplýsingar eða þjónustu
sem verið er að sækjast eftir. Fyrirtæki hafa þá ekki lagt út í þá vinnu að
greina helstu ferla sem þau vilja að notendur fari í gegnum. Vefir verða æ
flóknari, þeir hafa tilhneigingu til að stækka án þess að á þeim fari fram
hreinsun, ekki síst vegna þess að fólki finnst gjarnan að allt eigi að vera á
netinu. Mikilvægt er að gera bragarbót hér á, vinna að þessu verkefni sem
er mun meira sálfræðilegs eðlis en tæknilegs.
Hvað vill notandinn
geta gert á vefnum?
Áslaug Friðriksdóttir,
framkvæmdastjóri Sjá efh.
Nú er mörgum vefjum gjarnan skipt eftir markhópum
s.s. einstaklingar gegn fyrirtækjum. Annars staðar hefur
markhópum vefjanna verið raðað upp og reynt að koma
til móts við hvern hóp með því.